Wardaćhümi yaćhapacücunaca trïgucta tiquilcun
12
Juc warda muyunćhümi Jesus yaćhapacünincunawan pasayalcäla trïgu-trïgup manyanpa.
Chay yaćhapacünincunañatacmi micanäśha cayalcal pallalcälila micalcälinanpä.
2 Chayta fariseocunaca licälulmi Jesusta nila:
“¡Jay!
Wic-ari yaćhapacüniquicuna warda muyuncäćhülä tiquilcuśhanwan jalutacuyalcan camachicuyta” nil.
3 Niptinmi:
“¿Manachun lïgipäculanqui David micanäśha cayal puliwshï-masincunawan imacta lulapäcuśhantapis?
4 ¿Manachun David,
chay Diosta alawana carpanman yaycaycälil Diosllapä laquïsha tantäta micälälila masqui paycunapä mana cunsintiycuśha captinpis?
Chay sasirdüticunallapä captinpis manamari jamuyäśhachu capäcula.
5 Chaynütac ¿manachun camachicuycäćhu lïgipäculanqui sasirdüticunacá warda muyuncunaćhüpis Diospa chuya wasinćhu lulatityapäcuśhanta?
Jinayalcaptinpis manatacmá jamuyäśhachu.
6 Rasunpa Diospa chuya wasinpïpis masninlämi cayćhu cäca cayan.
7 Ñatac Diospa shiminćhu:
‘Śhunꞌüta suwaycälimänayquipä uycamäśhayquinuꞌa,
cuyacuyniyu capäcunayquitam muná’a
nishancäta sumäta tantiayalcalꞌa,
cay mana juchayücunäta manaćh jamuyalcanquimanchu.
8 Canan tantiapäcuy-ari:
yaꞌa Rasun Nunap maquilläćhümi cay warda muyuncäpis cayan” nila.
Jesusmi warda muyun chaquisha maquiyüta sänachin
9 Chaypïta Jesus pasalmi juntunaculcänan wasiman yaycula.
10 Chayćhümi mana cuyulï chaquïsha maquiyu nuna cayäñä.
Chay fariseocunäñatacmi Jesusta achäqui ashiyninwan:
“Má,
¿warda muyunćhülä sänachichwanchun?”
nila.
11 Niptinmi:
“¿Mayanllayquitan uwishniqui juc ućhcuman śhaticacüluptin,
warda muyunćhüpis mana julaycälinquimanchu?
12 ¿Chaychun nunaca mana ćhaniyu cayanman uwishcäpïpis ampá?
Chaymari masqui warda muyuncäćhüpis camachicuyca allincäta lulaycachimanchic” nila.
13 Nilculmi chay maquin chaquïsha nunäta:
“Chacchapacuy” nila.
Chaynu chacchapacuptinmi jucca maquinnuy tuqui sänu licalïla.
14 Jinaptinmi chay fariseocuna yalälälimul,
Jesusta imanuypa wañuchipäcunanpäpis lluy limanacuyta allaycapäcula.
Willachimuśhancämi lulacacun
15 Chayta Jesus tantiälulmi juc-läduman licula.
Chayćhu achca nunacuna atipäcuptinmi llapa ishyäcunactapis sänalcachil:
16 “Yaꞌapïta amam äśhacüśha mismilcachinquichu” nila.
17 Caynüpam Diospa willacünin Isaias unay isquirbishanca lulacacüla.
18 Chayćhümi niyan:
“Paymi sirbïnïpa aclacuśhäca cayan.
Pay śhunꞌüćhu caycuśhanpïmi cushisha cayá.
Ispiritú callpanchaycunꞌa jinantin pachäćhu allincäta tincüninman licaycunanpämi.
19 Manam äśhaycaćhayanꞌachu,
nïtac apalcaćhayanꞌachu.
Manatacmi shimintapis cällicunallaćhu uyalipäcunꞌachu.
20 Ñatac paquilpuyä cäñanuy cäcätapis tuquipmi licaycun.
Wañulpuyä michïrunu cäcätapis manam wañulpächinchu.
Caynu caycunꞌa allinca camalaycunanpä unanchaycuśhäman ćhänancamam.
21 Chayćha jinantin pachäćhu nunacunaca payman chalapacullal alcayalcanꞌa”b nil.
Jesustam tumpapäcun
22 Chaymi chay üra mana limä apla Satanaśhpa gänäśha nunacta Jesusman puśhapäcula.
Jinaptinmi Jesus tuqui limä uyalï nunaman sänächin.
23 Chaymi chayćhu cäcunaca licapayllaman camäśha ninaculcäla:
“¿Caychućh rasunpa canman Davidpa caśhtanpi,
Dios caćhamuśhancá?”
nil.
24 Cay nishancunacta fariseocunaca uyalïlulmari śhunꞌullanćhu:
“¡Caytá achatucunap quiquin puydï Beelzebüpa munayninwanmá aluyan!”
nipäcula.
25 Caynu pinsaśhanta Jesus yaćhalmi nila:
“¿Imanuypatá chaynu cälunman?
Juc nasyunćhu quiquin-pula pilyapäculꞌa lluyćha chincachinacunman.
Chaynütacćha juc wasillaćhu pilyapäculpis pampaman muyuchinacunman.
26 Chaynümari Satanaśhpis quiquin-pula cuntra cayalꞌa laquinacüśha cayan.
Chaynu captinꞌa ¿imanuypatá mandacuynin tacyaycunman?
