Lulapacü nunacunamanmi tincuchin
20
“Ñatac Diospa gubirnun caynümi:
jatun ćhaclayu nunash wäla wälalla piyun mincacü lin.
2 Chayshi muyuncäćhu aycacta gänanancäta awninaculcul caćhälun ćhaclanman.
3 Altu inti yapa yaluśhanćhüñatacshi läsaćhu talïlun mana lulayniyu nunacunacta.
4 Chayshi nila:
‘Amcunapis lipäcuy-ari ćhacläćhu lulapämü.
Tincüniquimanćha pägapäcuśhayqui’ nil caćhälun.
5 Chaypïta ćhawpi muyunnuy jinaman yunda pasquicuy üranuy yapa yalul talishancunawanpis chaynüshi lulaycula.
6 Chaypi inti jiꞌalpunayaptin caśhan yalul imapis mana lulayniyu nunacunacta talilculshi nila:
‘Amcuna tucuy anyaśh ¿imapïtan cayćhu tardilpuyalcanqui mana imallactapis lulal?’
nil.
7 “Niptinshi:
‘Manam mayanllanpis mincaycälimanchu’ nipäcun.
Chayshi:
‘Chayurá amcunapis ćhaclätari lipäcuy’ nin.
8 Ñä tutalpuptinshi,
duyñuca yanapäninta nin:
‘Llapan luläcunäta ayalcul pägay.
Ipa yaycamücunäpi allayculmi wälalla yaycamücunaćhu camacanqui’ nil.
9 Chayshi picha tardi üra yaycücunaca puntacta śhapämuptin tucuy anyaśh muyun lulapäcuśhantanuy ćhasquiycälin.
10 Chayshi wälalla yaycücunäñatac ‘Chayurá yaꞌanchictá mastaläćha pägamäśhun’ nil pinsacuyalcan.
Ñatac chaynu tucuy anyaśh lulaśhallanpïshi ćhasquiycälin.
11 Chayshi duyñüta jucmanyälälisha nicuyalcan:
12 ‘Cay tardillaña yaycamul juc üranuylla lulaycaćhaśhanpïchun pasanquiman yaꞌacunactawan iwalta.
Yaꞌacunanüchun ampá tucuy anyaśh süday-süday lupayta pasaśhtin trabajayan imamá’ nil.
13 Niptinshi duyñuca jucninta nila:
‘Śhay,
yaꞌa manamari ingañayacchu.
Limalanchic anyaśh muyun lulaptiqui,
yaꞌapis chaynüta unacpämi.
14 Chayurá päguyquita ćhasquil jawcallaña licuy.
Cay tardillaña yaycamücunätapis amcunactawan iwalta pägaytam muná.
15 ¿Illaynïwan munaśhäta manachun luläman?
¿Icha ćhïnipapämanqui allin nuna caśhäpïchun?’
nilshi nin.
16 Rasunpam nic:
puntanninćhu cäcunämi ipaćhu licalipäcunꞌa;
ñatac ipaćhu licaśhacunämi puntanninćhu caycälinꞌa.
˻Rasunpa achca ayaśhäcunaca cayaptinpis ashllatacmi aclaśhäcunacá cayan˼” nin.
Jesusmi wañuyninpi quimsa cutictaña willacun
17 Ñatac Jesus Jerusalenman liyalmi ćhunca ishcayniyu yaćhapacünincunallacta juc-läduman aśhutyalcachil nila:
18 “Yaćhayalcanquimá canan Jerusalenta lishanchicta.
Chayćhümi puydï sasirdüticunämanwan,
camachicuyta yaćhachicücunäpa maquinman jitaycälimaptin,
yaꞌa Rasun Nunap Chulincäta wañuyman ćhulaycälimanꞌa.
19 Paycunam mana-Israelcunap maquinman ćhulaycälimaptin,
burlapämanꞌa asutipämanꞌa,
jinalcul curuśhman chacatal wañuchipämanꞌapis.
Chaynu jinapämaptinpis quimsa muyunpïtam ichá caśhan śhalcamuśhä” nil.
Juc walmim wawincunapä allincäta mañaycun
20 Chayćhümi Zebedeop walmin chay wawin Jacoboctawan Juanta puśhaculcul Jesusman aśhuycul puntanman unꞌulacuycula “Piñachïniquim śhamulá” nil.
21 Jinaptinmi Jesus:
“¿Imactam munanqui?”
nin.
Niptinmi:
“Cay ishcaynin wawilläta,
gubirnuyquićhu allinninćhüläa taycaycachipallämay” nin.
22 Niptinmi walmip wawincunacta Jesus nila:
“Manamá yaćhapäcunquichu ima mañaculcäśhayquitapis.
¿Yaꞌanuy jucchun llaquicunacta ñacaycunacta pasapäcunquiman ampá?”
nil.
23 Niptinmi:
“Aw,
pasapäcümanmi” nipäcula.
Niptinmi:
“Aw,
rasunpa yaꞌanümá amcunapis pasaytá pasapäcunqui.
Ñatac yaꞌawan cusca täcunanchicpä manam maquïćhüchu.
Quiquin Taytá unanchacuśhancunapämi chayꞌa cayan” nin.
24 Chay ćhunca yaćhapacü-masincunañatacmi cay mañacuyninta uyalïlälil chay ishcaycäpä piñacälälila.
25 Chaymi llapanta ayalcul Jesus nila:
“Yaćhapäcuśhayquinüpis juc nasyuncunaćhu puydï mandacücunaca payllaña sumä yaćhätucüśha nunatucüśham munaśhanta lulachipäcun.
26 Amcunaćhuꞌa chaynu manam canmanchu.
Aśhwanpam pipis puydï cayta munäcá śhullcänuy lluyta sirbiycunman.
27 Chaynütacmi puntaćhu cayta munäcäpis lluypa uywaynin caycunman.
28 Chaypämari yaꞌa Rasun Nunap Chulinca śhamulá:
manam sirbichicunäpächu,
sinuꞌa sirbiycul bïdätapis jinantin nunacunäpi uycul salbaycunäpämi” nin.
Jesusmi ishcay aplacunacta sänachin
29 Chay Jericó malcäpi Jesus yalapäcuptinmi achca nunacuna atipäcula.
30 Chay caminu patanćhüñatacmi ishcay aplacuna täcuyalcäñä.
Chaymi Jesus pasaśhanta tantiälälil ayaycaćhapäcula:
“¡Mandacü Davidpa Caśhtan Caćhamuśhan Salbacü,
Taytalláy!
¡Llaquipaycälillämay-ari!”
nil.
31 Nunacunañatacmi:
“¡Upälla capäcuy!”
nil piñapäcuyalcan.
Chaynu niptinpis aśhwanpalämi masta ayaycaćhacayalcämun:
“¡Mandacü Davidpa Caśhtan Caćhamuśhan Salbacü,
Taytalláy!
¡Llaquipaycälillämay-ari!”
nil.
32 Chaymi Jesus śhaycuycul aplacunäta ayalcul tapula:
“¿Imallactam nipäculanqui?”
nil.
33 Niptinmi aplacunaca:
“Taytay,
ñawilläta quićhaycälillämänayquitam muná” nin.
34 Chaymi Jesus llaquipaycul ñawincunacta yataycula.
Yataycullaptin-pachalla ñawincuna quićhacacüluptinmi Jesusta atipäcula.