2
Enaa kou na rake nom beam nata voen,
enaa na kiu vahihivaa kurusu kanom ameam bara maa tavaan vai to vamanamana rori,
to tei rori Laodisia,
ae a meha papana vai to saka bin tara anaa.
2 Enaa na paku nom amaa taba vai tea vaakikisi o koma vamanamana team bara tea unun ameam,
eam re va-uruuru vatatana bara eam re kona ae maaraa vamataa kurusu nia koara te Hunavaan vai a varavihi,
ei e Karisito,
beam goe tea vovoeaka nio natanata bona.
3 A maamihu konakona ae natanata vai amaa mataa kurusu na varavihi nana teve.
4 Enaa na sue kanom ameam amaa taba vai,
tea tabae enaa na goe nom be ta aba ma hare vahogo ameam tea vamanamana amaa vaasusu vai to saka mana haana,
ei rova bea maa vaasusu bona ma tanihi vamataa kameam.
5 Enaa saka tei rova haa me kanom ameam teo suini,
a vuhanaa he na tei pahi nasu nana team.
Menaa na mararae kurusu nom to baitono vo naen,
o koma vamanamana team vo te Karisito na kikisi kurusu nana,
bara to pate popo vamataa vo nomeam.
Sun vakikisi teo koma vamanamana team te Karisito
6 Me to paa gono vaevuru meam e Jisu Karisito tea tootoo team voen,
eve e Sunano team,
o pitapita team toro murina tamuana batana bona.
7 O koma vamanamana team toro va-ana-ana te Karisito,
potee bono naono vai to va-ana-ana gunaha nana teo kasuana.
Eam mee toro vigu hiava o koma vamanamana team teve,
potee a inu vai to vigu hiava riori toono paoso vai o kikisi.
Eam toro sun vakikisi teo koma vamanamana team,
voen to vaasusu me ka roho ameam ori,
bara vaamataa tamuana bata ki nom e Hunavaan.
8 Matatopo bata nom sin,
to aba to mene ma mee vahoara ameam kaakoo tea maa vaasusu teori vai amaa piku ae taba pinopino,
ei to tavusu maana tea maa taatate teo aba bara teo taun hata va teo munana.
Amaa vaasusu bona saka murina haana bona maa vaasusu te Karisito vai amaa omana.
9 E Karisito kou na tavusu aba vo roho en teara,
evehee a kavara na tootoo te Hunavaan na tei nana teve.
10 Meam saka harusu haa ni nom ta taba to tei vo nae Karisito tea vuhameam.
Eove to kahoo ni nana bona maamihu tau vamee ae o taun vai to tei me rori bono kikisi va tea vamee.
11 Eam he gono e Karisito tea tootoo team,
meam paa gono o vapeepee.
Evehee saka o vapeepee vai haana beori kurusu bono peho hum va suini meam.
Ahiki.
E Karisito na paku kameam bono vapeepee va tea taun meam,
eove he kurusu kahi ameam bono manimanini va teo suini.
12 Eam he baptais,
na kao vo naen,
eam na pate mate mie Karisito meam paa pate sun vahaa,
kaakoo teo koma vamanamana team teo kikisi te Hunavaan vai to vaasun vahaa bene Karisito tea mate.
13 Meam o taun mate roho suku bona maa matapaku vahata team,
bara suku bona maa manimanini va teo suini na teitei vakisi.
Evehee Hunavaan na pate hee vahaa ameam bere Karisito bona tootoo vai a voon,
eove he umee me karaara bona kavara na maa hata teara.
14 Eara na tei ma paano kikisi tea lo,
mea lo paa tahi sue araara suku bona ma hata teara.
Evehee Hunavaan na vaarudaha bona maa hata teara,
eve he niiri ni bona teo naono taparom.
15 E Hunavaan na gono kahi ribona tau vamee ae o taun vai to tei me rori bono kikisi va tea vamee,
bona maamihu kikisi teori.
Meve paa vaapote ribari mataria maa tavaan,
eove he oha ribari kaakoo tea mate te Jisu Karisito teo naono taparom.
16 Ei meam toro goe tea baitono ta aba be rare ameam suku bona tabae to ani bara to gaga nomeam ae suku bona to saka vasisio haa me nomeam amaa boni penapena,
niu mun ae o Sabat.
17 Tea tabae,
amaa taba vai amaa abeabe na maa taba vai koa to nomaa batana.
Evehee Karisito pahi a taba mamana toro tara ara.
18 Goe tea baitono ta aba be sue kameam tea vaagunaha vapiipiku bara tea vaasunano rio enjol suku koa bona maa taratara teve.
Tea tabae,
eori na moroko vahatahata ni rori bono koma vamanamana team.
O kaku aba bari na hahaara pinopino koari.
Amaa vakokona teori he,
amaa vakokona va aba koa.
19 Eori saka ato vakikisi haa ni rori bona maa vaasusu te Karisito,
voen to kahoo me nae bono suini.
O kahoo kou to vamee ni nana bono suini,
bara to va-ato me nana bona maa karao ae amaa vatomo na suini raara,
orepaa beera voen to manini vo nae Hunavaan.a
20 Eam he pate mate mie Karisito,
mepaa rigarigaha kahi ameam bono taun hata va teo munana.
Evehee sovee meam popo potee vakisi nom,
eam na popo nom teo munana?
Sovee meam murina vakisi nom amaa lo vai,
21 “Goei ta ato!
Goei ta namihi!
Goei ta haraa!”?
22 Amaa lo vai na sue koana bona maa taba vai to saka ante haana tea tei vaneovoi.
Amaa vaasusu ae lo bona amaa paku teo aba koa.
23 Amaa lo bona na tara vo naen,
o aba o konakona to paku bari,
evehee ahiki pahi.
Ei kou,
na ehau koa nom ameam tea vaagunaha vapiipiku bara tea vaasunano rio enjol ae tea teki pinopino a suini meam.
Evehee amaa lo bona na hiki nana to kikisi tea haihai bona aba,
eve re vihana tea paku bona maa manimanini va teo suini.