Popo vapenapena
3
Eam na pate sun vaha mie Karisito tea mate,
meo vakokona team toro manini tamuana batana bona maa taba va teo suviri,
to hio nae Karisito tea papa matau te Hunavaan.a
2 Eam toro upehe tamuana bata nom amaa taba va teo suviri,
saka maa taba va teo kasuana haana.
3 Tea tabae eam na mate mea maa matapaku vahata team,
mea tootoo team na varavihi nana te Karisito,
ei tea vuaba te Hunavaan.
4 Me be Karisito,
a pusuna tootoo teara ma tavusu vatataaree,
eam mee repaa ma tavusu vatataaree meve tea mamairaka teve.
5 Ei meam toro vihuvihu kahi eam bona maa matapaku vahata va teo kasuana:
a varevaren,
vaen,
vakokona varevaren,
manimanini va teo suini ae a rahi unun.
A rahi unun kou na vaapeha me nana bona vaasunano kaehaa.
6 Tea tabae e Hunavaan na hevee ri nana bene eori to paku rori bona maa matapaku vahata vai,
meve pasi ma vaherehereke riu bari.
7 Eam mee na poopopo vo ma roho teebona tea maa vuri to oha,
meam paa pate pakupaku ma amaa matapaku vahata bona.
8 Evehee nomana,
eam saka popo vaha haa vo nom teebona,
meam toro vihu kahi eam bona maa kaku matapaku vahata vai:
a hevee,
gavagava,
matapaku va tea paku vahata kia meha aba,
sue vahatahata nia meha aba,
ae a vakoara vahata to tavusu maana rivomeam.
9 Goe tea vapiipiku vatatana,
tea tabae eam kou paa vihuvihu vaevuru ma,
amaa matapaku vahata vai to pakupaku ma roho am.
10 Meam paa va-uvu-uvu vaaruu nia maa matapaku mataa,
to nata bata me nomeam e Hunavaan.
Meve paupau vakisi batana bono matapaku team,
eam re tavusu voen tea Aba to paku roho ameam.
11 Komana tootoo vai a voon,
na hiki nana ta vaavaha tobina too Jiu ae a too Jentael,
ge teori to paku rori bono vapeepee ae teori to saka paku haari bono vapeepee.
Na hiki nana mee ta vaavaha tobina aba va tea meha vaan ae aba vai a puara,
a too kiu kokoraa ae aba vai a taritarigaha.
Ahiki.
Evehee Karisito to tei nana vuharaara,
eve koa to beera oha nana.
12 Me to viana me kameam e Hunavaan,
eam re tavusu aba penapena teve vai to uruuru ni nae,
eam toro va-uvu-uvu nia koma ove,
matapaku mataa,
vaagunaha,
vasisio ae o vuha masuu.
13 Tei meo vuha vaagunaha be ta aba paku vahata kameam,
bara umee mie bona maa matapaku vahata teve,
voen to umee mie Sunano bona maa matapaku vahata team.
14 A uruuru to beera oha nana bona kavara na maa taba vai,
ei meam toro uruuru rio meho aba.
A uruuru kou to rahi unun ni kara raara,
eara repaa pate popo vamataa.
15 A murun te Karisito toro vamee ni bona vuhameam,
tea tabae e Hunavaan to dadao ameam,
eam re tavusu peho suini komane Karisito bara eam re tei mea murun.
Meam toro vaamataa tamuana bata nom.
16 A koara te Karisito vai a mataa toro hapusu vuhameam.
Eam toro vaasusu bara moroko bata kiri nom o meho aba bona maa taba vai to ante ri na bari tea haihai.
Paku mie bono konakona to hee nom ameam e Karisito.
Vamatamataa bata ki nom e Hunavaan tea vuhameam beam aheahe bata nom amaa aheahe va teo buku Sams bara maa aheahe lotu ae maa aheahe vai to hee nom ameam a Taun Penapena.
17 A maamihu taba to paku,
ge to sue bata nomeam,
toro paku am tea henane Sunano,
beam vaamataa bata ki nom e Hunavaan e Tamaraara,
kaakoo te Karisito.
O vavanoasi va komana inu
18 Eam amaa moon vai o vavahio,
eam toro vaagunaha bata kiri nom a ba mutameam,
tea tabae eve o matapaku mataa teori to murina rori bene Sunano.
19 Eam amaa abana vai o vavahio,
eam toro uruuru ria ba mutameam,
beam goe tea hakau ae asun riori.
20 Eam o baiko,
eam toro baitono sue bata kiri nom a ba sinameam bara ba tamameam tea maamihu taba to sue kanom ameam ori,
tea tabae eve o matapaku to vaamararae nana bene Sunano.
21 Eam a ba tamario baiko,
goe tea vahuu moroko vagunagunaha rio baiko team,
tea tabae eori to mene haraa voen saka ante haari tea paku ta taba ta mataa.
22 Eam a tau kiu kokoraa,
eam toro baitono bara paku a maamihu taba to sue kanom ameam e masta team.
Goe tea paku voen teo aba vai to kiu koari be masta teori tei batana,
eori re vaamararae bari.
Ahiki.
Eam toro kiu mamana beam vasisio bata ni nom e Sunano.
23 Eam toro paku vamataa kurusu a maamihu kiu to paku bata nomeam me bona kavara na vuhameam.
Eam toro paku amaa kiu voen,
eam na paku ki nom ee bene Sunano,
saka ki bona aba koa haana.
24 Tea tabae eam na nata vo nomen,
e Sunano to pasi ma hee avameam bona voni to sue varaba kiri rohoe bona maa tavaan teve.
E Karisito kou e Masta vasuuna vai to kiu ki nomeam.
25 Evehee beam paku o matapaku hata,
eam repaa gono a voni no matapaku vahata bona,
ei kou e Hunavaan na rare nana bona maamihu aba teo peho taratara koa.