Siñalcunapïmi wañupaculcan
16
Chaymanmi fariseocunäwan saduseocunaca ćhaycälimul yaćhapänan-laycu Jesusta:
“Má,
altu sïlupi ima siñalllactapis licaycälichipämay” nipäcun.
2 Niptinmi Jesus:
“Siñal siñal niyämanquim.
Inti jiꞌalpunan üra antawchäa siñal captinmi usyamunanta tantiapäcunqui.
3 Ñatac wälanpa pucutay yanalpamuy siñal captinꞌa tamyamunantam tantiapäcunqui.
¡Ishcay cära nunacuna!
¡Janay pachäćhu siñalcunäta tantiayalcal-lächun canpis,
quiquiquicunallaćhu ima pasaśhan siñaltapis mana tantiapäcunquimanchu!
4 Tayta Diosta ipanchä pasaypi cullu linlicuna,
¿imallactapis licaycuypïchun wañupacuyalcanquiman?
Cananꞌa Diospa willacünin Jonaspa siñal pasaśhallantam licaycälinqui” nin.
Nilculmi chayćhu lluy caćhaycul licula.
Fariseocunap yaćhachicuyninpi cuydaculcay
5 Chaypïtam Jesuspa yaćhapacünincuna chay ućhap chimpanman ćhälälil tantacta unꞌälälimuśhanta yalpäläliña.
6 Chayürallatacmi Jesus nila:
“¡Yanꞌal-lätac fariseocunap,
saduseocunap libadüra imanta ćhasquïlälinquiman!”
nil.
7 Niptinmi quiquin-pula:
“Caynu niyämanchic tantanchicta unꞌamuptinchicćhá” ninaculcäla.
8 Chay ninaculcäśhanta Jesus tantialmi:
“¿Imapïtá micuyllapi llaquicuyal piñanacuyalcanqui?
¡Ima-nilä mana chalapacuyniyütan capäcunqui!
9 Chaycunallapïtá ¿manachun yalpapäcunqui picha walanga wayapacunacta picha tantallawan camachiptí,
ayca canaśhta junta puchuśhantapis?
10 ¿Unꞌälälinquiñatacchun anćhish tantallapi tawa walanga nunacunaman aypuchiptí ayca canaśhta junta puchüninta juntupäcuśhayquitapis?
11 ¿Chaychun patallanchicman winaycuypi mana limaśhäta nï tantiapäcunquimanchu ampá?
Aśhwanpa chay fariseocuna saduseocuna umayquiman winaycälichishuśhayquipïtamá niyá” nila.
12 Niptinlämi micuna tantallapi mana limaśhanta tantiälälila sinuꞌa fariseocunap saduseocunap yaćhachicuyninpi anyaśhanta.
Diospa Caćhamuśhan Salbacüca Jesus caśhantam Pedro tantian
13 Chaypi Cesarea Filipos-läducunaman ćhälälilmi Jesus yaćhapacünincunacta tapula:
“Juccunaca yaꞌa Rasun Nunap Chulinta ¿mayan nipämantan?”
nil.
14 Niptinmi:
“Waquinnincuná:
‘Bawtisä Juanćha śhalcämun’;
waquinnincunañatac:
‘Diospa unay willacünin Eliasćha cutïmun’;
juccunañatac:
‘Jeremiasćha ütac Diospa jucnin unay willacüninpisćha cawsämun’ niyalcäśhunquim” nipäcula.
15 Jesusñatacmi:
“Amcunapïtá ¿pitan chayurá yaꞌa cayá?”
nila.
16 Niptinmi Simon Pedro nila:
“Amꞌa cayanqui Caćhamuśhan Salbacüca,
Cawsä Diospa Chulinmi” nil.
17 Niptinmi:
“¡Am Jonaspa chulin Simontañatacmi Dios allinpa licaycuśhunqui!
Caynu niycachishunqui janay pachäćhu quiquin Taytämi;
manamá aychayu tulluyu nunallapïchu.
18 Amtacmi Pedro canqui.
(‘Pedro’ ninanꞌa ‘wanca’ ninanmi.)
Chayurá cay lumïwanmi atïnïcunacta śhalcachishä,
ñatac paycunawan infirnup munaynin manam tacyaycälinꞌachu.
19 Ñatac janay pacha gubirnüćhu anmanmi pudirnïta uycuśhayqui.
Chaymi cay pachäćhu awnishayquitapis mana awnishayquitapis janay pachäćhu quiquin Tayta Dios awnilpunꞌa” nin.
20 Nilculmi yaćhapacünincunacta:
“Mayan caśhätapis amam mayanćhüpis limalcälinquichu” nila.
Jesusmi wañuyninpi willacun
21 Chay-pachapïmi yaćhapacünincunacta Jesus willapäla:
“Jerusalenta linämi.
Chayćhu prinsipal yaśhacunam,
puydï sasirdüticunam,
llapa camachicuyta yaćhachicücunam yaꞌacta sumä-sumä ñacachipämal wañuchipämanꞌa.
Jinaptinpis quimsa muyunpïtam caśhan śhalcamuśhä” nil.
22 Niptinmi Pedro japächalcul Jesusta awnichiyninwan piñapäcuyan:
“¡Taytay,
Dios ama munachunchu chaynu pasananta!
¡Amtá manam imapis pasaśhunayquichu!”
nil.
23 Niptinmi Jesus muyulculꞌa nin:
“¡Ñawïpïta chincay,
Satanaśh!
¡Iridaycaćhamanquim!b
¡Ampa umayquiꞌa nunap lulayllanćhümi cayan,
manam Diospa lulaynincunaćhüchu!”
nil.
24 Nilculmi Jesus llapa yaćhapacünincunacta nila:
“Rasunpa mayanpis yaꞌap laśhćhüman jalumuyta munäcá quiquinta unꞌacuycul jalumuchun ima pasaptinpis wañunancama.
25 Ñatac cawsayninta ama-pacha nïcá cawsaynintam apacunꞌa.
Yaꞌa-laycu bïdantapis uycücämi ichá cawsaycunꞌa.
26 ¿Imapäćha bälinman jinantin pachäta uywayalcaptiquipis,
wiñay cawsayniqui chincäluptinꞌa?
¡¿Almayquipïtá imalämá mas ćhaniyu canmanpis?!
27 Yaćhapäcuy;
Taytäpa pudirninwan llapa anjilnincunawan juc-pun yaꞌa Rasun Nunap Chulinca śhamulmi lluy nunacta lulaśhanman tincüta licaycuśhä.
28 Rasunpa,
waquinniquicuná manalämi wañupäcunquilächu gubirnanäpä śhamuśhäta manalä licaycälilꞌa” nil.