Yaćhapacünincuna wardaćhu pallalcuśhanpïmi jamuyapäcun
6
Juc warda muyunćhümi Jesus yaćhapacünincunawan pasayalcäla trïgu-trïgup manyanpa.
Chay yaćhapacünincunañatacmi pallalcälil cupaycula micalcälinanpä.
2 Chayćhu fariseocuna chaynayäta licälälilmi Jesusta nipäcula:
“¡¿Imapïtatá warda muyunćhu camachicuy mana pirmitishanta lulayalcanquiman?!”
nil.
Lucas 6.1-49
3 Niptinmi Jesus:
“¿Manachun lïgipäculanqui David micanäśha cayal puliwshï-masincunawan imacta lulapäcuśhantapis?
4 ¿Manachun Diosta alawana carpanman yaycucuycul Diospä japächäśhan tantäta,
sasirdüticunälla micunanpä cä tantätalä micüla?
Jinaman ¿manachun puliwshï-masincunactapis uycuñälä canpis?”
nila.
5 Nishanpïmi:
“Yaꞌa Rasun Nunap maquilläćhümi cay warda muyuncäpis cayan” nila.
Allï maquin mana cuyulï nunactam Jesus sänachin
6 Chaynütacmi juc warda muyunćhüpis juntunaculcänan wasiman yaycul Jesus yaćhachila.
Chayćhümi juc nunap allï maquin mana cuyulï chaquïsha cañä.
7 Chayćhümi camachicuyta yaćhachicücunawan fariseocuna awaytapäcula:
“Má,
canan warda muyuncäćhu sänachinꞌachuśh” nishtin.
8 Chaynu pinsapäcuśhanta Jesus tantiälulmi chay mana cuyulï maquiyu nunäta nila:
“¡Śhalcuy,
cay ñawpäman pasaycamuy!”
nil.
Niptinmi pasaycamul śhäcula.
9 Chayćhümi nunacunäta Jesus nila:
“¿Cay warda muyunca allincätachun icha mana allincätachun lulachimanchic?
¿Cawsayninta salbaycachimanchicchun icha wañulpachimanchicchun?”
nil.
10 Nilculmi lluy chayćhu cä nunacunäta licalcul mana cuyulï maquiyu nunäta:
“¡Chacchapacuy!”
nila.
Chaynu chacchapacüluptinmi sänu licalïla.
11 Chaynu luläluptinmi ñaćhaña imanacälälilapis “¡¿Imactatá luläśhun?!”
nil.
Jesusmi ćhunca ishcayniyu puydï yaćhapacünincunapä aclan
12 Chay muyuncunam juc chunyä uluncascaman Jesus licula.
Chayćhümi tutay-walächi Diosta mañacamula.
13 Chay achicäluptinmi llapa yaćhapacünincunacta lluy ayalcul,
“Puydï caćhaśhäcuna capäcunqui” nil ćhunca ishcayllacta aclala.
14 Paycunam cala:
“Pedro” nishan Simon,
paypa śhullcan Andrespis.
Jinaman Jacobowan śhullcan Juanpis.
Jinamanñatacmi Felipiwan,
Bartolomé.
15 Jinamanꞌa Mateowan,
Tomas.
Chaynütac Alfeop chulin Jacobopis,
ñatac malcanpi nanachicü Simonpis.
16 Chaynütac Jacobop śhullcan Judaspis.
Jinamanꞌa Jesusta ipanchä Judas Iscariotipis.
Jesusmi achca nunacunacta yaćhachin sänachin
17 Paycunallawan chay ulüpi cutilpayalcämuptinmi chay pampaćhu nisyu-nisyu nunacuna alcayalcäñä jinantin Judea malcacunapïtawan,
Jerusalenpïtapis,
chaynütac lamar-lädunćhu Tirowan Sidon malcacunapïtapis.
18 Chaynu śhapämula Jesuspa yaćhachicuyninta uyalipäcunanpämi,
ishyänincunacta lluy sänaycachipunanpäpis.
Chayćhümi Jesus rasunpa lluy ishyänincunactapis Satanaśhpa gänaśhacunactapis sänachipula.
19 Chaymi llapan nunacunapis Jesusta yataycuyllactapis munapäcula ima ishyayninpïpis lluy sänachinanpä.
Allin caycäwan mana allinca
20 Chaynu jinalculmi yaćhapacünincunaman licalcul nila:
“Cushiculcay waccha cäcunaca.
Amcunapämi Diospa gubirnun unanchäśha cayan.
21 Cushiculcay micanäśha cäcuna.
Amcunactam Dios maćhaycachishunqui.
Cushiculcay canan waꞌacücuna;
¡maynu cushicuśham canqui!
22 Cushiculcay yaꞌa Rasun Nunap Chulin-laycu ćhïnipäcuśhuptiquipis,
alupäcuśhuptiquipis,
ruydupapäcuśhuptiquipis,
mana allinpa licapäcuśhuptiquipis.
23 Caytanümi Diospa willacünincunactapis lulala unay awiluyquicuna.
Chayurá chaypun cushiculcay,
jinal mastalä cushiculcaypis.
Paycunanüpis amcuna janay pachäćhu sumä jatun primiuctam ćhasquipäcunqui.
24 Am rïcucunäpam ichá ñä capuśhunquiña imayquipis cushiculcänayquipä.
¿Ñatac imanuytá capäcunqui Diospá?
25 ¡Imanuylä capäcunqui canan patayqui junta cäcuna!
Amcuna juc-punmi micuypi wañupäcunqui.
¡Imanuylä capäcunqui canan allinmi cä nil cushisha cäcuna!
Amcunam mamay-taytayta awćhupäcunqui.
