Licaculcay fariseocunap libadüranpïta
12
Chaypïtam nisyu-nisyu nunacuna juntunacälälimula aśhta quiquin-pula jalutanaculcänancama.
Chayćhümi yaćhapacünincunacta Jesus nila:
“¡Yanꞌal-lätac chay ishcay cära fariseocunäpa libadüra imanpïta!
2 Ima pacaläcäpis camalaycunꞌamari.
Pacaśhacunaca lluymi licaycachisha canꞌa.
Lucas 12.1-59
3 Chaynütacmi amcuna pacallap ima nishayquicunapis lluy camalaśha canꞌa.
Ñatac linlillayquićhu uyalishayquipis wasi jananpi ayaycaćhayänümi willacuśha canꞌa.
Diosllanchicta manchaculcay
4 “Chayurá cuyaśhäcuna,
cay janä aychallanchicta wañuchïcätá ama manchaculcaychu;
wañulcachil mastá maytañam wañuchinman.
5 Aśhwanpa Diosllanchicta manchaculcay.
Payllamá wañulcachil almayquita nina waläcäman jitaycunanpä munayniyüca.
Rasunpa,
pay puydïcällactam manchaculcanquimanꞌa.
6 “¿Manachun picha pishucunacta ashllay ćhaniyüllawan lantinchic?
Chaynu cayaptinpis manamari jucllayllanpis Tayta Diospá unꞌaycuśhachu.
7 Chaymi aśhta ächayquipis yaćhaśha cayan ayca caśhanpis.
¿Chaychun amcunacta unꞌälälishunquiman,
imamá?
Chayurá manam imapi manchaculcänayqui canchu.
Pishucunapïtapis mas ćhaniyülämá cayalcanqui.
8 “Chaymari cayćhu ‘Pay caśhtam cá’ nil nunacunäćhu nimäcätá,
janay pachäćhu Diospa anjilnincunap ñawpäninćhu yaꞌa Rasun Nunap Chulincäpis ‘Yaꞌa caśhtam payꞌa’ nishä.
9 Ñatac ‘Manam lisïchu’ nimäcätam ichá,
yaꞌapis Tayta Diospa anjilnincunap ñawpäninćhu ‘Paytá manam lisïchu’ nishä.
10 Masqui Rasun Nunap Chulincäta jalutacamaptiquipis Tayta Dios pampachaycuśhunquimanmi.
Chuya Ispiritucta chaynu jalutacuptiquim ichá nï pampachaycuśhunquimanñachu.
11 “Ñatac amcunacta malcacunap gubirnäcunap juntunacücunap puydïninpa maquinman ćhächipäcuśhuptiqui,
ama llaquiculcaychu ‘canan ¿imactatan limalicuśhä?’
nil.
12 Chay üram Diospa Ispiritun yaćhayta uśhunqui,
imacta limalicunayquipäpis” nil.
Cäninman mana chalapacunanpämi yaćhachin
13 Chay achca nunacunapïtam juc nuna Jesusta nïmula:
“Taytay,
mayurnïtari papänïpa tücäninta partiycamänanpä niycapämay” nil.
14 Niptinmi:
“Caynu nimänayquipä ¿pitan yaꞌacta albasyayquipä ćhulacamäla?”
nila.
15 Chaynu nilculmi llapantapis nila:
“Imapïpis wañuyäcuna,
yanꞌal-lätac cay munaśhayquiwan gänachicuyalcanquiman.
Masqui maynuy imayqui calpis manam tuqui cawsayta uśhunquichu” nil.
16 Chay nilculmi juc nunawan tinculcachil nila:
“Má,
juc nunapshi talpucuynin sumä-sumä ishpïñä.
17 Chayshi pinsäla:
‘Canan ¿imanäśhätan caynüpa micuyní ishpïluptin?
Manam mayman pilwaycunäpäpis jäcunñachu’ nila.
18 Nilculshi pinsälun:
‘Mïjur-ari,
rüjïcunacta jatunyächishä chayman lluy pilwacunäpä.
19 Chayćha jitalällal micucunäpä upyacunäpä capamanꞌa.
Yaꞌap bïdanuꞌa pip bïdantá canman’ nilshi micuyninman atinïdu alawacula.
