Jesusmi Jerusalenman yaycun
11
Chaypïta Jerusalenman ñaćhapaycuyalcal,
Ulibus nishan ulućhu Betfageman Betania malcaman ćhälälilmi ishcaynin yaćhapacüninta caćhäla:
San Marcos 11.1-18
2 “Cay chimpa malcaman yaycapäculmi mana mayanpis sillaśhan malta aśhnu watalayäta talipäcunqui.
Chayta pasquilcul aysapämuy.
3 Mayanpis ‘¿imapämi pasquiyanqui?’
nipäcuśhuptiquiꞌa ‘Duyñümi munan;
ñaꞌascallamanmi cutichimuśhä’ nipäcunqui” nin.
4 Chaynu lipäculshi nishantanülla wasip puncun caminućhu watalayäta talïlälin.
5 Chayćhu pasquiyalcaptinshi licä nunacunaca:
“¿Imapätan pasquiyalcanqui?”
nin.
6 Chaymi Jesus nishantanülla nipäcuptin awnil pasquichipäcula.
7 Chaypi puśhalcamul müdanancunawan carunäläliptinmi Jesus sillacula.
8 Chay caminu lishancämanmi achca nunacuna alawayninwan catacuncunacta maśhtapäcula.
Juccunañatacmi palmïra jaćhap pallaynincunacta cuchulcul caminuman maśhtapäcula.
9 Chay ipanta puntanta lï nunacunämi bïbaśhtin alawapäcula:
“¡Cawsachun Diosninchicpa pudirninca!
10 ¡David timpumannuy malcanchicta śhalcachïca alawaśha cachun!
¡Cawsachun imaycamapis!”
nil.
11 Ñä Jerusalenman Jesus ćhälulmi Diospa chuya wasinman watucuycü yaycula.
Aspicalpuyaptinñatacmi yaćhapäcünincunawan Betania malcaman cuticulcäla.
Jesusmi ïgus lantacta manaña wayunanpä nin
12 Chay walantin Betania malcapi cutiyämuptinmi Jesusta micanälun.
13 Chay caluscaćhülä juc ïgus lanta tutap-tutal birdiyäta licälulmi “wayuyanñapisćha” nil liptin licachipäpis nï wayuñächu.
Manalämari timpunćhüchu cañä.
14 Chaymi lantäta:
“¡Cananpïtá manaña wayuptiquim mayanpis nï micalcälinꞌañachu!”
nin.
Chay nishantam yaćhapacünincuna uyalïlälila.
Diospa chuya wasinćhu llapa lanticücunäta Jesusmi alapacun
15 Chaypi Jerusalenta ćhälulmi,
Jesus Diospa chuya wasinpa patyunman yaycul lantinacuyalcäcunacta talïlun.
Chaymi illaywan cambiäcunap mïsancunactapis paluma lanticücunap täcunancunactapis ticlaypa-pawalcul waśhaman lluyta alapacämun.
16 Jinalculmi manaña cunsintilañachu lanticuynincunawan pasaycaćhapäcunallantapis.
17 Chayćhümi yaćhachila:
“¿Manachun Diospa shiminćhu ‘Yaꞌap wasí jinantin nunacuna yaꞌallawan limanan wasim canꞌa’a nil niyan?
¡Chaychun amcuna suwacunap maćhayninman muyulächinquiman!”b
nil.
18 Chay yaćhachishanpi nunacunaca mishqui-mishquictam uyalipäcula.
Puydï sasirdüticunäwan camachicuyta yaćhachicücunäñatacmi ichá manchalipäcula.
Chaymi imanuypa wañuchiytapis ashipäcula.
19 Ñatac tutalpüluptinmi chay malcapïta Jesus yaćhapacünincunawan liculcäla.
San Marcos 11.19-33
Chay millapäśhan ïgus lantam chaquin
20 Chay walantin chaypa caśhan pasapäcunanpämi ïgus lanta sapipi lluy chaquisha cayäñä.
21 Chayta licälulmi Pedro yalpalcul Jesusta nila:
“¡Yaćhachicü taytáy,
licay,
cay piñapäśhayqui ïguscá lluy chaquïñä!”
nil.
22 Niptinmi:
“Tayta Diosman chalapacuy jinalla.
23 Mana ishcayyällal śhunꞌuyquićhu ‘Lulacaśham canꞌa’ nil chalapacuptiquiꞌa rasunpa lulaśham canꞌa;
aśhta ulüta ‘Caypi aśhucuy lamar ćhawpiman’ niptiquipis aśhunmanmi.
24 Chaymi rasunpa sumäpa chalapacul mañacuptiquiꞌa chaymannuy ćhasquiycunqui.
25 Jinamanꞌa chay mañacuśhayquićhu pampachaycunayqui captinꞌa pampachaycuy,
janay pachäćhu cä Taytayqui amcunactapis pampachaycälishunayquipä.
26 Mana pampachapäcuptiquiꞌa manatacmari pampachapäcuśhunquitacchu” nin.
Jesuspa munayninpïmi ishcayyapäcun
27 Chaypi Jerusalenman ćhälälimulmi Diospa chuya wasinpa patyunćhu Jesus puliyäla.
Jinaptinmi puydï sasirdüticunäwan,
camachicuyta yaćhachicücunaca,
prinsipal yaśhacunawan aśhuycälimula.
28 Chayćhümi:
“¡¿Mayantucultá cayćhu lulaycaćhayanqui?
¿Mayantá cayta lulanayquipä ćhulaśhulanqui?!”
nipäcula.
29-30 Niptinmi Jesus:
“Má,
yaꞌactapis nipämay:
Juan bawtisananpä ¿pitan caćhamula?
¿Dioschun icha nunacunällachun?
Niycälimaptiquiꞌa yaꞌapis nishayquim mayanpa mandacuyninwan cayta lulaśhätapis” nil.
31 Niptinmi quiquin-pula ninacücuyalcan:
“ ‘Dios caćhamula’ niptinchicꞌa ‘¿Imapïtan-nila mana chalapaculcälanquichu?’
nilćha nimäśhun.
32 ‘Nunallam’ niptinchicꞌa cay nunacunaca imanämachwanćha,
Bawtisä Juanta Diospa rasun willacüninpa licayalcalꞌa” nil.
33 Chaynu ninaculculmi:
“Manam yaćhapäcüchu,
taytay” nin.
Niptinmi Jesuspis:
“Chayurá yaꞌapis manam mayan caćhamäśhantapis willapäcuśhayquichu” nin.