Cay libructa isquirbila Jesusman chalapacü Lucasmi. Paymi Pablocta puliwshila allin willacuycäta mayćhu chayćhüpis willacuśhtin yaćhachishtin. Cayćhümi willamanchic Jesus janay pachäta cuticuptin Chuya Ispiritunta caćhamuśhanta. Chaymi Jesuspa caćhancuna sumä munayniyu licalilcul milagrucunactapis lulapäcula. Jinalmi sumä callpawan Jesuspi willacuyta mayćhüpis allacaycapäcula. Manatacmi jawca cawsayllaćhu cacula, sinuꞌa imaymana sasachacuycunam śhalcamula. Chaymi chalapacücunäta carsilcunaman wićhala, tamshaycunap wañuchila. Chaynu cayaptinpis chalapacücunacá aśhwanpa mas callpawanmi mayta chayta lipäcuśhanćhüpis allin willacuycäpi willaculcäla. Chaymi manaña Israel caśhtacunallamanñachu willaculcäla, sinuꞌa aśhta juc caśhtacunamanpis ćhächipäculam. Chaynüpam allin willacuyta lluy ćhasquïcunaca juc caśhtallamanña muyupäcula. Cayćhu chalapacü puydï Diospa caćhan Pablom lluy juc nasyuncunamanpis cay allin willacuyta mastá ćhächila.