Jesusmi laquinacuypi yaćhachin
19
Chaycunacta niyculmi Jesus Galileapïta Jordan mayup chimpanćhu pasalcuyä Judea-läduman licula.
2 Chayman alli-alli nuna atïcunäćhu ishyäcunätam Jesus lluy sänachila.
3 Ñatac chayćhu ishcay-quimsa fariseocunam Jesusta quiquinpa limayllanwan palpachinanpä tapupäcula:
“¿Juc nuna walminwan imallapïtapis laquinacunanpä cäsu canchun?”
nil.
4 Nipäcuptinmi Jesus:
“¿Manachun lïgipäculanqui Diospa isquirbishanćhu ‘Allaycuycäćhu Tayta Dios walmi carilla cananpämá lulala’a nil nishanta?
5 Jinaman jucćhüpis niyantacmi:
‘Chaymi mamanta,
taytanta caćhaycul walminwan jucllaña capäcunꞌa’ nil.
6 Chayurá manañam ishcaychu,
sinuꞌa jucllayllañam.
Chaynu quiquin Dios jucllachäśhancäta nunacunaca manam laquinanchu” nin.
7 Niptinmi fariseocunaca:
“Chayurá ¿imapïtan-nila Moisespa camachicuyninćhu ‘Laquinacuchun juc papilta lulanacuycul’b niyan?”
nin.
8 Niptinmi:
“Awquilluyquicunapïpis pasaypi nuna-cama capäcuptiquim Moises chaynüta isquirbila,
masqui allaycuyninćhu chaynu mana captinpis.
9 Yaꞌañatacmi ichá nipäcuc:
walmin mana mansibacuyaptin yanꞌalpi laquiculcul cuscäcá mansibädumanñamari muyülun.
˻Chaynütac chay jitaśha walmiwan cuscäcäpis mansibädumanñatacmi muyun˼” nin.
10 Chayćhu yaćhapacünincunañatacmi nila:
“Chaynu captinꞌa ¿imapätan chayurá casaracuchwan?
Chaynu lulanantá aśhwanpaćh mana casaraculcanmanchu” nil.
11 Niptinmi:
“Cay yaćhachicuy manam lluypächu,
sinuꞌa quiquin Tayta Dios unanchaycuśhancunallapämi.
12 Chaymi imaymanap mana casaraculcanchu.
Waquinnincunam nasïdunpïña unanchaśha mana casaraculcänanpä.
Waquinnincunam capachicälälisha capäcun.
Waquincunañatacmi Diosllacta sirbiy munayninwan mana imaypis casaraculcanchu.
Caynu cawsayta munäcá chaynu-ari sumäpa cawsapäcuchun” nin.
Jesusmi uchuchäcunäpä mañacun
13 Chaypïtam Jesusman puśhapämula uchuchä chulincunacta,
umanman maquinta ćhulaycul Diosta mañacapunanpä “allin cawsayniyu cachun” nil.
Yaćhapacünincunañatacmi ichá mićhacücuyalcan.
14 Chaymi Jesus:
“Ama mićhacuychu;
jina śhapämuchun.
Cay uchuchäcunanuy cäcunapämi Diospa gubirnunꞌa” nila.
15 Nilculmi uchuchäcunap umanta yataycul Diosta mañacuycul licula.
Sumä cäniyu müsum Jesuswan liman
16 Chaypïtam Jesusman juc aśhuycamul nin:
“Allin yaćhachicü Taytay,
¿imactatan lulalläman wiñay simpri cawsaycäman yaycunäpä?”
nil.
17 Niptinmi Jesus:
“¿Imapïmi ‘allin’ nimanqui yaćhachicülla cayaptiꞌa?
Allincá Diosllam.
Ñatac chay wiñay simpri cawsaycäman ćhayta munalꞌa camachicuymannuy cawsaycuy” nin.
18 Niptinmi müsuca:
“¿Mayannincunamannuy?”
nin.
Niptinmi:
“ ‘Amam nunacta wañuchinquichu,
mansibacunquichu,
suwacunquichu,
casquicunquichu.
19 Jinaman taytayquita mamayquita tuqui allinpa licay,
nuna-masiquitapis quiquiquitanuy cuyacuywan licaycuytac’ nil nishancunämannuy” nin.
20 Niptinmi müsuca:
“Caycunallamannuꞌa uchucllapïmi cawsayculá.
¿Imallá lulaycuná cayanlätan?”
nin.
21 Niptinmi Jesus nila:
“Sumä allin cayta munalꞌa,
lluy ima cäniquitapis lanticulcul llapa wacchacunaman aypuycamuy.
Chayta lulalꞌa janay pachäćhu sumä cäniyümi canqui.
Chaylämi śhamul atimanquiman” nin.
22 Ñatac chay müsu alli cäniyu calmi nishanta uyalïlul sumä llaquisha licula.
23 Chaymi Jesus yaćhapacünincunacta nila:
“Rasunpa,
sumä cäniyu rïcu nuna Diospa gubirnunman yaycunanpä sasa-sasam.
24 Rasunpa Diospa gubirnunman cäniyu nuna yaycunantá aśhwanpa juc camïllu uywapis awjap linlinpa pasälunmanlämi” nil.
25 Niptinmi yaćhapacünincuna licapayllaman camäśha:
“Chaynu captinꞌa ¿mayantá salbacunman?”
ninaculcäla.
26 Nipäcuptinmi Jesus licapaycul:
“Nunacunapá caycuna mana atipänam.
Diospämi ichá imapis atipäna” nila.
27 Niptinmi Pedro:
“Taytay,
Yaꞌacunam ichá lluy imallätapis caćhaycul atiyalcac.
Chayurá ¿imactatan ćhasquiycapäcuśhä?”
nin.
28 Jesusñatacmi:
“Rasunpa,
juc-pun lluy imapis muśhüman ticlacanancäćhu,
yaꞌa Rasun Nunap Chulinca llapa munaynïwan mandacunäpä taycuptïmi,
am atimänïcunapis taycaycälinqui Israelpa ćhunca ishcayniyu aylluncunacta licaycälinayquipä.
29 Chaymi wasintapis,
irmänuncunactapis,
panincunactapis,
mamantapis taytantapis,
chulincunactapis,
ütac ćhaclancunactapis yaꞌa-laycu caćhaycul atimäcunacá,
paćhac cuti mastalämi ćhasquipäcunꞌa.
Jinaman wiñay cawsaymanpis yaycunꞌalätacmi.
30 Canan puntanninćhu cäcunämi ipaćhu licalipäcunꞌa;
ñatac ipaćhu licaśhacunämi puntanninćhu caycälinꞌa.