Jesusmi willaculcänanpä sänachinanpäpis caćhan
9
1-2 Chaypïtam Jesus ćhunca ishcaynin yaćhapacünincunacta juntuycul nila:
“Quiquïpa munaynïtam upäcuśhayqui nunacunäta supaypa maquinpi julaycälinayquipä,
imawan ishyäcunätapis nanaynincunactapis lluy sänachipäcunayquipäpis.
Diospa gubirnunpi willacü lipäcuy” nil.
Lucas 9.1-22
3 Nilculmi:
“Caminuyquipä amam imactapis apapäcunquichu,
nï garutiquita,
luncuyquita,
milcapayquita,
nï illayniquitapis.
Sinuꞌa janä müdanallayquiwanmi lipäcunqui.
4 May wasimanpis ćhalꞌa chayllaćhümi quïdaculcanqui chay malcapi juc-läduman pasapäcunayquicama.
5 May malcaćhüpis mana ćhasquiy munapäcuśhuptiquiꞌa chaypi pasaculcay ćhaquiquićhu laꞌaśha pulbüllactapis lluy tapsilcälil chay malcäta ima pasanantapis tantiapäcunanpä” nil.
6 Chaynu incaraycäliptinmi paycuna liculcäla intiru malcacunamanpis Diospi willacuśhtin,
ñatac imaymanawan ishyäcunactapis sänachishtin.
Jesus mayan caśhantapis nipäcunmi
7-8 Chayćhümi Mandacü Herodes uyalïla Jesus caynu imapis lulaśhancunapi.
Chayćhüshi waquin nunacuná nipäcula:
“Bawtisä Juan-ari śhalcämuñä”;
juccunañatacshi “Diospa willacünin Eliaschućh jinam licalïmun”;
waquinnincunañatacshi “Diospa unay willacüninćha mayanninpis śhalcämun” nil.
Chaynu nipäcuptinmi imaman pinsaytapis mana atipal:
9 “Yaꞌa quiquïmari Juanta muꞌuchimulá.
Chayurá ¿mayanpïtan canan uyalïyá?”
nila.
Nilculmi Herodes alli-allicta Jesusta lisiycuyta munala.
Jesusmi picha walangaman micuyta camaycachin
10 Ñatac caćhaśhancuna intiru malcaćhu pulimuśhanpi cutïlälimulmi Jesusta willapäculcäla imacta lulapämuśhantapis.
Chaypïtam Jesus puśhacula llapantapis Betsaida malcap chunyäninman.
11 Chay-läduman lishanta yaćhälälilmi llapa nunacunapis lipäcula.
Chaynu ćhäläliptinñatacmi Jesus ćhasquiycul Diospa gubirnunpi willala,
ishyäcunactapis sänaycachila.
12 Chayćhu intïpis ulup patallanćhüña cacuyaptinmi ćhunca ishcaynin yaćhapacünincuna Jesusta nipäcula:
“Ñä tardiña cacuyaptin cay chunyäcäćhu micuypïpis wañülälinꞌaćh.
May malcallamanpis micuy ashï jamapacüpis lipäcuchunñari” nil.
13 Niptinmi:
“Amcunari micachipäcuy” nila.
Niptinmi:
“Cay picha tantallá,
ishcay challwallá jucchá imanmanpis camanman.
Camayta lantimuptinchicpisćha ichá camachichwanpis” nipäcula.
14 Cayta nipäcula picha walanga wayapanllanlä capäcuptinmi.
Chayćhümi yaćhapacünincunacta:
“Picha ćhunca-camacta lluy taycachipämuy” nila.
15 Niptinmi yaćhapacünincuna llapa nunactapis taycachimula.
16 Jinaptinmi Jesus chay picha tantäta,
ishcay challwäta apticulcul,
sïlüta licalcul Diosta anradisicula.
Jinalculmi lluyta partilcul yaćhapacünincunacta uycula manyapi llapantapis aypumunanpä.
17 Jinaycuptinmi llapa nunapis chayćhu micapäcula maćhaycälinancama.
Chayćhu puchünincunacta juntuchimuptinmi ćhunca ishcayniyu canaśhta juntalä cacuñä.
Jesus Salbacüca caśhanta Pedrom tantian
18 Juc-punmi Jesus llapa yaćhapacünincunawan japächacalcälil Diosta mañacula.
Chaynu mañacuyta camacalculmi yaćhapacünincunacta tapula:
“Yaꞌacta ¿mayan nipämantan?”
nil.
19 Niptinmi:
“Waquinnincuná:
‘Bawtisä Juanćha śhalcämun’;
waquinnincunañatacmi:
‘Diospa unay willacünin Eliasćha cutïmun’;
juccunañatacmi:
‘Diospa jucnin unay willacüninpisćha cawsämun’ niyalcäśhunquim” nipäcula.
