Diospa chuya wasinpïmi yaćhapacücunaca tapuculcan
13
Chay Diospa chuya wasinpi Jesus yalayämuptinmi jucnin yaćhapacünin nila:
“Yaćhachicü taytáy,
¡licay,
maynu sumä wasim caculläñä;
jatućhaćhä lumicunawanlämi cacullañäpis!”
nil.
San Marcos 13.1-19
2 Niptinmi Jesus:
“Cayta licayalcanquimá.
Rasunpa cay caśhancäćhu licachillapäpis manamá juc lumillapis caycunꞌachu.
Lluymi pampaman muyunꞌa” nin.
Cutimuyninpä ima siñalcuna licalinantapis Jesusmi willan
3 Chaypi chay chuya wasip chimpan Ulibus ulućhu Jesus täcuyaptinmi Pedro,
Jacobo,
Juan,
Andreswan japälla tapuculcäla:
4 “Niycälimay-ari ¿imaymi chay lulacacunꞌa?
Chay timpu jiꞌacaycayämuptin ¿ima siñalcunam śhamunꞌa?”
nil.
5 Niptinmi Jesus:
“Yanꞌal-lätac pipis ingañapäcuśhunquiman.
6 Yaꞌatucul achca śhapämulmi ‘Yaꞌam Diospi Caćhaśhan Salbacüca cayá’ nil achca nunacunacta pantachinꞌa.
7 Ñatac wicćhüpis cayćhüpis gïrrash nïcunacta uyalipäcul ama manchaculcaychu.
Chaycuna pasananmi yaćhacun masqui manalä camacayca cayaptinpis.
8 Rasunpa chaypá nasyuncunapis malcacunapis gïrranaculcanꞌam.
Chaynütacmi mayćhu chayćhüpis śhaśhaycunapis micuy wanacunapis jicutacücunapis cacunꞌa.
Lluy caycuna ñacaycunap allaycuyllanlämi canꞌa.
9 “Sumäta cuydaculcay:
Malcap puydïninpa maquincunaman ćhulapäcuśhuptiquim juntunaculcänan wasicunäćhu lawćhaycälishunqui.
Yaꞌa-laycum malcacunap puydïninmanlä ćhächipäcuśhunqui,
chayćhu paycunacta yaꞌapi willaycälinayquipä.
10 Mastá puydiyan jinantin pachäćhu allin willacuy willacuśha cananmi.
11 Chaynu mandacücunap maquinman aysapäcuśhuptiqui ama llaquiculcaychu ‘Canan ¿imactatá limalicuśhä?’
nil.
Chayüram Diospa Ispiritun amcunap limanꞌa.
Ninallayquita niycäliy.
12 “Ñatac wawi-caśhacunam wañuyman ćhulaycanacunꞌa.
Taytacunapis chulincunactam.
Chulicunapis taytancunap cuntran śhalcuculculmi wañuchipäcunꞌa.
13 Yaꞌa-laycutacmi lluy ćhïnipäcuśhunqui.
Wañuycäcama tacyaycücäñatacmi ichá salbacunꞌa.
14 “¿Manachun willacünin Daniel isquirbila chay Sumä Millachicüman Muyuchïcäpi?
Chayurá cayta lïgïcunaca,
sumäta tantiapäcuy.
Chay Millachicüca Diospa chuya wasinćhu licalimuptinmi,
Judea-lädućhu yaćhäcunaca juclla ayipäcunan ulucunäman.
15 Chaynütac wasinpa altuśhninćhu cäcunaca imallanta juluycunallanpäpis timpu manañam canꞌañachu.
16 Ćhaclanćhu cäcunäpis müdanallanta juntulcü cutipämunallanpäpis timpu manañatacmi canꞌañachu.
17 ¡Maynu llaquićh canꞌa patayu walmicunäpä,
chaynütac wawinta ñuñücunäpä!
18 Caycuna tamya timpućhu mana pasananpäri Diosta ruygaculcay.
19 Cay sumä ñacaycunanuꞌa cay pachap allaycuyninpïpis manam pasalachu,
nïtacmi canꞌatacchu.
20 Chay timpucta Tayta Dios mana mirmachiptinꞌa manaćh mayanpis salbaculcanmanchu;
ñatac japächacuśhancuna-laycum mirmaycachinꞌa.
San Marcos 13.20-37
21 Chay timpu mayanpis ‘¡Licay!
¡Diospa Salbacüca cayäñä wicćhümi,
cayćhümi!’
nil nipäcuśhuptiquilätac quiriyalcanquiman.
22 Rasunpa salbacütucücuna willacütucücuna śhalcapämulmi imaymana milagrucunacta lulapäcul Diospa aclacuśhancunätapis atipayänülä pantachiyta jicutapäcunꞌa.
23 Chaymi manalä imapis pasaśhancama amcunacta canan willayalcac lichcat-lichcat capäcunayquipä.
Jesusmi cutimuyninpi willan
24 “Chay sumä ñacay timpuca pasalcullaptinmi intica wañunꞌa;
quilläpis manañam acchinꞌachu;
25 uyllurcunäpis lluyñam palpatityamunꞌa;
janay pachäćhu lluy cäcunäpis śhaśhalinꞌam.
26 Chayćhümi Rasun Nunap Chulincäta jinantin pachäćhu cä nunacunaca licapämanꞌa,
pucutay śhunꞌunćhu sumä munaynïwan śhayämüta.
27 Chayćhümi anjilnïcunacta caćhamuśhä wicpi caypi jinantin pachäpi aśhta sïlup sapinpi-camapis aclaśhäcunacta juntuchimunäpä.
28 “Yaćhapäcuy-ari lanta tantiachimäśhallanchictapis.
Pallaynincunaćhu chillquilimuptinmi tamya timpumanña ćhaycuśhanchicta tantianchic.
29 Chaynu-ari lluy caycuna pasaśhanta licapäculꞌa yaćhapäcuy janayquićhüña timpuca caśhanta.
30 Rasunpa caycuna pasanꞌa manaläpis cay nunacunaca camacaptinlämi.
31 Cay allpäpis sïlupis camacällamari.
Ñatac cay nishäcá manam imaypis chincanꞌachu;
lluymi lulacacunꞌa.
32 “Ñatac chay śhamuná ürätam ichá nï pipis yaćhanchu.
Manam quiquïpis nïtac anjilcunäpis sinuꞌa Taytallämi yaćhan.
33 ¡Lichcat-lichcat capäcuy!
¡Licaculcay!
Chay muyun imay ćhämunätapis manamá yaćhapäcunquichu.
34 Maynümari mayanpis calucta lil nunancunacta lulayniyü-camacta wasinćhu caćhaycun,
jinaman täpänintapis musyat-musyat caycunanpämá.