Jesusmi Jerusalenman yaycun
21
Chaypïtam Jerusalenman Jesus ñaćhapaycuyalcälaña.
Chaymi Ulibus ulüćhu Betfage malcap sircascanman ćhaycälil,
ishcay yaćhapacünincunacta caćhala cay nil:
2 “Cay chimpa malcallaman lipäcuy.
Chayćhümi juc aśhnu wawintin watalayäta talipämunqui.
Chayta pasquilcul caymanmi puśhapämunqui.
3 Pipis imactapis nipäcuśhuptiquiꞌa:
‘Duyñümi munan.
Ñaꞌascallamanmi cutichipämuśhä’ nil nipäcunqui” nin.
4 Caynu lulala willacü Isaias unay isquirbishanca lulacacünanpämi.
Chayćhümi nin:
5 “Jerusalenćhu chulilläcunactaa willaycäliy:
‘Licapäcuy,
Mandäniqui mana nunatucüśhallam juc malta aśhnullaman sillacuśha śhayämun’ ”b nil.
6 Chaymi chay yaćhapacünincuna pay mandaśhantanülla lulapäcula.
7 Chaymi malta aśhnuchäta mamantinta puśhalcul müdanancunawan carunalcäliptin Jesus sillacula.
8 Chay achca-achca nunacuna atipäcuśhancunapïmi waquinnincuná catacunta lluśhtilcälil lishan caminuman alawayninwan maśhtapäcula.
Waquinnincunañatacmi palmïra jaćhap pallaynincunacta cuchulcul maśhtapäcula.
9 Chay ipanta puntanta lï nunacunämi bïbaśhtin alawapäcula:
“¡Cawsachun Davidpa caśhtan śhamüca!
¡Cawsachun Diosninchicpa pudirninca!
¡Cawsachun imaycamapis!”
nil.
10 Chaynu jinaśhtin Jerusalenman yaycüluptinmi llapa nunacunaca tapunacücuyalcan:
“¿Pitan cay nunaca?”
nil.
11 Nipäcuptinmi:
“¡Jesusmari!
¡Galileap Nazaret malcanpi Diospa willacünincämá!”
nin.
Diospa wasinćhu lanticücunäta Jesusmi alapacun
12 Chaypïmi Jesus Diospa chuya wasinpa patyunman yaycul lantinacuyalcäcunacta talïlun.
Chaymi illaywan cambiäcunap mïsancunactapis paluma lanticücunap täcunancunactapis ticlaypa-pawalcul waśhaman lluyta alapacämun.c
13 Jinalculmi nila:
“Diospa shiminćhümi ‘Yaꞌap wasí canꞌa yaꞌallawan limana wasim’d nil niyan.
¡Chaychun amcuna suwacunap maćhayninman muyülälichinquiman!”
nil.
14 Chayćhümi aplacuna wishtucuna Jesusman aśhuycäliptin lluy sänachila.
15 Chay patyućhu lluy walaśhchacunapis ayaycaćhaypanuy “Mandacü Davidpa chulin altuman juluśha cachun” nipäcula.
Ñatac puydï sasirdüticunäwan,
camachicuyta yaćhachicücunaca caycunacta uyalilmi,
jinaman ishyäcunätapis sänachishanta licalmi śhunꞌunpis sumä-sumäta timpucuyan.
16 Chaymi Jesusta nipäcula:
“Uchuchäcunaca äśhaycaćhapäcuśhanta ¿manachun uyalinqui imatá?”
nil.
Niptinmi:
“Aw,
uyaliyämari.
¿Manachun caycuna pasananpïta lïgipäculanqui Diospa shiminćhu ima nishantapis?
Chayćhümi:
‘Amꞌa alawäśha canqui ñuñuyä uchuchäcunap shiminwanmi’ nilmi niyan” nila.
17 Nilculmi chay nunacunäta caćhaycul Betania malcäta licula chay tuta quïdacunanpä.
Jesusmi mana wayuyniyu lantacta chaquïchin
18 Chay wäla aspi-aspilla Jerusalenman cutiyämuptinmi Jesusta micanälun.
19 Chaymi caminu-lädunćhu ïgus lantacta licälul aśhuycuptin nï licachipäpis ćhulañächu.
Chaymi chay ïgusta nila:
“Cananpïtá pasaypi manañam wayunquichu” nil.
Nilcuptin-pachallam chay lantaca lluy chaquïla.
20 Chaynu lulacäśhanta licalculmi yaćhapacünincuna licapayllaman camäśha Jesusta tapupäcula:
“¿Imapïtan cay lantaca juclla chaquïlun?”
nil.
21 Niptinmi nila:
“Rasunpa mana ishcayyällal Diosman chalapaculcaptiquiꞌa,
manam cay lantawan lulaśhäcunällachu lulaśha canman.
Sinuꞌa cay ulüta ‘Caypi aśhucuy lamar ćhawpiman’ nipäcuptiquipis,
nishayquimannümi lulaśha canꞌa.
22 Chaynümi Diosman sumäpa chalapacul mañaculꞌa,
llapa mañacuśhayquita ćhasquipäcunqui” nil.
Jesuspa munayninpïmi tapućhacücuyalcan
23 Chaypi Diospa chuya wasinman ćhaycul Jesus yaćhayächiptinmi,
puydï sasirdüticunäwan,
prinsipal yaśhacuna aśhuycälil nipäcula:
“¡¿Mayantucultá cayćhu lulaycaćhayanqui?!
