Janay pachäpämi fisyunllan nuna caycuna
16
Chaynütacmi Jesus tincuchiypa willala jucta:
“Juc alli cäniyu nunapshi juc sumä cunfiansa nunan cala.
Payshi lluy cänincunapi incargädu cala.
Chaynu cayalshi pay munaśhanta lulacuñä.
Jinaptinshi nunacunaca:
‘Cay cunfiansa nunayqui munaśhanta lulaśhuśhayquitapis manamá yaćhanquichu’ nila.
2 “Nipäcuptinshi ayalcul:
‘¿Imapïtan lluypis caynu niyalcäśhunquiman?
Má,
cananmi lluy papilcäta licachimänayquita muná.
Cananꞌa cay lulayniquipi yalunquiñam’ nila.
Lucas 16.1-31
3 “Niptinshi chay nunaca pinsan:
‘¿Canan imactaćh lulaśhä caynu patrunní wicapämaptin?
Ćhaclaćhu lulapacunäpá manam callpäpis canñachu;
limuśhnacuytá pinꞌacullätacmi’ nil.
4 Nilculshi pinsälun:
‘Ä,
caytari luläśhä caypi alümaptin lisinacuśhäcuna wasinćhu uywaycamänanpä’ nil.
5 “Nilculshi patrunninta mänucüśhan nunacunäta ayächin.
Punta ćhämücätash tapula:
‘¿Aycactatan patrunnïta mänutacüśha cayanqui?’
nil.
6 “Niptinshi:
‘Paćhac barril asaytictam dïbiyällá’ nin.
Niptinshi:
‘Ama llaquicuychu.
Canan chay punta papilta laćhyalcul apuraypa juc muśhü papilta luläśhun picha ćhunca dïbishallayquipïña’ nila.
7 “Chayta lulalculshi chay ipa ćhämücätapis tapula:
‘¿Amꞌa aycactam mänutacüśha cayanqui?’
nil.
“Niptinshi:
‘Ishcay paćhac tirsu trïguctam dïbicuyällá’ nila.
“Niptinshi paytapis lulächin paćhac ćhawpin tirsucunallapäña.
8 “Chaynu nunan lulaśhanta yaćhälulshi patrunca nila:
‘Cay nunap uman cacullanmi chayta lulananpä’ nil.
“Aw,
rasunpa cay pachäpä nunacunaca mas fisyunllanmi cacullan acchïćhu cä nunacunapïtá.
Chaymi paycuna mastá śhamü bïdancunaćhu cawsapäcunanpä siguracuyta yaćhapäcun.
9 Chaynu-ari amcunapis fisyunllan nuna capäcuy.
Jinal cay cawsayniquićhu afanaculcay imallayquiwanpis janay pachäpä sirbishunayquipä.
Masqui cay pachäćhu mana cäman muyuchipuśhuptiquipis wicćhuꞌa tuquip ćhasquisham canqui.
10 “Rasunpa,
caynu ashcunallaćhu chalapacuna nunacá achcaćhüpis chalapacunam canꞌa.
Cay ashllaćhüpis mana chalapacunacá piyurćha canman achcawanꞌa.
11 Cay pachäćhu cäcällamanpis mana chalapacuna cayalcaptiquiꞌa ¿pitan cunfiacuśhunquiman sumä imapis cäcätá?
12 Mana caynu nunap imallantapis mana sumä cuydayalcaptiquiꞌa ¿pitan ampá cunfiansanwan uycuśhunquiman tücäniquitapis?
13 “Chayurá śhunꞌuyquita tapucuy mayanninta atinayquipäpis.
Manam pï sirbipacüpis ishcay patruntá sirbinmanchu.
Juccätam ćhïninman,
juccätam cuyanman;
juccätam jamuyanman,
juccätam wätanman.
Chaynütacmi amcunapis nï Diostawan cäniquitá jucllaćhu sirbinquimanchu” nila.
Dios yaćhanmi nunap śhunꞌunćhu ima pinsaśhantapis
14 Cay nishanta fariseocunaca uyalipäculmi illayta lägacuyalpis Jesusta asipapäcula.
15 Chaymi Jesus:
“Amcuna allin nunanülämá pasachiculcäñanqui caycunacta lulayalcalpis.