20 Nipäcuptinmi:
“Amcunapïtá ¿pitan chayurá yaꞌa cayá?”
nila.
Niptinmi Pedro nila:
“Amꞌa canqui Diospa Caćhamuśhan Salbacücämi” nil.
21 Caynu niptinmi ćhuncay-ćhuncayta:
“Mayan caśhätapis amam mayanćhüpis limalcälinquichu” nin.
22 Nishanpïmi:
“Jerusalenta linämi.
Chayćhu yaꞌa Rasun Nunap Chulintam prinsipal yaśhacuna,
puydï sasirdüticuna,
llapa yaćhachicünincuna sumä-sumä ñacachipämal wañuchipämanꞌa.
Jinaptinpis quimsa muyunpïtam ichá caśhan śhalcamuśhä” nila.
23 Cayta nilculmi llapanta nila:
“Rasunpa mayanpis yaꞌap laśhćhüman jalumuyta munäcá quiquinta unꞌacuycul muyun-muyun jalumuchun ima pasaptinpis wañunancama.
Lucas 9.23-62
24 Ñatac cawsayninta ama-pacha nïcá cawsaynintam apacunꞌa.
Yaꞌa-laycu bïdantapis uycücämi ichá cawsaycunꞌa.
25 Chaynu quiquillan almanta mana salbaptinꞌa ¿imapätan bälinman masqui jinantin pachäta gänäluptinpis?
26 Chayurá mayanpis yaꞌapïta ütac yaćhachicuynïpïta pinꞌacamäcätá yaꞌa Rasun Nunap Chulinpis sumä munaynïćhu,
Taytäpa munayninćhüpis,
chuya anjilcunawan cutimuynïćhu paycunapïpis pinꞌacuśhämari.
27 Rasu-rasunpa waquinniquicuná manalämi wañupäcunquilächu Diospa gubirnunta manalä licaycälilꞌa” nin.
Jesusmi altu ulućhu chipipicyayämüman muyun
28 Pusä muyunnuy cay nishancunaca pasäluptinmi Pedrocta,
Jacobocta,
Juantawan puśhaculcul Jesus chunyä ulup puntanman ishpila Diosta mañacü.
29 Chayćhu mañacuyaptinmi cäranpis müdananpis sumä-sumä chipyayä yuläman muyülun.
30-31 Jinaptin paypa lädunćhu Moiseswan Diospa unay willacünin Eliasmi sumä cayninćhu licalïlälin paywan limaśhtin.
Chayćhümi limapäcula Jerusalenćhu Jesuspa ñacayninpïtawan wañuyninpïta.
32 Chayćhu Pedroctawan juccunäta maynu puñuy aysacuyaptinpis callpawan licchapäcula.
Chayćhümi Jesustawan chay umrïcunäta sumä-sumä intïnu chipipicyayalcäta licälälin.
33 Chaymi cay ishcaynin umrïcunaca licuśha nicuyaptin Pedro nila:
“Yaćhachicü taytáy,
allinpächućh jinam śhapämuñá.
Canan-ari quimsayquipä jucnincä-cama chucllacta lulälälipuśhayqui,
ampä,
Moisespä,
Eliaspä” nil.
Cay niyllamanmi shimin paćhyala.
34 Caynu niyällaptin pucutay jiꞌalpalcamul ñiticalpuptinmi manchalicälälisha cacuyalcäla.
35 Chaypa śhunꞌunpïtam ayalpämun:
“Paymi cuyay chulí.
Payllactari uyaliculcay” nil.
36 Chaynu nilpämuptin-pachallam Jesus japallanña licalïlun.
Lluy cay pasaśhancunätam śhunꞌunćhu uywapäcula imaypis cay licänin yaćhapacünincuna mana pictapis willallal.
Wañupayniyu walaśhtam Jesus sänachin
37 Chay wäla ulüpi cutilpayämuptinmi achca nunacuna talipapämula.
38 Chay nunacunap ćhawpinćhümi juc nuna ayaycaćhaypa nïmun:
“Taytáy,
ama chaynu callaychu.
Llaquipaycapallämay.
Japallanmi chulillá capalläman.
39 Paytam wañupaynu chalallan.
Jinaptinmi pushumayta ätumun.
Ima anlalä chaynu lulachipallämanpis.
Jinalcul jinalculmi lluy ñacachipalläman;
chay ishyaynin manam caćhaycälinchu.
40 Chaymi yaćhapacüniquicunacta sänaycachipallämänanpä ruygacullälá.
Ñatac manamá atipapäcullanchu” nin.
41 Niptinmi:
“¡Ay,
mana chalapacuyniyu pasaypi ćhanćha umacuna!