¡¿Mayantá cayta lulanayquipä ćhulaśhulanqui?!”
nil.
24-25 Niptinmi nila:
“Má,
yaꞌactapis nipämay:
Juan bawtisananpä ¿pitan caćhamula?
¿Dioschun icha nunacunällachun?
Niycälimaptiquiꞌa yaꞌapis nishayquim mayanpa mandacuyninwan cayta lulaśhätapis” nil.
Chaynu niptinmi quiquin-pula ninacücuyalcan:
“ ‘Diosmi caćhamula’ niptinchicꞌa ‘¿Imapïtan-nila mana chalapaculcälanquichu?’
nilćha nimäśhun.
26 ‘Nunallam’ niptinchicꞌa,
cayćhu cä nunacunäćha sumä imactapis lulämachwan Juanta Diospa willacüninpälä licayalcalꞌa” nin.
27 Chaynu ninaculculmi:
“Manam yaćhapäcüchu,
taytay” nin.
Niptinmi Jesuspis:
“Chayurá yaꞌapis manam mayan caćhamäśhantapis willapäcuśhayquichu.
Ishcay chulicunamanmi tincuchin
28 “Má ¿imanipäcunquitan?
Juc nunash ishcay chuliyu cala.
Chay jucnin chulinta ayalculshi ‘Cananꞌa ćhaclanchictari liy lulamunayquipä’ nin.
29 Niptinshi chulin:
‘Yaꞌa manam lïmanchu’ nila.
Nilcuśhanpïshi allinta tantiapaculcul awnil licula.
30 Chaynütacshi chay juc chulintapis nimula linanpä.
Chayñatacshi:
‘Ari papay,
canallanmi lishä’ nila.
Chaynu nilculpis manash liñächu.
31 Chayurá taytan munaśhantanuy ¿mayannintan lulala?”
nin.
Niptinmi sasirdüticunaca:
“Punta nishan chulinmi” nipäcula.
Niptinmi Jesus:
“Rasunpa,
chay ipanchä alcabäla mañäcunäwan jucnin jucnin umricunawan cacü walmicunämi Diospa gubirnunman amcunapïpis puntacta yaycapäcunꞌa.
32 Chay Bawtisä Juan śhamulmi yaćhachipäcuśhulanqui Diospa munaśhanmannuy imanuypa cawsapäcunayquipäpis.
Chaynu willayalcäśhuptiquipis amcuna manam chalapaculcälanquichu.
Chay alcabäla mañäcunäwan,
chaynu anla walmicunämi ichá chalapaculcäla.
Amcunañatac masqui caycunacta ñawiquiwan licayalcalpis mana chalapaculcälanquichu,
nïtac lulayniquicunapïpis wanaculcälanquichu.
Mana allin lulapacücunamanmi tincuchin
33 “Uyalipämay caytapis:
Juc alli cäniyu nunash cala jatun ćhaclayu.
Paymi chay ćhaclanćhu übacta plantalcul manyanta lluy inćhäla.
Chayshi übacta apchichinanpä juc püsucta lulala,
chaynütac täpachinanpäpis chucllachäla.
Caynu lluy listucta lulalculshi nunacunaman partïdae uycul calu malcacta licula.
34 Ñä cusicha timpu ćhämuptinshi,
nunancunacta caćhamula partinta cusichananpä.
35 Ćhäläliptinñatacshi chay nunacunaca lluy chalalcälil,
waquintá maꞌalälila,
waquintá wañülächila,
waquinnintañatac lumiwan tamshälälila.
36 Chaynu jinämuptinshi chay duyñuca mas achcactaña caćhala.
Jinaptinpis chay nunancunaca chaynüllash paycunactapis lulälälila.
37 Chayshi ‘Chulïtañari caćhaśhä;
paytá allinpaćh licapäcunꞌa’ nil caćhala.
38 Chay ćhämuptinshi,
partïdaśhan nunacunaca limanacucuyalcan:
‘Cay chulinpäćhá caycuna quïdanꞌa.
Wañüchishun cay tücänin yaꞌanchicwan quïdananpä’ nil.
39 Chayshi duyñup chulinta chalalcälil,
ćhaclanpi waśhaman aysalcälil chayćhu wañuchipäcula.
40 Jinäläliptin ¿má,
imananꞌatan chay ćhaclap duyñun?”
nil tapula.
41 Niptinmi:
“Mana uchucllapis llaquipayculćha chay pasaypi nunacunäta lluy wañüchinꞌa.
Jinalculćha juc allinnin nunaman uycunꞌa,
pay imaypis partinta uycunanpä” nipäcula.
42 Nipäcuptinmi Jesus:
“Amcuna ¿manachun uchucllapis lïgipäculanqui Diospa limayninćhu limaśhanta:
‘Wasi luläcuna jalutacuśhan lumim mas allin puydï chaläninmanlä muyüla.
Chay quiquin Tayta Dios lulaśhanpïmi licapayllaman camaśha cayalcá’f nil?
43 “Chaymi Tayta Dios gubirnunćhu caycälinayquita amcunapi ućhilcul juc allin milachïcunäman uycunꞌa.
44 Ñatac pipis chay lumiman ćhäcá,
quićhacacülunꞌam.
Ñatac chay lumica mayanpa janäninmanpis ćhaptinꞌa lluymi ñutucacülunꞌa” nin.