26 ¡Imanuylä capäcunqui canan llapan nunacunäwan alawachicücuna!
Canannümi awiluyqui timpucunaćhüpis alawapäcula Diospa willacünintucuycul yanꞌal willapäcuptinpis.
Jesusmi yaćhachin mana cutichicuyänapä
27 “Cananñatacmi yaꞌa niycälic,
cuyapäcuy ćhïnishüniquicunäta.
Ćhïnicüniqui nunacunapäpis allintatac lulaycälipuy.
28 Amcunapi mana allin limäcunäpäpis ‘Allinca anwan caycuchun’ niycäliy.
Tumpäśhüniquicunapäpis mañaculcaytac.
29 Ñatac cäraćhu lapyaśhuptiquipis,
juc-lädu cärayquitapis camaycuy.
Pipis punchuyquita waycaśhuptiquiꞌa,
camisayquitapis uśhtipaycuy.
30 Mayanpis mañaculcäśhuptiquiꞌa uycäliy.
Mayanpis pishipacü ‘uycamay’ nishuptiquiꞌa uycul amaña ‘cutiycachimay’ niyaychu.
Apacuchunñari.
31 Chaynütac-ari nuna-masiquicuna allinpa licapäcuśhunayquita munaśhayquinu paycunactapis tuquip licaycäliy.
32 Sïchuśh sintinaculcäśhallayquiwan cuyanaculcaptiquiꞌa ¿ima allintatan lulaycuyanqui?
¿Manachun piyurnin jucha-sapacunäpis lulawshï-masincunawan chaynu cuyanacun?
33 Allinta lulaśhüniquicunallapä chaynu lulaycuyalꞌa ‘mas allinninlämi cayá’ ¿niyanquichun imatá?
Chaynüllá Diosta mana lisïcunapis lulapäcunmá.
34 ‘Yaꞌapis mañaycuśhä aynipä’ nil lulaycuśhayqui ¿ima allintá?
Chaynu aynillapá jucha-sapacunäpis mañanaculcanmá.
35 Chayta lulaśhayquinuꞌa ćhïnicüniquicunätapis amcuná cuyaycäliy.
Jinal allinta lulaycapul mañaycuy,
amatac uyayllapá.
Chay jinaśhayquiwanmi cayćhüpis janay pachäćhüpis allin cawsayta pasapäcunqui.
Caycunacta lulalmi Sumä Munayniyu Diospa nunan caśhayquita camalachipäcunqui.
Ñatac juyupäpis pasaypi nunapäpis payꞌa allinmá.
36 Paynuy llaquipayniyü-cama amcunapis capäcuy.
Nuna-masinchicta mana cäraycälinanpämi yaćhachin
37 “Ama nuna-masiquicunacta cäraycäliychu Dios mana cäraycälishunayquipä.
Amatac pictapis juchachaycäliychu,
amcunapis mana juchachaycuśha canayquipä.
Pampachaycäliy,
amcunapis pampachaycuśha capäcunayquipä.
38 Uycälilꞌa amcunapis mana camaytapis atipänayquicamam ćhasquipäcunqui.
Uycälishayqui tincütam uycälishunqui” nil.
39 Nilculmi Jesus tincuchila cay nil:
“¿Juc apla puśhanmanchun juc apla-masinta?
¿Manachućh may ućhcumanpis palpälälinman?
40 Chaynümi mayanpis yaćhachïninpi masꞌa manalä canmanlächu.
Lluy yaćhachishancunacta ishpïlulmi ichá paypis allin yaćhachicü canꞌa.
41 ¿Imapïtan nuna-masiquip ñawinćhu uchuy anlallanta licaypi wañupacuyalcanquiman ñawiquićhu jatun iluyqui cayaptin?
42 ¿Imanuypatan ‘Jay,
ñawiquićhu anlallayquita julüśhayqui’ niyanquiman jatun iluyqui ñawiquićhu chacalayaptin?
¡Ishcay cära nunacuna!
Ñawiquipïtalä juluy chay iluyquita.
Jinalculćha ichá juccunäpa anlanta julunquiman.
Wayuyninpam lisinchic
43 “Allin lantacá manam ćhulanchu pasaypi mana bälïcunactá,
nïtac pasaypi mana bälï lantapis ćhulantacchu tuqui tuquictá.
44 Ñatac lluy lantactapis lisinchic ćhulayninpam.
Manam ïgusta ćhulanmanchu caśhacunaca.
Nïtac übactapis ćhulälunmanchu tantal caśhacá.
45 Chaynümi allin nunäpá śhunꞌunćhu sumä cuyay ćhaniyu ćhulacuśhancäpi shiminpapis yalamun.
Chaynütac mana allin nunäpapis sumä ćhaniyüpa mana allincunallacta ćhulaycuśhancäpïmi shiminpapis yalamun.
Rasunpa shimin liman imanuypis śhunꞌun caśhanpam.
46 “Má,
‘Duyñullämi,
Taytallämi am canqui’ niltac nipämanqui,
chaypïtá manatac yaꞌa nishätá cäsupämanquichu.
47 Cay nishäta uyalil cäsumäcunaca caynümi:
48 masïsu aꞌa jananćhu wasinta śhalcachïcänümari.
Mayuca maynu wiñämulpis,
manamá cućhpachinꞌachu,
masïsu taycachisha captin.
49 Ñatac mana cäsucücá mana sumä simintaycul allpa janallanćhu wasinta luläcänümi.
Puꞌuy tamya timpućhu mayuca lluy wiñalcamulñatacmi juclla apacunꞌa.
Jinalculmi may caśhanćhu nï camalanꞌachu” nin.