Jesusmi ćhunca ishcayniyu puydïninta aclan
10
Chaypïtam Jesus ćhunca ishcayniyu yaćhapacünincunacta ayalcul nila:
“Quiquïpa munaynïtam upäcuśhayqui nunacunäta supaypa maquinpi julaycälinayquipä,
imawan ishyäcunätapis nanaynincunactapis lluy sänachipäcunayquipäpis” nil.
2 Chay ćhunca ishcaynin puydï caćhaśhancuna caycunam:
“Pedro” nishan Simon,
paypa śhullcan Andres,
Zebedeop chulincuna Jacobowan Juan.
3 Jinaman Felipe,
Bartolomé,
Tomas,
alcabäla mañä Mateo,
Alfeop chulin Jacobo,
Tadeop lisishan Lebeo,
4 malcanpi śhalcü Simon,
ñatac Jesusta wañuchipäcunanpä chalaycachï Judas Iscariotipis.
Jesusmi yaćhaycachil puydïnincunacta caćhan
5 Lluy paycunactam Jesus caćhala:
“Amam yaycapäcunquichu Samariaćhu malcacunäman nïtac mana-Israelcunämanpis.
6 Sinuꞌa uwish-yupaypis pintïsha cä Israelcunällaman lipäculmi
7 ‘Diosninchicpa gubirnunćhu canapä timpu jananchicćhüñam cayan’ nipäcunqui.
8 Ñatac lluy ishyäcunactapis,
liprayücunactapis sänaycachipäcunquim.
Wañüśhacunactapis śhalcachipäcunquim.
Achatucunap maquincunapïtapis caćhaycachipäcunquim.
Cay munaynïta dinbaldilla ćhasquiycuyalꞌa dinbaldillatacmi sänaycachinquipis.
9 Lipäcul amatacmi apapäcunquichu illaytapis,
üructapis,
10 luncuyquitapis nï cambiacunayquipä müdanactapis nï śhucuyllayquitapis,
nïtac garutillayquitapis.
Lulapacücá lulaśhanpi ćhasquiycunanmari.
11 “Ñatac may malcamanpis ćhal,
allin nunactam ashipäcunqui juc malcaman pasapäcunayquicama jamachipäcuśhunayquipä.
12 Paycunap wasinman yayculꞌa ‘Diosninchic jawcallacta caycachishunqui’ nipäcuy.
13 Chay wasiyu allinpa ćhasquiycuśhuptiquiꞌa chaynu lulacachun.
Mana ćhasquiycuśhuptiquiꞌa ama lulacachunchu.
14 Ñatac pï nunapis,
may malcapis mana ćhasquil nï licaytapis munapäcuśhuptiquiꞌa aśhta ćhaquiquicunaćhu pulbu laꞌaśhuśhallayquitapis lluy tapsilcula pasaculcay.
15 Rasunpa,
chaynu nunacuná,
malcacuná cäraycunan muyuncäćhümi Sodoma,
Gomorra malcacunapïtapis mas mastalä mućhuycachisha canꞌa.
Jesus-laycu sasachacuycunam śhamun
16 “Má,
amcunacta caćhayalcac atücunap ćhawpinman uwishta-yupaymi.
Chayurá culibraynüpis sumä-sumä fisyu-sapa caycäliy.
Paluma-yupayñatac mansulla capäcuy.
17 “Chaymi nunacunäpi sumäta cuydaculcänayqui.
Malcap puydïninpa maquincunaman ćhulapäcuśhuptiquim juntunaculcänan wasicunäćhu lawćhaycälishunqui.
18 Yaꞌa-laycum malcacunap mas puydïninmanlä ćhächipäcuśhunqui,
chayćhu puydïcunätawan mana-Israelcunätapis yaꞌapi willaycälinayquipä.
19 Jinapäcuśhuptiquipis ama llaquiculcaychu ‘canan ¿imactatan limalishä?’
nil.
Chay üram Dios umacta uśhunqui,
imacta ninayquipäpis.
20 Chayćhu amcunachu manam limanqui,
sinuꞌa Tayta Diosniquip Ispiritunmi amcunapi limanꞌa.
21 “Ñatac wawi-caśhacunam wañuyman ćhulaycanacunꞌa.
Taytacunapis chulincunactam.
Chulicunapis taytancunap cuntran ticlaculculmi wañuchipäcunꞌa.
