Jesus chipipicyayämanmi muyun
17
Süta muyunpïtañatacmi Pedrocta,
Jacobocta,
śhullcantin Juantawan puśhaculcul Jesus chunyä ulup puntanman lipäcula.
2 Chay ñawpäninćhümi Jesus jucnüman lluy muyülun cäranpis müdananpis intïnu sumä-sumä chipipicyayämüman.
La transfiguración (Mateo 17.1-13)
3 Jinamanmi Moiseswan Diospa unay willacünin Eliaswan limaśhtin licalïlun.
4 Chaymi Pedro Jesusta:
“Yaćhachicü taytáy,
allinpämá śhapämuñá.
Canan-ari quimsayquipä jucnincä-cama chucllacta lulälälipuśhayqui,
ampä,
Moisespä,
Eliaspä” nin.
5 Chaynu niyällaptinmi sumä-sumä chipyayä pucutaynu lluy ñiticalpula.
Chay pucutay śhunꞌunpïmi ayalpämun:
“Pay cuyay chulïwanmi cushisha cayá.
Paytari uyaliculcay” nil.
6 Chay nïta uyalïlälilmi yaćhapacünincuna manchacuypïta umantapis pampaman ñaćhaña śhatïlälin.
7 Jinaptinmi Jesus aśhuycul yataycula:
“Ama manchaculcaychu.
Śhalcapäcuy” nil.
8 Chay niptin licalcälinanpämi Jesusllaña chayćhu cayäñä.
9 Ñatac chay ulupi cutiyalcämuptinmi Jesus nila:
“Cay licapäcuśhayquipïta amam pictapis willapäcunquichu,
yaꞌa Rasun Nunap Chulincäta wañuchipämaptin caśhan śhalcamunäcama” nil.
10 Niptinmi yaćhapacünincuna tapupäcula:
“¿Imapïtan camachicuyta yaćhachicücunaca niyalcan ‘Diospa willacünin Eliaslämi Salbacücäpa puntanta śhamunꞌa’ nil?”
11 Niptinmi nila:
“Aw chaynümi.
Rasunpa Eliaslämi puntacta śhamunꞌa lluyta tincüninmancama allichaycachinanpä.
12 Ñatac Elias śhamulañam.
śhamuptinpis nunacunaca pay caśhanta manam lisipäculachu.
Aśhwanpam munapäcuśhanmannuy pasachipäcula.
Chaynümi Rasun Nunap Chulincätapis pasachipämanꞌa” nil.
13 Niptinmi yaćhapacünincuna tantiälälila Bawtisä Juanpi,
Eliasman tinculcachil limaśhanta.
Jesusmi achatup maquinpi müsucta caćhaycachin
14 Chay jiꞌalpapämulmi achca nunacuna caśhancäman ćhäläliptin juc nuna Jesusman aśhuycamul puntanman unꞌulacuycul nila:
15 “Taytay,
chulillätari llaquipaycullay.
Paytam uman alli-allicta lücuman muyuchillan.
Chay chaläluptinꞌa yacumanpis ninamanpis cućhpälunmi.
16 Chaymari yaćhapacüniquicunaman puśhamuptí nï tumpallapis sänaycachipällämanchu” nil.
17 Niptinmi:
“¡Ay,
mana chalapacuyniyu pasaypi tullu umacuna!
¿Imaycamatan amcunacta awantaśhtin cayäśhä?
Má,
cayman-ari puśhamuy” nin.
18 Chayćhu achatucta piñapalcul maquinpïta caćhaycachiptin-pacham walaśhca tuqui sänu licalïla.
19 Chaypïtam quiquin-pulallaña yaćhapacünincuna Jesusta nipäcun:
“¿Imapïtan yaꞌacuna caćhaycachiyta mana atipapäcüchu?”
nil.
20 Niptinmi:
“Pishi chalapacuyniyu capäcuśhayquipamá.
Sïchuśh shitap mujunnüllapis chalapacuyniqui captinꞌa,
wic ulüta juc-läduman ‘aśhuy’ niptiquiꞌa,
aśhülunmanmi.
Rasunpa imapis manam sasachu canman.
21 ˻Chaynu captinpis caynücunäta caćhaycachinchic ayunal Tayta Diosta mañacuyllanchicwanmá˼” nila.
Jesusmi wañuyninpi yapa willacun
22-23 Chaypi Galileap malcancunaćhu cayalmi Jesus yaćhapacünincunacta:
“Yaꞌa Rasun Nunap Chulincäta puydï nunacunap maquinman ćhulaycamaptinmi wañuchipämanꞌa.
Jinapämaptinpis quimsa muyunpïtam caśhan śhalcamuśhä” nin.
Niptinmi yaćhapacünincuna alli-allicta llaquicälälila.
Juntunacuna wasipa alcabäla pägaypïtam tapun
24 Chaypi Jesus yaćhapacünincunawan Capernaum malcäman ćhäläliptinmi juntunacuna wasipä alcabäla mañäcunaca Pedroman śhalcamul tapula:
“Yaćhachicüniqui alcabälacta ¿päganchun icha manachun?”
nil.
25 Niptinmi:
“Aw,
päganmi” nin.
Nilculmi Jesus caśhanman yaycucuycula chaypi niycunanpä.
Manaläpis limalcuptinmi Jesus:
“Simon,
má,
nimay.
Cay puydï mandacücunaca alcabälacta ¿mayantatan pägachin?
¿Aylluntachun icha juccunactachun?”
nin.
26 Niptinmi:
“Juccunactamari” nin.