Japanyäśha waccha walmim llapanpïpis masta uycun
21
Chaypïtam illay juntucunaman llapa cäniyücunapis illaynin jitaycuyäta Jesus licälun
2 jinaman juc japanyäśha waccha walmi ishcay illaychallanta jitaycuyätapis.
Lucas 21.1-38
3 Chayćhümi Jesus nila:
“Cay japanyäśha walmim rasunpa lluypïpis masta jitaycülun.
4 Chay juccunacá illayninpa puchüllantam uycälin.
Cay japanyäśhañatacmi ichá cawsananpä capuśhallanta lluyta uycülun” nil.
Jesusmi cutimunanpä ima siñalcuna pasanantapis willan
5 Chaynu nilcuptinmi waquin yaćhapacünincunañatac chay wasïta licalcul nicuyalcan:
“¡Diospa wasinꞌa sumä-cama lumiwan jinaman paypä uycapäcuśhancunawan maynu sumä tuqui-camamá caculläñä!”
nil.
6 Niptinmi Jesus:
“Lluy caycunapä camacaynin ćhämunꞌam.
Manamá nï juc lumipis täcuśhanćhu täcunꞌachu.
Lluymari pampaman muyunꞌa” nila.
7 Niptinmi yaćhapacünincuna nila:
“Yaćhachicüní,
¿imaymi chay lulacacunꞌa?
¿Ima siñalcunam chay timpupä pasanꞌa?”
nil.
8 Niptinmi Jesus nila:
“Yanꞌal-lätac pipis ingañapäcuśhunquiman.
Yaꞌatuculmi achca ‘Yaꞌam Diospi Caćhaśhan Salbacüca cayá’ nil śhapämunꞌa.
Jinamanmi ‘Cay timpu camacaynin jananchicćhüñam’ nipäcunꞌapis.
Chaynu nishuptiqui ama änil paycunacta atipäcuychu.
9 Ñatac imaymana gïrracuna jinantin pachäćhu talcuśhanta uyalilpis amatac manchaculcaychu.
Chaycuna pasananmi yaćhacun masqui manalä camacayca cayaptinpis.
10 Rasunpa chaypá nasyuncunapis malcacunapis gïrranaculcanꞌam.
11 Chaynütacmi mayćhu chayćhüpis micuy wanacunapis ishyaycunapis śhaśhaycunapis cacunꞌa.
Chaynütacmi manchanaśh siñalcunapis sïlućhu pasanꞌa.
12 “Manaläpis cay timpucuna allaycuptinlämi yaꞌa-laycu chalapäcuśhunqui,
aticaćhapäcuśhunqui.
Juntunaculcänan wasicunap puydïninmanpis ćhulapäcuśhunquim.
Carsilmanpis wićhachipäcuśhunquim.
Jinamanñatacmi imaymana puydï mandacücunap maquinman alaśhćhapäcuśhunqui.
13 Caycunaćhümari yaꞌapi willacunayquipä caycunꞌa.
14 Chayćhu umayquiman-ari sumäta ćhulacuy ‘¿Imactatá canan limalicuśhä?’
nil mana llaquicuyalcänayquipä.
15 Chay ürañatacmi ichá yaꞌa quiquí juc sumä yaćhayta upäcuśhayqui chay tumpaśhüniquicuna mana ima limayninwanpis gänapäcuśhunayquipä.
16 “Jinamanꞌa quiquiquicunap ayllullayquim taytayquipis irmänuyquipis llapa lisinacuśhayquicunapis jatun awturidäcunap maquinman ćhulaycälishunqui.
Jinaptinmi waquinniquicunactá wañuchipäcuśhunqui.
17 Lluy lluymá yaꞌa-laycu ćhïnipäcuśhunqui.
18 Masqui caynu lulapäcuśhuptiquipis,
manamá umayquipi nï juc ächallayquipis chincanꞌachu.
