Wardaćhu Jesus sänachiptinmi wañuchinanpä limanacälälin
3
Jesusmi yapañatac juntunaculcänan wasiman yaycula.
Chayćhümi mana cuyulï chaquïsha maquiyu nuna cayäla.
San Marcos 3.1-19
2 Fariseocunäñatacmi imallawanpis tumpapäcunanpä Jesusta awaytapäcula:
“Má,
canan warda muyuncäćhu sänachinꞌachuśh” nishtin.
3 Chayćhümi chay mana cuyulï maquiyu nunäta Jesus:
“¡Śhalcuy,
cay ñawpäman pasaycamuy!”
nil pasaycachila.
4 Jinalculmi chayćhu nunacunäta:
“¿Cay warda muyunca allincätachun icha mana allincätachun lulachimanchic?
¿Cawsayninta salbaycachimanchicchun icha wañulpachimanchicchun?”
nin.
Ñatac paycuná mana limalil upällallam cayalcan.
5 Chaynu chay nunäpi imactapis mana uculcäśhanpïmi Jesus piñäśha llaquïsha licapaycula.
Jinamanmi chay nunäta:
“Chacchapacuy” nila.
Chaynu chacchapacüluptinmi sänu licalïla.
6 Jinaptinmi chay fariseocuna yalälälimul,
Jesusta imanuypa wañuchipäcunanpäpis mandacü Herodes partipi śhalcünincunawan limanacuyta allaycaycälila.
Jesuspïtam intiru malcacunaćhu sumachipäcun
7 Jesusmi yaćhapacünincunawan ućhap manyanman aśhuculcäla.
Jinaptinpis Galilea-lädupïta achca-achcam atipäcula.
8 Maynu sumäcunacta lulaśhanta uyalipäculmari Judea-lädupïtapis,
Jerusalenpïtapis,
Idumea-lädupïtapis,
Jordan mayup chimpancunapïtapis,
Tirowan Sidonpa lluy muyülïnincunapïtapis payman śhapämula.
9-10 Chayćhu achca ishyäcunacta lluy sänachiptinmi,
juc ishyäcunapis Jesuspa müdanallantapis yataycälinanpä ñiti-ñiti aśhuycälimula.
Jinaptinmi yaćhapacünincunacta nila:
“Büticta alistapamay chaypi yaćhachinäpä.
Caynüpa nunacunacá lluyćha ñitïmäśhun” nil.
11 Jinamanꞌa Satanaśhpa gänaśha nunacunäćhu achatupis Jesusta licälulmi ñawpäninman unꞌulacuycul ayaycaćhaypanuy:
“Amꞌa Diospi śhamü Chulinmi canqui” nil nipäcula.
12 Niptinmi chaycunacta Jesus ćhuncay-ćhuncay nila pï caśhantapis mana camalachinanpä.
Jesusmi puydï willacünincunacta aclan
13 Chaynalculmi Jesus juc uluman ishpila.
Chayman munaśhan nunäta ayalcachilmi
14 aclala ćhunca ishcayniyu nunacta:
“Puydï caćhaśhäcunam capäcunqui.
15 Satanaśhcunap maquinpi pudirwan caćhaycachipäcul willaculcänayquipämi caćhapäcuc” nil.
16 Chay ćhunca ishcayninmi caycuna:
“Pedro” nishan Simon.
17 Chaynütac Zebedeop chulincuna Jacobowan,
Juan.
Paycunactam Boanerges niycula.
(Cay ninanꞌa “Räyup jiniyunnuy jiniyuyu nunacuna” ninanmi.)
18 Chaynütac Andres,
Felipe,
Bartolomé,
Mateo,
Tomas,
Alfeop chulin Jacobo,
Tadeo,
malcanpi śhalcü Simonpis.
19 Chaynütacmi wañuchipäcunanpä chalaycachïca Judas Iscariotipis.
Jesustam mamanpis yaćhachicücunäpis lücupä licapäcun
20 Chaypïtam Jesus yaćhapacünincunawan liculcäla juc wasiman.
Chayman achca-achca nunacuna juntunacälälimuptinmi manaña micapäculañapischu.
San Marcos 3.20-35
21 Jinaśhanta yaćhälälilmi aylluncuna “¿Lücülunchun imam?”
nil Jesusman yalacalcämula puśhapäcunanpä.
22 Ñatac Jerusalenpïta ćhäpämü Moisespa camachicuyninta yaćhachicücunämi Jesusta jamuyapäcula:
“¡Cayꞌa quiquin achatucunap mandä Beelzebüpa maquinćhümari cayan!
¡Chay puydïllanpa munayllanwanmá aluyta jicutayan!”
nil.
23 Niptinmi Jesus ayalcul tincuchiypa limapäla:
“¡¿Imanuypatá Satanaśhca quiquin Satanaśhta alucunman?!
24 Juc nasyunćhu quiquin-pula pilyapäculꞌa lluyćha chincachinacunman.
25 Chaynütacćha juc wasillaćhu pilyapäculpis pampaman muyuchinacunman.
26 ¿Chaychun ampá Satanaśhpis quiquin-pula cuntra cayal laquinacüśha cayal tacyaycunmanlä canpis?
Aśhwanpa quiquillanćhá camacacunman.
27 Má,
sumä armädu nunacta manalä puntacta ćhänalꞌa manamari pipis waycayta atipanmanchu.
Payta ćhänälulćha ichá lluy imallantapis apacunman.
28 Uyalipämay:
Tayta Diosmi pampachanman llapa nunap ima jucha lulaśhantapis ima limaywan jalutacuśhantapis.
29 Ñatac Diospa lulaynincunacta ‘Satanaśhpam chayꞌa’ nil Chuya Ispiritucta jalutacücätam ichá nï imaypis pampachanꞌachu.
Jinaptinmi wiñay-wiñaypä juchan ipicuśha canꞌa” nil.
30 Caycunacta Jesus nila “Satanaśhpa maquinćhümi cayan” nipäcuptinmi.
Jesuspa mamanwan śhullcancunam ashipäcun
31 Chaynu Jesus niyällaptinmi mamanwan śhullcancuna ćhälälimun.
Chayćhümi waśhallapïta Jesusta ayachila.
32 Jinaptinmi muyülïninćhu täcücunaca:
“Mamayquiwan śhullcayquicunam ashiyalcäśhunqui” nil willaycälila.