22 Yaꞌa-laycutacmi lluy ćhïnipäcuśhunqui.
Ñatac camacaycäcama tacyaycücämi salbacunꞌa.
23 Ñatac juc malcaćhu wañuchipäcuśhunayquipä aticaćhapäcuśhuptiquiꞌa,
juc malcaman ayiculcay.
Rasunpa,
Nunap Chulinca cutimuśhä Israelpa malcancunaman manaläpis ćhayalcaptiquim.
24 Ñatac pï yaćhapacüpis yaćhachïninpïta masninꞌa manam canchu,
nïtac mayan uywaypis patrunninpïta masninꞌa canchu.
25 Yaćhapacücätapis yaćhachicünintanümi alcayan.
Uywaycätapis patrunnintanümi alcayantac.
Ñatac yaꞌa puydïcätalä ‘achatucunap puydïnin Beelzebú’b niyämaptinꞌa ¿imactañaćh lulaycälishunqui llapa caśhtäcunallactá?
Mana manchacullal willaycäliy
26 “Chayurá ama paycunactapis manchaculcaychu.
Ima pacaläcäpis camalaycunꞌam.
Pacaśhacunaca lluymi licaycachisha canꞌa.
27 Chayurá cay pacallap nishäcäta lluyćhu camalaycachiy.
Ñatac linlillayquićhu niycälishäcäta wasi jananpi ayaycaćhäcänuy llapa nunacunäman willaycäliy.
28 Ama-ari aychallayquita wañuchïcäta manchaculcaychu.
Aśhwanpa nina waläcäman cuirpuy-alma lluy jitaycunanpä munayniyu Tayta Diostari manchaculcay.
29 “¿Manachun ishcay pishucunacta ashllay ćhaniyüllawan lantichwan?c
Chaynu cayaptinpis Tayta Dios munaptinlämi jucllayllapis anćhanpayan.
30-31 Chaymi aśhta ächayquipis yaćhaśha cayan ayca caśhanpis.
¿Chaychun amcunacta unꞌälälishunquiman,
imamá?
Chayurá manam imapi manchaculcänayqui canchu.
Pishucunapïtapis mas ćhaniyülämá cayalcanqui.
Jesuspa caśhanchicta nunacunäćhu lisiycachinam
32 “Ñatac mayanpis:
‘Pay caśhtam cá’ nil nunacunäćhu nimäcätá,
yaꞌapis janay pacha Taytäpa ñawpäninćhümi ‘Yaꞌa caśhtam payꞌa’ nishätac.
33 Ñatac ‘Manam lisïchu’ nimäcätam ichá,
yaꞌapis Taytäpa ñawpäninćhu ‘Paytá manam lisïchu’ nishätac.
Jesusmi iwinacachiyta apamun
34 “Amatac ‘jawca cawsaytaćh uycamäśhun’ niyalcämaychu;
aśhwanpam iwinacuyta apayämú.
35 Chulin taytanpa cuntran cananpämari śhalcachishä,
wamla wawintapis mamanpa cuntran,
llumchuynintañatac suyranpa cuntran.
36 Chayurá cuntrayquicuna ayllullayquicunalämi canꞌa.
37 Ñatac yaꞌapi masta mamanta taytanta cuyäcá manam nuná cananpä mirisinchu.
Chaynütacmi chulincunacta yaꞌapïta masta cuyäcäpis manam nuná cananpä mirisinchu.
38 Jinamanñatacmi ima-ayca pasaptinpis wañuycäcama laśhćhüman mana jalumücá nï nuná cananpä mirisinchu.
39 Ñatac cawsayninta ama-pacha nïcá cawsaynintamari apacunꞌa.
Yaꞌa-laycu bïdantapis uycücämi ichá cawsaycunꞌa.
Allin luläcá primiuyümi canꞌa
40 “Ñatac caćhacuśhäta ćhasquïcá quiquïtam ćhasquiyäman;
yaꞌacta ćhasquiycamäcäñatacmi ichá caćhamäní Taytätapis ćhasquiyan.
41 Chayurá willacüninta Diospi śhamuśhan-laycu ćhasquiycücätam Tayta Dios allinpa ćhasquiycunꞌa.
Chaynütacmi nunacta allin caśhan-laycu ćhasquiycücätapis Tayta Dios allin nunätanüpis ćhasquiycunꞌa.
42 Chaynütacmi mayanpis ima-nilä atïlläta masqui täsa alalä yacullacta uycücätapis Tayta Dios allincätalä uycunꞌa” nil.