Masqui chaynu jinapäcuptiquipis Diosꞌa yaćhanmi śhunꞌuyquićhu imacta pinsaśhayquitapis.
Nunacunaca ama-pacha nipäcuśhantamari Diosꞌa millachicuypä lican.
16 “Canan,
má,
Moiseswan,
Diospa willacünincuna yaćhachishanca alli callpayümi cala Bawtisä Juan Diosman filtananpä willacuśhancäcamá.
Chay pachapïmi lluy nunapis imanuypañapis Diospa gubirnunman yaycuyta munayalcan.
17 [Masqui chaynu captinpis manam ‘Camachicuypa yaćhachicuynin mïnusyälunñam’ niyächu.]
Aśhwanpa,
sïluca allpaca caśhancamá,
camachicuycäpi manam juc litrallapis,
nï uchuc unanchaycuśhallapis chincachishachu canꞌa.
18 “Chayurá walminwan laquinaculcul jucwan cuscäcá mansibacuyanmi.
Chay jitaśha walmiwan cuscäcäpis mansibacuyantacmi” nila.
Jesusmi willan juc cäniyüpïtawan Lazaro śhutiyu wacchapïta
19 Nilculmi juctapis willala cay nil:
“Juc nunash cäniyu cäniyu rïcu cacula.
Chayshi sumä allica fïnunnin müdanacunallawan müdacula.
Chaynu cayalshi muyun-muyunpis allicá cumbidullacta lulachil micucula.
20 Ñatac chayćhüshi intiru aychanpïpis matiryälla wiꞌimuśhtin Lazaro śhutiyu nuna cala.
Payshi walan-walan chay rïcup wasinpa puncullanćhu jitaläcula.
21 Chayćhüshi allucunäpis lläwala.
Chaynu jitalayalshi munapäla:
‘Cay rïcup mïsanpi usücällapis imanuypalä shimïćhu licalinman’ nil.
22 “Chaypïtash juc-punćhuꞌa wañucullan.
Chayshi Diospa anjilnincuna paypa almanta puśhacula luryaman unay awilunchic Abrahamwan cusca cananpä.
Chay jinamanshi rïcupis wañucuntac.
Jinaptinshi lluy pampälälin.
23 Chay rïcu nunaca nina waläcäćhu ñacayalshi altucta licalcuśhanćhu Lazarocta licälun Abrahampa millayninćhu cayäta.
24 Chayćhu licalculshi ayaycaćhacuyan:
‘¡Tayta Abraham,
llaquipaycallämay-ari!
Caćhamullay Lazarocta-ari dïdu puntallanwanpis yacullacta śhutuycachimumänanpä.
¡Ay,
cay acachäcuy imañaćh cacullanpis isisí!’
nil.
25 “Niptinshi Abraham nimula:
‘Yalpaćhacuy ïju,
cawsayniquićhu imapïpis altullamá caculanqui imayquipis junta.
Lazaroꞌa manam chaynüchu cala.
Canan paymi cayćhu juc allin bïdacta talin.
Amñatacmi mana allin bïdacta pasayanqui.
26 Jinamanꞌa maynu munalpis chay caśhayquimanꞌa manam mayanpis chimpamunmanchu,
sumä-sumä wayu japächayämaptinchicꞌa.
Chaynütacmi nï chaypïpis cayman pasamunmantacchu’ nil.
27-28 “Niptinshi:
‘Chayurá tayta Abraham,
Lazarocta caćhallay papänïpa wasinta linanpä chayćhu picha irmänücunacta cay ñacaynïpi willaycunanpä.
Paycuna cay yaꞌa ñacaśhäcäman śhamunanta manam munächu’ nila.
29 “Niptinshi:
‘Moiseswan willacünincuna isquirbishancuna maquinćhu cayanmi.
Chayćhu limaśhantari lluy cäsucul lulachun’ nila.
30 “Niptinshi nila:
‘Manam,
tayta Abraham,
pïllapis wañuśhanpi cawsalcul liptinlämi sigürupis mana allin lulaynincunacta caćhaycunman.
Jinallá manam cäsuculcanmanchu’ nil.
31 “Niptinshi:
‘¿Paycunactapis mana cäsucuyal-lächun-ari ampá wañücuna śhalcul liptinpis quiriycuyalcanman?’
nin” nila.