O leta te Pol vo te
Taitus
O moroko momohu te Pol vo te Taitus
1
Enaa e Pol to paa kino nasuu teo leta vai.
Enaa a too kiu kokoraa te Hunavaan ae a aposol te Jisu Karisito a Sipoana.
A kiu tenaa tea haihai amaa tavaan vai to viana ri roho e Hunavaan,
eori re vamanamana vakikisi bari,
bara tea haihai riori tea nata ni bono vaasusu vai o omana.
O vaasusu bona re haihai ribari tea popo vapenapena,
2 beori matamatana bata naori bona tootoo vaneovoi.
E Hunavaan vai to saka piipiku haana to sue vaovoi ni roho bona,
o munana he mei nana tea tapaku.
3 Meve paa vaakona ribari bona maa koara teve teo vuri to viana komana rohoe,
ei kaakoo tea maa vamora.
O vamora bona e Hunavaan a Too Vatagae teara to hee anaa bara to sue vakikisi kanaa,
enaa re paku ee.
4 Taitus,
enaa na kino ki nasu unoman.
Ean na potee nom a baiko tenaa mamana,
suku bona tabae o buo koma vamanamana teara na vaapeha nana.
O koma uruuru ae a murun te Hunavaan e Tamaraara bara te Jisu Karisito a Too Vatagae teara na pate tei me kanom ameam.
O kaku aba tabae toro viana e Taitus
5 A pusu na kaokahi ma roho naan Krit,
ean re taatagi ma nom amaa kiu vai to saka vakavara haa ma roho naa.
Bara ean re viana ma ta maa naba bebeera va tea lotu tea maamihu taon,
voen to sue meki ma roho naan.
6 A naba bebeera va tea lotu toro hiki ta hata mataria maa tavaan.
Eori toro vahio koa ni rori bona peha moon.
O baiko teori toro vamanamana rori,
bara eori mee toro goe tea tei vababaaruu bara toro goe tea vaanagu sue kiri bona ba tamariori ae a ba sinariori,
amaa tavaan re goe tea sue vahatahata ribari.
7 E Hunavaan to hee ri nana bona naba bebeera va tea lotu bona kiu va tea kikira bona maa kiu teve.
Rerau,
meori toro hiki ta hata mataria maa tavaan.
Eori toro saka aba va tea vaabeera haa bona henariori.
Eori mee toro saka aba va tea hevee vakahu haa bara toro goe tea gaagaga bona maa gaga vai amaa kikisi.
Eori mee toro saka aba va tea vaasuasun haa,
bara toro saka gono moonii kaakoo haa teo piku.
Ahiki!
8 Evehee eori toro aba va tea vaavoosu aba bara toro aba vai to manini batari tea paku bono matapaku mataa.
Eori mee toro aba vai o simatoto,
o totobin ae o penapena.
Bara toro nata tea kikira bono matapaku ae o manimanini teori komana.
9 Eori toro vamanamana vakikisi bona maa koara vai to ante raara tea nonoe,
to vaasusu ni ma roho ori.
Eori repaa ante tea moroko haihai ribona maa tavaan kaakoo tea maa vaasusu vai amaa totobin.
Eori mee toro vaatotobin bene eori to vaaopaopasu me rori bona maa vaasusu bona.
Matatopo bata nom o matapaku hata tea ta Krit
10 Enaa na boha vo nomen,
tea tabae o aba o bero to vahahaon rori.
Eori o moromoroko pinopino kurusu ae o piipiku,
vaapusuna koari a ta Jiu vai to ehau vakikisi ri rori bona maa abana,
eori re vapeepee.
11 Ean toro goe tea vaamanaata ki riori tea vaasusu,
tea tabae eori na teki ri rori bona meha papana bara kavara na ta komana inu teori,
bona maa vaasusu vai toro goe niori tea vaasusu.
Eori na paku vo rien,
suku bona na rake rori tea gono moonii kaakoo teo piku.
12 A peha poropita va Krit komana,
to boha vo roho en,
“Amaa tavaan va Krit o piipiku,
eori o aba hata kurusu,
o karahu bara o tau ani-ani.”
13 O moroko vai to paku roho a poropita vai,
na mana nana.
Ei mean toro moroko vakikisi bata kiri nomori,
eori re kikisi ae totobin batari teo koma vamanamana teori.
14 Eori mee re vihau tea baitono bona maa vahutate tea ta Jiu vai to saka mana haana,
bara toro goe tea murina bona maa vamora tea maa tavaan to paa hee murinau bona omana.
15 A maamihu taba na tahavi kiri nana bene eori to popo vatahavi rori matane Hunavaan.
Evehee teori a vuhariori to saka tahavi haana bara teori to saka vamanamana haari bene Hunavaan,
na hiki koana ta taba ta tahavi.
Tea tabae o vakokona teori o hata,
bara eori mee na toku rori tea tara inana bona taba vai a mataa ae taba vai a hata.
16 Eori na boha vo rien,
na nata ni rori bene Hunavaan,
eori he na vaavoonihi ni rori bari tea maa matapaku hata teori.
Eori o vaavahahaon bara na tara va-igosi kurusu rori matane Hunavaan.
Eori saka ante kurusu haari tea paku ta taba ta mataa.