20 Chayshi Dios nila:
‘Luclu nuna,
canan tutam wañunqui.
Chayurá ¿mayanpäćha chay imayquipis quïdanꞌa?’
nil.
21 Chaynümi pasanꞌa quiquillanpä imapis ambisyacü nunacunäwan,
maynu rïcu cayalpis Diospa ñawpäninćhuꞌa pasaypi wacchacunawanꞌa” nil.
Imapïpis mana llaquisha cayänanpämi yaćhachin
22 Chaypïtam Jesus yaćhapacünincunacta nila:
“Ama ‘¿Imactalä micuśhä;
imawanlä müdacuśhä?’
nil llaquicuyalcaychu.
23 Bïdayquim mas bälin cay micuycäpïtá;
aychayquim mas bälin cay müdanapïtá.
24 Má,
pinsaycäliy imaymana pishucunäman.
Paycunap manam talpuynin nï cusichan nï rüjin nï iman canchu.
Jinaptinpis janay pachäćhu cä Taytanchicmi paycunactá micachin.
¿Manachun mas ćhaniyu cay pishucunapïta capäcunqui imatá?
25 Maynu wañupacuyalpis ¿mayantá juc üra masllactapis cawsayninta aśhuycächinman?
26 Cay uchuc lulayllactapis mana atipayalꞌa ¿imapïtam priucupaculcanqui juccunaman?
27 “Licapäcuy imaymana waytacunätapis.
Manam puchcacunchu nï awacunchu.
Ñatac Diosninchicmi tuqui-tuquicta waytachin.
Rasunpa,
unay puydï mandacü Salomonpis manam mayannin waytanüpis llipyayä müdanawan calachu.
28 Waytacunacá wala śhalun chaquillam,
ñatac chaynütapis Diosninchicmi tuquicta müdachin.
¿Chaychun ampá amcunacta mana müdachipäcuśhunquimanchu,
mana chalapacuyniyu nunacuna?
29 “Chayurá ama ‘¿Imactalä micüśhä,
imactalä upyäśhä,
imawanlä müdacüśhä?’
nil wañuy-wañuy llaquicuyalcaychu.
30 Diosman mana chalapacücunallamari chaynu wañupaculcan.
Amcunapñatacmi ichá Tayta Diosniqui ima pishipacuśhayquitapis yaćhayanña.
31 Chayurá wañupaculcay paypa gubirnullanćhu canayquipä.
Jinaptiquiꞌa lluy pishipaculcäśhayquitapis uycälishunquim.
32 “Cuyaśhá uwishnïcuna,
ama manchaculcaychu.
Tayta Diosninchicmari:
‘Cushicümi yaꞌap imapis cäní amcunaman uycunacpä’ nil unanchaycuyanña.
33 Chayurá lluy imayquitapis lanticulcul mana cäniyücunäman aypuycäliy.
Chayta lulalꞌa janay pachäćhümi alli-allicta pilwacuyalcanqui mana imaypis camacäta.
Chayćhümi nï imaypis puyunꞌachu nï pipis suwaśhunquichu.
34 Mayćhümi cäniqui cayan;
chayćhümá pinsayniquipis muspayniquipis cayan” nila.
Nilculmi nilatac:
35-36 “Amcuna listuña musyat-musyat capäcuy cutimuynïpa.
Maynümi wasinta täpachicuptin wasi täpäca alcayan michïrun walachicuśhallaña listu wasiyünin tacaycamuptin-pacha quićhaycunanpä,
chaynümi amcunapis licchat-licchat capäcunqui.
37 Maynu allinpa licaśham canꞌa mayantapis wasiyüca caynu licchayäta talishancá.
Rasunpa chay wasiyüćha allichaculcul mïsanman sirbiycunꞌa.
38 Rasunpa ćhawpi tutapis ütac imay ürapis ćhämul licchayäta talïluptinꞌa maynu cushicuylä paycunapä canꞌa.
39 “Yaćhapäcuśhayquinüpis,
wasiyüca suwanan üräta yaćhayalñá manam jawcachu puñucun,
aśhwanpam mana suwachicunanpä listuña täpayan.
