O leta te Pol vo tea ta
Kolosi
O moroko momohu te Pol vo tea ta Kolosi
1
Enaa e Pol,
a aposol te Jisu Karisito.
E Hunavaan komana to viana anaa tea tavusu aposol.
Enam bo Timoti,
e keara teara,
to kino ka nasu nom ameam,
2 a ba noasi manam komane Karisito to tei nom Kolosi.
Eam kou o aba penapena bara na sun vakikisi nom teo koma vamanamana team vo te Karisito.
O koma uruuru bara murun te Hunavaan e Tamaraara na pate tei me kanom ameam.
O vaneanava va tea vaamataa
3 Enam na vaamataa tamuana ki nom e Hunavaan,
e tamane Jisu Karisito,
e Sunano teara,
benam upehe ameam tea maa vaneanava tenam,
4 tea tabae enam na baitono nio koma vamanamana team vo te Jisu Karisito bara to uruuru me nomeam amaa tavaan te Hunavaan.
5 Eam na tei me nom o koma vamanamana ae uruuru bona,
tea tabae eam na matamatana bata nom tea gono a tootoo vai a mataa,
to matatopo nana e Hunavaan en teo suviri.
O matamatana bona na taneo roho,
eam he baitono nia koara vai a omana,
ei o vaaree mataa ne Jisu Karisito
6 vai to ma suguna roho en team.
O vaaree mataa bona na raha vakisi batana tea meha maa hum va teo munana.
Meve paupau batana bona tootoo tea maa tavaan voen,
to paupau vakisi bata me nae bona tootoo team,
taneo teo boni to baitono bara to mamana ni maam a omana no koma uruuru te Hunavaan.
7 E Epapras to vaasusu ameam bono vaaree mataa bona.
Enam bere Epapras to pate kiu kokoraa ki nom e Jisu Karisito,
menam na uruuru kurusu ni nom ee.
Eove to nonoe nom nam tea paku kamanam bona kiu te Karisito benam saka tei rova haa nom.
8 Eve mee to ma sue vataaree kamanam bona uruuru to hee ameam a Taun Penapena,
meam uruuru ri nom o meho aba.
9 Ei menam paa taneo tea vaneanava me kameam teo boni to baitono ni roho nam o matapaku mataa team.
Enam na hino tamuana nom e Hunavaan voen,
a Taun Penapena teve re hee ameam bono konakona ae o natanata,
eam re nata vamataa nio manini te Hunavaan.
10 Enam na vaneanava vo nomen,
o kaku popo team toro vaabeera bara vaamararae tamuana batana bene Sunano,
beam paku tamuana bata nom amaa matapaku mataa kirio meho aba,
bara beam nata vamataa vakisi bata ni nom e Hunavaan.
11 Enam mee na vaneanava vo nomen,
e Hunavaan re hee ameam bono kikisi teve vai o beera,
to tavusu maana tea mamairaka teve vai a kikisi.
O kikisi bona re haihai ameam tea sun vakikisi bara tea tei mea masuu beam vatatana mea maa taminoto.
Eam mee toro mararae,
12 beam vaamataa bata ki nom e Tamaraara,
to paku bona hanana,
meam ante nom tea gono amaa taba to matatopo kirie bona maa tavaan teve,
vai to tei rori tea vuaba va tea mamana.
13 E Hunavaan na rigarigaha araara kahi bono kikisi va tea booboni,
meve paa vaahovo araara tea vuaba tea Baiko teve,
vai to uruuru kurusu ni nae.
14 A Baiko teve na vaarudaha bona maa matapaku vahata teara,
eove he voni vahaa araara bona revasin nae.
A kiu te Jisu Karisito
15 Eara saka ante haara tea tara e Hunavaan,
evehee Jisu Karisito na vaapeha me nana bona.
Eve a Baiko vaamua,
na teitei komana roho o munana he mei nana tea tapaku.
Eove to beera va-oha nana tea maamihu taba,
16 tea tabae eove to pate kiu me roho bene Hunavaan tea paku bona maamihu taba –
a maamihu taba va teo kasuana ae teo suviri,
amaa taba to tara raara bara to saka tara haa raara.
Eve mee to paku bono aba ae o taun vai to tei me rori bono kikisi va tea vamee.
Eove to paku bona maamihu taba,
bara na paku kie bene eve komana.
17 E Karisito na teitei komana roho a maamihu taba he mei nana tea tapaku.
Eve to paku nana bona maamihu taba,
meori pate kiu vamataa rori.
18 E Karisito to kahoo ni nana bono suini,
meo suini kou,
ei amaa tavaan vai to vamanamana rori bari.
Eve a Baiko vaamua bara pusuna tootoo vai a voon.
Eove to vaasun momohu vaha roho e Hunavaan tea mate,
eve re momohu ni bona maamihu taba.
19 E Hunavaan na mararae nana bea kavara na maa matapaku mataa teve tei tea Baiko teve,
eve re vaapeha me bona.
20 Eve mee na paku bona murun varirovana nae
bara maamihu taba va teo kasuana ae teo suviri kaakoo te Karisito.
Na pakue kaakoo tea mate te Karisito teo naono taparom,
to oro roho a revasin nae.
21 Eam na naananaona kahi ma roho e Hunavaan nabunuu.
Meam paa vakomakoma hata me ma rohoe suku bona maa vakokona team bara maa matapaku team amaa hata roho.
22 Evehee nomana e Jisu na paku bona murun varirovana meam bere Hunavaan,
kaakoo tea mate teve teo suini.
Eove na paku vo teebona,
eve re mee ameam vo te Hunavaan beam o penapena,
o tahavi ae beam o hiki vakavara koa ta hata vai toro rare suku ameam e Hunavaan.
23 Ei meam toro sun vasuu teo koma vamanamana team,
bara eam toro ato vakikisi nie.
Goe tea kaokahi o matamatana to gono roho am teo vaaree mataa to baitono ni roho am.
O vaaree mataa bona vakisi,
to vamora ni roho ori tea maamihu hum va teo munana.
Menaa e Pol,
a too kiu to vamora ni ma o vaaree mataa bona.
A kiu te Pol
24 Me nomana,
enaa na mararae nom tea siitore kameam.
Amaa siitore to dee mae Karisito saka bin kavara.
Menaa na hee ni nom a suini naa tea dee vakisi amaa siitore bona,
tea tabae enaa na rake nom tea haihai a naba lotu.
Eori kou a suini ne Karisito.
25 E Hunavaan komana to viana anaa,
enaa re tavusu too kiu kameam.
Menaa na tei me nom a kiu va tea vamora tavusu kameam a kavara na koara teve.
26 A koara bona na varavihi ma roho bono vuri bebeahu,
evehee nomana amaa tavaan te Hunavaan paa nata niu bari.
27 E Hunavaan kou na rake beori nata voen,
a koara vai a mataa kurusu,
kiri bona ta Jentael mee.
Mea koara varavihi bona kou ei,
e Jisu Karisito to tei nana vuhameam.
Eove o matamatana teara tea hovo teo suviri,
eara re gono amaa taba matamataa teara teebona.
28 Menam na sue tavusu vakisi bata ni nom e Karisito tea kavara na aba.
Enam na moroko vakikisi bara na vaasusu bata ri nom ori,
enam re hee riori te Karisito,
beo koma vamanamana teori o kikisi.
E Hunavaan to hee amanam bono konakona vai to haihai nom anam tea paku a kiu vai.
29 Eve a pusunae menaa kehi kurusu nom tea kiu vakikisi meo kikisi te Karisito to kiu nana vuhanaa.