27 Ñatac yaꞌa,
Satanaśhpa pudirninwan lulaptiꞌa amcunap atïniquicuná ¿pip pudirninwantan-nila satanaśhcunap gänäśhacta caćhaycachipäcun?
Chay luläcuna-ari,
má,
niycälishunqui.
28 Canan Diospa Ispiritunwan achatucunacta caćhaycachiptïmi ichá,
tantiapäcunayqui quiquin Diospa gubirnun ćhämuśhuśhayquita.
29 “Má,
sumä armädu nunacta manalä ćhänayculꞌa manamá imantapis waycäluchwanchu.
Chaynaycul-lämi ichá apacuchwan.
30 “Chayurá mana lulawshimalꞌa,
lulaynïta chincayächinquim.
Yaꞌap faburní mana śhalculꞌa,
cunträmi cayanqui.
31 Tuquicta uyalipämay:
Tayta Diosmi pampachanman llapa nunap ima jucha lulaśhantapis ima limaywan jalutacuśhantapis.
Ñatac Diospa lulaynincunacta ‘Satanaśhpam chayꞌa’ nil Chuya Ispiritucta jalutacücätam ichá nï imaypis pampachanꞌachu.
32 Aw-ari,
masqui Rasun Nunap Chulincäta jalutacamaptiquipis Tayta Dios pampachaycuśhunquimanmi.
Chuya Ispiritucta chaynu jalutacuptiquim ichá cay cawsaycäćhüpis nï juc cawsaycäćhüpis pampachaycuśhunquimanñachu.
Lantacta wayuyninpam lisinchic
33 “Ñatac lantacunäta wayuyninpam lisinchic:
Allin lantäpá allinmi wayuyninpis,
mana allin lantäpá mana allintacmi wayuyninpis.
34 ¡Pasaypi culibraypa milaynincuna!
Śhunꞌuyquićhu mana allincälla winalayaptin ¿imanuypatá allincälä yalämunman?
Shiminchic liman śhunꞌunchicćhu imapis cäcätam.
35 Allin nunäpá śhunꞌunćhu sumä cuyay ćhaniyu ćhulacuśhancäpïmi shiminpapis yalamun.
Chaynütac mana allin nunäpapis sumä ćhaniyüpa mana allincunallacta ćhulaycuśhancäpïmi shiminpapis yalamun.
36 Uyalipämay:
Cäraycunan muyuncäćhuꞌa shimiqui chalaśhan ima limaśhayquitapis niycunayquim canꞌa.
37 Chaymi quiquiquicunap limaśhayquimannuy allinpa licaycuśhapis ütac cäraycuśhapis capäcunqui” nila.
Milagructa licaycuypïmi waquin wañupaculcan
38 Ñatac chayćhu waquinnin fariseocunawan,
camachicuyta yaćhachicücunämi Jesusta nila:
“Yaćhachicü,
má,
ima siñalllactapis licaycälichipämay” nil.
39 Niptinmi:
“Cay Diosta ipanchä pasaypi cullu linlicuna,
¿imallactapis licaycuypïchun wañupacuyalcanquiman?
Cananꞌá Diospa willacünin Jonaspa siñal pasaśhallantam licaycälinqui.
40 Paymi sumä jatun challwap patanćhu winalälä quimsa muyun quimsa tuta;
chaynümi yaꞌa Rasun Nunap Chulincäpis quimsa muyun,
quimsa tuta allpäpa śhunꞌunćhu caśhä.
41 Má,
Ninive nunacunäta Jonas willaptinmi juchancunacta wanaculcul Diosman cutipämula.
Chaymi canan amcunaćhu Jonaspïpis sumä munayniyücätalä ipanchapäcuśhayquipi mućhuycachinan muyuncäćhu Ninivecunaca śhalcatityamunꞌa cäraycälishunayquipä.
42 “Chaynütacmi unay Sheba malcanpa mandä walmipis ‘Puydï Salomonpa yaćhayninta maynümi uyaliycuyta muná’ nil calu-calupïlä śhamula.
Chaymi canan amcunaćhu Salomonpïpis mas puydïcätalä mana uyaliculcäśhayquipi mućhuycachinan muyuncäćhu chay walmipis śhalcamunꞌa cäraycälishunayquipä.
Mana allin achatucunam cutiycamun
43 “Amcunacta Satanaśhpa gänaśha cayäcätanümi pasaśhunqui.
Chay achatümari juc nunacta caćhaycul pulimun chunyä lanla-lanla ulucunäćhu,
jamananpäpis ashishtin.
44 Chaynu mana talilmi ‘Jamá,
cutiycuśhä punta yaćhaśhäcäman’ nil caśhan cutimun.
Chaynu cutilmi chay nunäta talin tuqui allichäśha jäcuyä wasi-yupaytapis.
45 Chayćhümi cutiycun pasaypi anćhish masannincunacta inquitacuycul.
Chaynu cutiycul yaćhapäcuptinmi,
chay nunaca puntapïpis piyurlä cawsaynin” nila.
Jesuspa śhullcancunawan mamanmi ashipäcun
46 Chaynu Jesus limayaptinmi mamanwan śhullcancuna ćhälälimul waśhallaćhu alcayalcäla limaycapäcunanpä.
47 Chayćhümi jucnin:
“Mamayquiwan śhullcayquicunam ashiyalcäśhunqui” nin.