40 Chaynu-ari amcunapis musyat-musyat capäcuy;
manamá yaćhapäcunquichu imay üra yaꞌa Rasun Nunap Chulinca ćhämunätapis” nila.
Chalapacuna nunanpa maquinmanmi ćhulaycun
41 Chaynu niptinmi Pedro tapula:
“Taytay,
¿cayta niyalcämanqui yaꞌacunallactachun icha juccunactawanchun?”
nil.
42 Niptinmi nila:
“Ima chalapacuna yaćhay-sapa tantiayniyu uyway nunactapis niyämá.
Caynu nunactamá ‘cay wasïpi incargacuy’ nil maquinman ćhulaycunman lluy nunancunactapis ürallanćhu micachinanpä.
43 Cushisha cachun imam chalapacuśhanmannuy lulayäta talïluptinꞌa.
44 Paytamá duyñun lluy cänintapis licaycunanpä maquinman ćhulaycunꞌa.
45 “Yanꞌal-lätac chaynu chalapacuśhan nunan ‘¿Imayläćha canan cutimunꞌa?’
nilcul uyway-masincunacta ñacachiyta allacuycunman.
Jinal munaśhanta lulal upyacunman micucunman wasictapis lluy unꞌaycul.
46 Rasunpa duyñun unꞌaypi mana pinsaśhan üra ćhämul ¿imanälunꞌaćh?
Sumä lawćhayculćhá mana chalapacücunap laśhćhunman ćhaycälichinꞌa.
47 Wasiyünin imanuy lulanantapis allinta yaćhapayal,
ardïdi mana luläcätá piyurtalämi mućhuchinꞌa.
48 Ñatac imanuy lulanantapis mana rasunpa yaćhayal,
mana allinta luläcätá manaćh juccätanüchu mućhuchinꞌa.
Chay lulananman chalapacul maquinman ćhulayculꞌa gänaśhwanćha alcanꞌa chay lulaynincunacta.
Jesusmi iwinacuyta apamun
49 “Yaꞌa śhamulá llapa nunätapis nina-yupay lluy imanuy caśhantapis camalächinäpämi.
¡Mayñapis canallan caycuna lulacacanmanña!
50 Caycuna pasananpämi ichá jatun allin ñacaycunalä alcacayäman.
¡Maylä ñacaśha caycuna pasanancamá!
51 “¿Amcuna ‘Jawca cawsaytaćh pay umäśhun’ nilchun niyalcämanqui?
Manamari.
Sinuꞌa iwinacuytam yaꞌa apayämú.
52 Cananpïmari yaꞌa-laycu juc wasillaćhu picha cäcunaca iwinaculcanꞌa quimsawan chay ishcaycunaca.
53 Taytanpa cuntranmi śhalcunꞌa cari chulinpis,
taytanpis chulinpa.
Mamanpa cuntran walmi wawinpis;
mamanpis wawinpa.
Chaynütacmi suyranpa cuntran llumchuyninpis,
suyranpis llumchuyninpa” nila.
Jesusmi ima timpućhu nunaca cawsaśhanpïta anyapan
54 Nilcuśhanpïmi llapan nunacunäta Jesus nilañatac:
“Pucutay yanalpamuptinmi,
‘tamyamunꞌam’ nipäcunqui.
Rasunpa nishayquinüllam tamyamun.
55 Waywa talcamuptinmi ‘usyämunꞌam’ nipäcunqui.
Rasunpa chaynümi pasan.
56 ¡Ishcay cära nunacuna!
¡Janay pachäćhu cay pachäćhu siñalcunäta tantiayalcal-lächun canpis,
quiquiquicunallaćhu ima pasaśhan siñaltapis mana tantiapäcunquimanchu!
57 Canan-ari śhunꞌuyquita tapucuy allincäta lulalpälinayquipä.
58 Chayurá manaläpis mismishancama masqui fisman liyalcalpis ćhïnishüniquiwanpis pampachachicuy.
Chayman ćhächishuptiquim ichá fisca wardiacunap maquinman ćhulaycul carsilman jitaycachishunqui.
59 Chaypi manamá imaypis yalamunquichu mänu cayniquita limpiu pägamunayquicama” nila.