4
Eam o masta,
eam toro paku vamataa bara paku vatotobin kiria tau kiu kokoraa team,
tea tabae eam na nata vo nomen,
eam mee na tei me nom e Masta team teo suviri.
Vaneanava ae totomaaki o matapaku team
2 Eam toro kikisi teo matapaku va tea vaneanava.
Beam vaneanava,
eam toro vakiikira bara vaamataa tamuana bata ki nom e Hunavaan.
3 Eam mee toro hino e Hunavaan,
eve re paku kamanam ta hanana,
enam re ante vakisi bata nom tea vamora tavusu nia koara varavihi te Karisito.
Eve a koara bona to karabusu suku nom naa.
4 Vaneanava ausu amanaa,
enaa re vaamaaraa vamataa kurusu a koara bona,
voen to manin vo nae Hunavaan.
5 Totomaakia bata nom o matapaku team beam pate popo bata meri nom amaa tavaan vai to saka vamanamana haari.
Eam toro vataaree tamuana bata ri nom ori bono matapaku mataa te Karisito tea maamihu vuri.
6 Eam toro moroko vamataa tamuana bata kiri nom ori,
eori re rake viravira kurusu tea baitono bona tabae to sue nomeam.
Enaa na sue kanom ameam tea paku voen,
eam re nata toro vaataena vaavaha meam amaa hivi tea kavara na aba.
O moroko vagegeana te Pol
7 E Tikikus pasi no sue kavameam bona tabae to tapaku kanom anaa en.
Enam to pate kiu kokoraa ki nom e Sunano.
Eve a si keara teara,
to uruuru kurusu ni nom nam.
Eve mee to nonoe nom nam tea paku bona kiu te Karisito.
8 Enaa na vaanao nasu ee,
eve re no vaanata ameam bona havee to popo vaavaha vo nom nam enei,
bara eve re vaakikisi bono koma vamanamana team.
9 Eori bo Onisimas to pate nao nasu.
E Onisimas e keara teara vai to uruuru bara to nonoe raara.
Eove a peha va team komana.
Eori pasi sue kavameam bona maamihu taba to tapaku naen.
10 E Aristakus na pate karabusu me kanom anaa;
eori bo Maaka,
e piana te Banabas,
na vaanao nasu rori bona uruuru teori vo team.
Be Maaka ma nao nasu,
eam repaa no vaavoosu vamataa mie voen to sue vo nasu roho naa.
11 E Jisas vai mee,
to dao riori bene Justus,
na vaanao nasu nana bona uruuru teve vo team.
Eori koa a kukan a too Jiu tobina ria maa abana vai to pate kiu meri nom naa.
Enam na pate kiu ki nom a vuaba te Hunavaan,
meori na haihai vamataa kurusu nom anaa.
12 E Epapras,
vai a peha va team komana ae a too kiu kokoraa te Jisu Karisito,
na vaanao nasu nana bona uruuru teve vo team.
Eove na vaneanava vakikisi tamuana me kanom ameam,
eam re kikisi nom teo koma vamanamana team bara eam re goe tea vovoeaka nio manini te Hunavaan.
13 Enaa na sue kanom ameam a omana voen,
e Epapras na kiu vahihivaa kurusu kanom ameam bara maa tavaan va Laodisia ae Hierapolis.
14 Enam na uruuru ni nom e Luk vai a dokta.
Eori bo Demas mee na vaanao nasu rori bona uruuru teori vo team.
15 Hee nia uruuru tenaa tea ba keara tenaa bara ba vavinanaa vai to tei rori Laodisia,
bara te Nimpa ae naba lotu vai to vavatataonun rori inu teve.
16 Beori ahe vakavara kameam bono leta vai,
eam repaa vatapau leta me ria ta Laodisia,
eori re no ahe bono leta team beam ahe vaaruu o leta teori.
17 Sue kie Akipus,
eove re vaakavara vamataa bona kiu to hee e Sunano bona.
18 Enaa e Pol to paa kino komana nasuu teo moroko vai:
‘A uruuru tenaa vo team.’
Upehe amanaa tea maa vaneanava team to tei vo nom naen inu karabusu.
O koma uruuru te Hunavaan na pate tei me kanom ameam.