19 Canan yaꞌaman imacunaćhüpis masïsu chalapacayalcämalꞌa salbacunquim.
20 “Má,
Jerusalen malcäta ćhïnïnincuna intunanpa lluy cunćhacaycäliptinꞌa yaćhapäcunquiñam mana cäman muyuchinan timpun jananćhüña caśhanta.
21-22 Cayꞌa Diospa unay willacünincunap nipäcuśhan castigunmi canꞌa.
Chayurá Judea malcacunäćhu yaćhäcuna,
ulucunäman pacacamü ayipäcuy.
Jerusalenćhu yaćhäcunäpis mana cutiycamüña ayiculcay.
23 ¡Maynu llaquićh patayu walmicunäpä,
wawinta ñuñücunäpäpis canꞌa!
Nana nanay ñacaycunaćh cay jinantin pachäćhu cacunꞌa Diospa piñacuynin cay Israel malcaman ćhämuptinꞌa.
24 Waquinninmi ispädacunawan wañunꞌa.
Waquinnincunañatacmi juc-lädu nasyuncunaman prïsu apaśha canꞌa.
Chaynütacmi juc-lädu nunacuna jalutaculcanꞌa Jerusalenta aśhta Dios üranta unanchaycunancama.
Rasun Nunap Chulincäpa Cutimuyninpïta willan
25-26 “Ñatac siñalcuna intïćhu quilläćhu uyllurcunaćhüpis cayaptinꞌa jinaman lamarcäpis altu altuman ticlaśhtinnu wicapacacayämuptinmi intiru nasyuncunaćhu nunacunaca ‘¿Imam caynüpa pasacuyan?’
nil chucchulipäcunꞌa.
Ñatac lluy sïlućhu cäcuna śhaśhäluptinmi ‘¡Cay pachaca lluyćha chincacunꞌa!’
nil wañütuculcanꞌa.
27 Lluy caycuna pasayaptinmi yaꞌa Rasun Nunap Chulincäta jinantin pachäćhu cä nunacunaca licapämanꞌa pucutay śhunꞌunćhu sumä munaynïwan śhayämüta.
28 Caycuna lluy allaycuptin callpanchaculcay.
Cay ñacaycunäpi julapäcuśhunayquipä Diosninchic janayquićhüñamari cayan” nil.
29 Chaynütacmi jucman tinculcachil willala:
“Licapäcuy ïgus jaćhäman ütac juc lantacunamanpis.
30 Chaycunam timpun ćhämuptinꞌa chillquilimun.
Chaynu captin ¿manachun ‘Tamya timpu sircañamá’ ninchic?
31 Chaynu-ari lluy caycuna pasaśhanta licapäculꞌa yaćhapäcuy Diospa gubirnun janayquićhüña caśhanta.
32 Rasunpa caycuna pasanꞌa manaläpis cay timpu nunacunaca camacaptinlämi.
33 Sïlüpis allpäpis camacällam,
ñatac cay nishäcá wiñay simpripä cawsämi.
34-35 “Imaypis licchat-licchat capäcuy chaypun trampa-yupaypis mana juclla chalapäcuśhunayquipä.
Rasunpa chay muyun jinantin pachantinpämi ćhämunꞌa.
Yanꞌal-lätac śhunꞌuyquita lumiyächicuyanquiman mana allin lulaycunawan,
shincacuycunallawan ñatac cay cawsayniquićhu imapïpis wañuyäśhayquiwan.
36 Aśhwanpa Diosta mañaculcay cay jananchicćhüña cä timpucunäpi ayil yaꞌa Rasun Nunap Chulincäpa lädüman ćhäpämunayquipä” nil.
37-38 Ñatac muyun-muyunmi wäla-wälapïta nunacunaca Jesusta uyalipäcü śhapämula chay chuya wasiman.
Chayćhümi tucuy anyaśh Jesus yaćhachila.
Tutapñatacmi Ulibus nishan ulüćhu quïdacü cala.