Jesuspa yaćhapacünincunapïta Juanmi “cuyaśha yaćhapacü” nicü cala. Paymi tuquicta licala uyalila Jesus imacunacta yaćhachishantapis, milagrucunacta lulaśhantapis. Waquincunam nipäcun juc isquirbishancunäpi achca watactalä cay libru isquirbisha caśhanta. Juccunäćhu mana cäcunätam cayćhu willaycamanchic. Cayćhümi Jesus niyan: “Yaꞌam cawsay tantaca; yaꞌam tutapäcäpa acchin; yaꞌam puncuca; yaꞌam allin rasun michïca; yaꞌam rasun caminuca cawsachimücäpis; yaꞌam rasun üba plantaca cayá” nil.

Juan munala llapa nuna Jesusta tuquicta lisiycul chalapaculcaptin wiñay allin cawsayniyu canantam. Chaymari cay librućhu nimanchic “Caycunactam ichá isquirbilá Jesusninchic Aclacuśhanca, Diospa Caćhamuśhan Chulinca caśhanta tantianayquipä. Jinal ćhasquicücunaca wiñay cawsayniyu capäcunayquipä” nil.