¿Imaycamatan amcunacta awantaśhtin cayäśhä?
Má,
cayman-ari puśhamuy” nila.
42 Chay walaśhta puśhaycayämuptinmi achatu yapa tapsilcul cućhpächinñatac.
Jinaptinmi Jesus chay achatüta:
“¡Cay walaśhta caćhaycuy!”
nil alüla.
Chaynu sänalcachilmi:
“Cay walaśhniqui” nil taytanman uycula.
43 Jinaptinmi chayćhu nunacunaca:
“Diosninchic cay lulaśhantanuꞌa manamá pipis lulanchu maynu pudirniyu calpis” nil licapayllaman camälälila.
Wañuyninpïtam Jesus yapa willan
Chaynu niyalcäśhancamam yaćhapacünincunacta Jesus nila:
44 “Cay nishäta sumä uyalipämay,
ama unꞌapäcuychu.
Yaꞌa Rasun Nunap Chulinca puydï nunacunap maquinman ćhulaycuśham caśhä” nil.
45 Niptinmi cay nishancäta mana tantiapäculachu mayanninpis mana tantiapaśh captin.
Ñatac tapuycuytá manchaculcälatacmi.
¿Mayannintá mas puydïnin canꞌa?
46 Chaypïñatacmi yaćhapacünincuna:
“¿Mayanninchicćha mas puydïnin caśhun?”
nil rabyatyachinacücuyalcäla.
47 Caynu imaymanacta pinsal ninacuyaptinmi Jesus tantialcul juc walaśhchacta lädunman taycacaycachil nila:
48 “Cay walaśhchäta ćhasquïcá yaꞌapa caśhan-laycum yaꞌacta ćhasquiyäman.
Chaynütacmi yaꞌacta ćhasquimäcá quiquin caćhamänïtapis ćhasquiyantac.
Jinaman amcunaćhu mana cäpä licaśhanchiccämá mas puydïpä licaśhatac cayan” nil.
49 Niptinmi Juan:
“Yaćhachicü taytáy,
juc nunactam licälälí ampa pudirniquiwan Satanaśhpa gänaśhacunacta sänayächishanta.
Chaymi yaꞌanchic caśhtapi mana captin lluy mićhacälälilá” nila.
50 Niptinmi:
“¿Imapämi mićhaculcanqui?
Mayanpis yaꞌanchicpa cuntranchic mana cäcá yaꞌanchicmanmi śhalcapäcun” nin.
Jesusmi imapä śhamuśhanta tantiachin
51 Chaypïñatacmi wañunanpä sircacaycayämuptin,
Jerusalenta linanpä allicta balurchacula.
52 Chaymi Samaria malcap pasanan captin jamapaculcänanpä juc wasicta ashichimü ñawpachila.
53 Chaynu ñawpalcul ashipämuptinmi mana mayanpis awnipäculachu Jerusalen malcäta lishanta tantialcälil.
54 Chaynu mana pipis awniptinmi,
Jesus ćhämuptin Juanwan,
Jacobo nila:
“Taytáy,
unay Eliasnu ¿manachun cay malcäta janay pachäpi ninacta jiꞌalpächimul camacaycälächïman?”
nil.
55 Chaynu niptinmi piñapäla:
˻“Cay nunaca manam śhamula nunacta wañuchicüchu,
sinuꞌa salbaycüninmi”.˼
56 Nilculmi juc-lädu malcaman pasaculcäla.
Jesus atinanpä ayaptinmi imaymanacta nipäcun
57 Chaypi liyalcaptinmi juc wayapa Jesusta nila:
“Taytáy,
mayta liptiquipis atishayquim” nil.
58 Niptinmi:
“Atücunäpäpis maćhaynin canmi.
Pishucunäpapis ishnan cantacmi.
Rasun Nunap Chulincäpañatacmi ichá mana mayman umalläta ćhulaycunalläpäpis canchu” nin.
59 Nilculmi juctañatac:
“Acuchun,
yaćhapacüní canayquipä” nila.
Niptinmi:
“Taytáy,
papänïmi maquïćhülä cayan.
Pampälulñaćh ichá aticman” nila.
60 Niptinmi:
“Jina wañuśhacunaca wañünincunacta pampaculcächun.
Amꞌa Diospa gubirnunpi willacamuy” nin.
61 Chayćhümi jucñatac:
“Taytáy,
anwan linäpä listum yaꞌa cayá.
Ñatac jamá,
wasïćhu cäcunäpïlä dispidicamuśhä.”
nila.
62 Niptinmi:
“Mayanpis ärayta allayculꞌa,
manamá ipanta licaśhtinchu äran.
Chaynümi unay cawsayninman cutiyta munäcá Diospa gubirnunćhu sirbinanpäpis nï bälinchu” nila.