Diospa chuya wasin pampaman muyuchisha canantam willan
24
Diospa chuya wasinpi Jesus yalalcamul liyta allaycuyaptinmi,
yaćhapacünincuna aśhuycälil nipäcula “Licay,
cay wasi maynu sumä-sumämi caculläñä” nil.
2 Niptinmi:
“Cayta licayalcanquimá.
Rasunpa cay caśhancäćhu licachillapäpis manamá juc lumillapis caycunꞌachu.
Lluymi pampaman muyunꞌa” nila.
Cutimuyninpä ima siñalcunapis pasanantam willan
3 Ñä Ulibus ulüman ćhaycälil Jesus täcuyaptinmi,
yaćhapacünincuna aśhuycälil nipäcula:
“Niycälimay-ari ¿imaymi chay lulacacunꞌa?
Cutimunayquipä ñatac cay timpup camacaynin jiꞌacaycayämuptin ¿ima siñalcunam śhamunꞌa?”
nil.
4 Niptinmi Jesus nila:
“Yanꞌal-lätac pipis ingañapäcuśhunquiman.
5 Yaꞌatucul achca śhapämulmi ‘Yaꞌam Caćhaśhan Salbacüca cayá’ nil achca nunacunacta pantachinꞌa.
6 Ñatac wicćhüpis cayćhüpis gïrrash nïcunacta uyalipäcul ama manchaculcaychu.
Chaycuna pasananmi yaćhacun masqui manalä camacayca cayaptinpis.
7 Chaynütacmi chaypá nasyuncunapis malcacunapis gïrranaculcanꞌa.
Chaynütacmi mayćhu chayćhüpis micuy wanacunapis ishyaycunapis śhaśhaycunapis cacunꞌa.
8 Lluy caycuna ñacaycunap allaycuyllanlämi.
9 “Chayćhu yaꞌa-laycumá supay-apachipäcuśhunayquipä ćhïnipapäcuśhunayquipä wañuchipäcuśhunayquipäpis ćhulaycapäcuśhunqui.
10 Chay timpućhümi achca ipanchapämanꞌa.
Chaymi quiquin-pulacuna ćhïninaculcanꞌa,
jitaycanaculcanꞌa.
11 Yanꞌal willacütucücuna licalilcamulmi achca nunacta pantachinꞌa.
12 Ancha-anchap mana allin lulaycunallaña timpuyaptinmi,
lluy nunacunapapis śhunꞌun lumiyalpuyanꞌaña.
13 Wañuycäcama tacyaycücämi ichá salbacunꞌa.
14 Caypa allin willacuyninmi jinantin pachäman willaycuśha canꞌa lluy nunacuna lisipäcunanpä.
Chaylämi cäraycunan muyunca śhamunꞌa.
15-16 “¿Manachun willacünin Daniel isquirbila chay Sumä Millachicüman Muyuchïcäpi?
Chayurá cayta lïgïcunaca,
sumäta tantiapäcuy.
Chay Millachicüca Diospa chuya wasinćhu licalimuptinmi,
Judea-lädućhu yaćhäcunaca juclla ayipäcunan ulucunäman.
17 Chaynütac wasinpa altuśhninćhu cäcunaca imallanta juluycunallanpäpis timpu manañam canꞌañachu.
18 Ćhaclanćhu cäcunäpis müdanallanta juntulcü cutipämunallanpäpis timpu manañatacmi canꞌañachu.
19 ¡Maynu llaquićh canꞌa patayu walmicunäpä,
chaynütac wawinta ñuñücunäpä!
20 Chaycuna tamya timpućhu nï ima warda muyunćhüpis pasananpä Diosta ruygaculcay.
21 Cay sumä ñacaycunänuꞌa cay pachap allaycuyninpïpis manam pasalachu,
nïtacmi canꞌatacchu.
22 Chay timpucta Tayta Dios mana mirmachiptinꞌa manaćh mayanpis salbaculcanmanchu;
ñatac japächacuśhancuna-laycum mirmaycachinꞌa.
23 “Chay timpu mayanpis ‘¡Licay!
¡Diospa Salbacüca cayäñä wicćhümi,
cayćhümi!’
nil nipäcuśhuptiquilätac,
quiriyalcanquiman.
24 Rasunpa salbacütucücuna willacütucücuna śhalcapämulmi imaymana milagrucunacta lulapäcul Diospa aclacuśhancunätapis atipayänülä pantachiyta jicutapäcunꞌa.
25 Ñam yaćhaycachishaña cayalcanqui.
26 “Chaymi masqui ‘Salbacüca wic ulućhümi cayan’ nipäcuśhuptiquipis ama lipäcuychu.
‘Cayćhümi pacalayan’ nil nipäcuśhuptiquipis ama quiripäcuychu.
