¿Mayantan mas puydïnin?
18
Chaypïtam yaćhapacünincuna Jesusman aśhuycul tapupäcula:
“Diospa gubirnunćhu ¿mayanćha mas puydïnin caycunꞌa?”
nil.
2 Niptinmi Jesus juc walaśhchacta ćhawpinman śhaycacaycachil:
3 “Rasunpa,
mana wanacul nï cay walaśhchämannuy mana muyupäculꞌa,
Diospa gubirnunman nï yaycapäcunquimanchu.
4 Chayurá cay walaśhchänüpis mana nunatucücällam gubirnunćhu puydïninpa ćhulaycuśha canꞌa.
5 Jinaman mayanpis caynu walaśhchäta ćhasquiycücá,
yaꞌapa caśhan-laycum quiquïtatac ćhasquiyäman.
Yanꞌal-lätac mana allinman palpayächinquiman
6 “Yanꞌal-lätac cay uchuchäcunanülla cä chalapacamänïta mayanpis juchaman palpuyächinman.
Mas allinćha canman cuncanman wanca lumicta watacuycul lamarcäman jiꞌacalpuptinpis.
7 ¡Imañam cay pachaca juchallamanña pictapis aysaycuyänanpä!
Caycuná jinamá timpuycunꞌa.
Ñatac nuna-masinta mana allincäman aysaycücäpá ¡ay imalä bïdan canꞌa!
8 “Chayurá ćhaquiquipis maquiquipis juchaman jitaycuy munaśhuptiquiꞌa,
cutulcul wicapäläliy.
Mas allinmi canman cutu maqui cutu ćhaqui cawsaycäman yaycuy,
mana camacaycü nina waläcäman jinantin cuirpuyquita wicapachicuśhayquipïtá.
9 Masqui ñawiquilä juchaman jitaycuy munaśhuptiquipis,
jululcul wicapäläliy.
Mas allinmi canman cawsaycäman churchua yaycuypis,
pulan ñawiyu nina lupäcäman jitaycuśhunayquipïtá.
Uwish jitaśhamanmi tincuchin
10 “Chayurá caynu uchuchäcunäta ama mana cäpa licapäcuychu.
Paycunap anjil täpänincuna cayan janay pacha Taytäpa ñawpäninćhümi. ˻
11 Ñatac yaꞌa Rasun Nunap Chulinca śhamulá,
chincaśhacunäta ashilcul Taytäman caśhan cutichinäpämi.˼
12 “Má,
nipämay:
Juc nuna paćhac uwishninpi jucninta jitapacülul ¿imanantan?
¿Manachun isun ćhunca isunniyu uwishnincunacta lancaycachil chincäcäta ashï intiru ulucta pasacun?
13 Talimulꞌa rasunpa chay mana chincaśhancäpïtapis mas mastalämi talimuśhancäpi cushicun.
14 Chaynümi janay pachäćhu Taytayquipis mana munanchu nï jucllay uchuchäcunalla chincaycunantapis.
Imanuypa chalapacü-masinchicta pampachänapä
15 “Chaymi chalapacü-masiqui mana allinta lulaśhuptiquiꞌa,
payman lilcul-ari quiquiqui-pulallaćhu tantiaycachimuy.
Chayćhu uyalicul tantiacuptinꞌa,
paywan allintam lulälunqui.
16 Mana uyalïtucuśhuptiquim ichá,
ninacuśhayquita licaycäliwshishunayquipä juc-ishcay chalapacü-masiquiwan cutiycuy.
17 Paycunactapis mana quirïtucuptinꞌa llapa chalapacü-masiquimanña ćhulaycunqui.
Lluy paycunactaläpis mana cäsütucuptinñam ichá mana chalapacü ipanchä jalutacücätanüñari licaycäliy.
18 Rasunpa cay pachäćhu awnishayquitapis mana awnishayquitapis janay pachäćhu quiquin Tayta Diosmi awnilpunꞌa.
19 Yapa niycälic:
caycunapïta ishcayniqui awninacalcälil mañacuśhayquita Tayta Diospis tacyalpachinꞌam.
20 Masqui ishcay-quimsalla yaꞌap śhutïćhu juntunaculcaptiquiꞌa,
ćhawpiquićhümi caycuśhä” nin.
21 Niptinmi Pedro Jesusman aśhuycul tapula:
“Taytay,
chalapacü-masí mana allinta lulaycamaptin,
¿ayca cutim pampachäman?
¿Anćhish cuticamalächun?”
nil.
22 Niptinmi:
“Manam.
Anćhish ćhunca anćhishniyu cuticamapis maycamapis pampachaycunquim.
Mana pampachaycuy munä nunaman tincuchin
23 “Caynümari Tayta Dios gubirnunćhu caycälinanpä pampachaycun.
Má,
uyalimay.
Caynümi cayan:
Juc alli cäniyu mandacüshi yanapänincuna mänutacuśhanta mañala.
24 Chayshi imanaculpis mana pägayta atipanan sumä shipuchicüśha mänuyücäta ćhächimun.
25 Chay pägananpä mana illaynin captinshi,
mandacüca:
‘Chayurá quiquintañari,
walmintinta,
chulintinta,
lluy cänintinta ima lanticüluy’ nin.
26 Niptinshi mänuyüca puntanman unꞌulacuycul:
‘¡Taytay,
ama chaynu callaychu!
¡Alcaycallämay-ari!
¡Imanuypapis lluytaćh pägalläśhayqui!’
nicuyan.
27 Niptinshi mandacüca llaquipaycul:
‘Jinaña lluy cachun.
Jawcallaña licuy’ nil pampachaycula.
28 Chaypi yalulcul-pachash paytapis yanapä-masin ashllaylla mänucuśhancäwan tincülun.
Paytash cuncapi chalaculcul:
‘¡Apuray,
canallan illaynïta cutiycachimay!’
nil aysacuyan.
29 Jinacuyaptinshi puntanman unꞌulacuycul:
‘¡Ama chaynu caychu!
¡Alcaycallämay-ari!
¡Imanuypapis lluytaćh cutiycachilläśhayqui!’
nin.
30 Niptinpis payꞌa mana uyalïtucuyculshi päganancama carsilcäman apaycächin.
31 Cay pasaśhanta licä yanapä-masincunash allicta rabyälälil mandacücäman pasaculcäla willaycälimü.
32 Chayshi mandacüca ayalcachimul nila:
‘¡Sumä pasaypi uywaytan caculläñanqui!
Am ruygacamaptiquiñatacmi mänuyquita pampachayculac.
33 Chaychun ampis yanapä-masiquita mana pampachaycunquimanchu cala’ nil.
34 Chayćhu alli-allicta piñacüśha cayalshi mućhuchïcunäpa maquinman jitaycula lluy mänunta cutiycachinancama.
35 Chaynümi janay pachäćhu cä Taytá amcunawanpis lulanꞌa chalapacü-masiquicunacta llapan śhunꞌuyquiwan mana pampachapäcuptiquiꞌa” nila.