27 Aśhwanpa yaꞌa Rasun Nunap Chulinca cutimuptí inti yalamunanpi aśhta inti jiꞌalpunancama,
sumä wacli uyaypa camalämuśhancänümá canꞌa.
28 Maynümi aycha captin uyaypa wisculcunaa muyupäcun;
chaynümi amcunapäpis uyaypatac canꞌa.
29 Chay sumä ñacay timpuca pasalcullaptinmi intica wañunꞌa;
quillapis manañam acchinꞌachu;
uyllurcunapis lluyñam palpatityamunꞌa;
janay pachäćhu lluy cäcunäpis śhaśhalinꞌam.b
30 “Chayćhümi yaꞌa Rasun Nunap Chulinca janay pachäćhu camalacamuśhä.
Jinaptïmi intiru malcacuna pucutay jananćhu altuman juluycuśha sumä munayniyu yaꞌacta cutiyämüta licapämal awćhuyllaman camapäcunꞌa.
31 Jinaptinmi anjilnïcunacta caćhamuśha juc curnitilla sumä-sumä tucalpamuyćhu jinantin pachäpi llapa aclaśha nunäcunacta juntuchimunäpä aśhta sïlup sapinćhu cäcunätapis.
32 “Yaćhapäcuy-ari lanta tantiachimäśhallanchictapis.
Pallaynincunaćhu chillquilimuptinmi tamya timpumanña ćhaycuśhanchicta tantianchic.
33 Chaynu-ari lluy caycuna pasaśhanta licapäculꞌa janayquićhüña timpuca caśhanta yaćhapäcuy.
34 Rasunpa lluy caycuna pasanꞌa manaläpis cay timpu nunacunaca camacaptinlämi.
35 Cay pachäwan janay pachäćhu licaśhallanchiccuna camacällam.
Yaꞌap nishäcunañatacmi ichá wiñay simpripä caycü.
36 “Ñatac chay śhamuná ürätam ichá nï pipis yaćhanchu.
Manam quiquïpis nïtac anjilcunapis sinuꞌa Taytallämi yaćhan.
37 Yaꞌa Rasun Nunap Chulincäpa cutimuyní canꞌa Noé timpućhu pasaśhannümi.
38 Manaläpis chay tamya fisyu ćhämuptinlämi llapa nunapis upyayllacta,
casaracuycunallacta,
fistacunallacta jawca lulaculcäla aśhta Noé barcunman yaycunancama.
39 Chaynu mana imallactapis tantiaculcaptinmi tamya fisyu chalälun.
Chaynümi yaꞌa Rasun Nunap Chulinca cutimuptïpis pasanꞌa.
40 Chaypun masqui ishcay nuna ćhaclaćhu cayalcaptinpis jucninmi puśhacuśha canꞌa,
jucninñatacmi caćhaycuśha canꞌa.
41 Chaynütacmi ishcay walmicuna aꞌayalcaptinpis jucnin puśhacuśha canꞌa,
juccäñatacmi caćhaycuśha canꞌa.
42 “Chayurá musyat-musyatlla capäcuy;
manamá imay üra cutimunäta yaćhapäcunquichu.
43 Maynümi wasiyüca suwanan üräta yaćhayalñá,
mana jawcachu puñucun,
aśhwanpam listuña täpayan mana suwachicunanpä.
44 Chaynümá licchat-licchat capäcunayqui.
Yaꞌa Rasun Nunap Chulinca mana imapis ucuśhayqui üram śhamuśhä.
Ishcay licchä uywaymanmi tincuchin
45 “Chayurá capäcuy chalapacuna yaćhay-sapa tantiayniyu uyway nunanuy.
Caynu nunactamá ‘cay wasïpi incargacuy’ nil maquinman ćhulaycunman lluy nunantapis ürallanćhu micachinanpä.
46 Cushisha cachun imam chalapacuśhanmannuy lulayäta talïluptinꞌa.
47 Paytamá duyñun lluy cänintapis licaycunanpä maquinman ćhulaycunꞌa.
48-49 Yanꞌal-lätac chaynu mana allin śhunꞌuyu nunan ‘canan imayläćha cutimunꞌa’ nilcul uyway-masincunacta ñacachiyta allacuycunman.
Jinal munaśhanta lulal upyacunman micucunman wasictapis lluy unꞌaycul ima.
50 Rasunpa duyñun unꞌaypi mana pinsaśhan üra ćhämul,
¿imanälunꞌaćh?
51 Sumä lawćhayculćhá ishcay cära mana chalapacücunap laśhćhunman ćhaycälichinꞌa.
Chayćhüćha awćhupäcul quiluctapis lawćhićhicyachipäcunꞌa.