Jesusmi imanuy śhunꞌuwan lulaycunapi yaćhachin
6
“Ama allin lulaycunacta lulayalcaychu nunacunaca lical alawaśhunallayquipä.
Chaynüta lulaptiquiꞌa altu sïlućhu cä Diosninchic manam primiucta uśhunquiñachu.
Uycuypi
2 “Chaymi pishipacücunäta imallacta uyculpis ama llamadayänayquichu chay ishcay cära nunacunänu juntunaculcänan wasicunaćhüpis,
läsacunaćhüpis lluypa ñawquin allinpa licachicuyllawan lulaśhancänuꞌa.
Rasunpa,
chay lulaśhanwanꞌa lluy alawaycuśha cananta ćhasquiycunñamari.
3 Amcunaćhüñatacmi ichá,
Tayta Diosllap ñawquillan yanapaycunayqui;
ichü maquiqui uycuśhantapis allï maquillayquipis manam yaćhananchu.
4 Chay pacaläśhacta licä Tayta Diosmi lluypa ñawquin allinpa licaycuśhunqui.
Mañacuypi
5 “Ñatac Dioswan amam aläjapa limanquichu chay ishcay cära nunacunänuꞌa.
Maynümi nunacunäwan allinpa licachicuyninwan juntunaculcänan wasicunaćhüpis läsacunaćhüpis śhaycapacuycul mañacuypi wañupaculcan.
Rasunpa,
chay lulaśhanwanꞌa lluy alawaycuśha cananta ćhasquiycunñam.
6 Amcunaćhüñatacmi ichá,
mañaculꞌa wasiquita wićhacalcamul śhunꞌuyquićhu lluy pacaläśhancunäta lisï Taytallayquita mañacunqui.
Chay pacaläśhancäta licä Tayta Diosmi lluypa ñawquin allinpa licaycuśhunqui.
7 Ñatac Diosta mañaculꞌa ama limaychu yanꞌal cutipalcul cutipalcul limaśhallayquitá,
Diosta mana lisï nunacunanuꞌa.
Chaycuna chaynu mañaculcan ‘Achcacta limaptí Dios uyalimanꞌam’ nïcänuymi.
8 Amam paycunanuꞌa lulapäcunquichu.
Manaläpis mañacuptiquim Diosꞌa yaćhanña ima pishipaculcäśhayquitapis.
9 “Chayurá mañaculcanquiman caynümi:
Janay pachäćhu cä Tayta Diosnillá,
amllamá altuman juluśha canqui.
10 Gubirnuyqui śhaycamuchun.
Janay pachäćhu lulaśhayquinu,
cay pachäćhüpis munayniqui lulaśha cachun.
11 Canan muyunpä micuyta uycälillämay.
Ama-ari pishiycachillämaychu.
12 Mana allin lulamänïcunäta pampachäśhämannu juchäcunacta pampachaycälillämay.
13 Mana allin lulaycunaman palpapäcunäpä ama-ari caćhaycälillämaychu.
Aśhwanpa chaypi licaycälillämay.
˻Ñatac jinantin pachäpis maquillayquićhümi cayan.
Amllam cayanqui sumä munayniyücäpis.
Amllatacmi wiñay simpripä altuman juluycuśhapis cayanqui.
Chaynu callächun˼ nil.
14 Chayurá mana allin lulaśhüniquicunacta pampachaycäliptiquim janay pachäćhu cä Taytayqui Diospis pampachaycälishunqui.
15 Mana pampachapäcuptiquim ichá mana pampachapäcuśhunquitacchu.
Ayunaypi
16 “Ñatac ayunal ama lawtïtuculcaychu chay ishcay cära nunacunänuꞌa.
Paycuna micuypi wañüśhanuy taplaycaćhapäcun nunacunawan licachiculcänallanpämi.
Rasunpa allinpa licaycuśha canallantá ćhasquiycälinñam.
17 Amcunaćhüñatacmi ichá umayquicunacta ñächapacalcäliy cärayquicunactapis paꞌapacalcäliy
18 ayunaśhayquita nunacunäman mana tantiachipäcunayquipä.
Chaymi ima pacaläśhantapis licä Taytayqui lluypa ñawquin allinpa licaycuśhunqui.
Janay pachäćhu sumä ćhaniyücäpi
19 “Amatacmi lägaculcanquichu cay pachäćhu cäcunallactá.
Chaycunacta puyucunallam ismuycunallam camacan.
Suwacunallam yaycul suwapäcun.
20 Aśhwanpari janay pachäpä lägaculcay.
Chayćhuꞌa manam imaypis puyunꞌachu,
nï ismunꞌachu,
nï suwapis yaycunꞌachu.
21 Mayćhümi cäniqui cayan,
chayćhümá pinsayniquipis muspayniquipis cayan.
Allinwan mana allin cäpi
22 “Juc acchi-yupaymi ñawinchic imactapis licachimanchic,
tantiachimanchic.
Ñawiyu cayalꞌa,
rasunpa allincäta tantiapäcunquimanmi.
23 Mana ñawiyu cayalćha ichá,
mana tantiapäcunquimanchu tutapäćhu cayä-yupaypis.
Chaynu tutapäćhu cayalꞌa ¡maynu maynu yanawyayä tutapäñaćhari cayan!
Ishcayta sirbiypïtam
24 “Manam mayanpis ishcay patruntá sirbinmanchu.
Juccätam ćhïninman,
juccätam cuyanman;
juccätam jamuyanman,
juccätam wätanman.
Chaynütacmi amcunapis nï Diostawan cäniquita jucllaćhu sirbinquimanchu.
Diosninchicmi chulinta licaycun
25 “Chayurá niycälic:
Ama ‘¿Imactalä micuśhä,
imactalä upyaśhä,
imawanlä müdacuśhä?’
nil llaquicuyalcaychu.
Bïdayquim mas bälin cay micuycäpïtá;
aychayquim mas bälin cay müdanapïtá.
26 Má,
pinsaycäliy imaymana pishucunäman.
Paycunap manam talpuynin nï cusichan nï pilwan nï imanpis canchu.
Jinaptinpis janay pachaćhu cä Taytanchicmi paycunactá micachin.
¿Manachun mas ćhaniyu cay pishucunapïta capäcunqui imatá?
27 Maynu wañupacuyalpis ¿mayantá juc üra masllactapis cawsayninta aśhuycachinman?
28 “Müdanayquicunapïtapis ¿imapïtan llaquicuyalcanqui?
Má,
licapäcuy imaymana waytacunäta.
Manam puchcacunchu nï awacunchu.
Ñatac Diosninchicmi tuqui-tuquicta waytachin.
29 Rasunpa,
unay puydï mandacü Salomonpis manam mayannin waytanüpis llipyayä müdanawan calachu.
30 Waytacunacá wala śhalun chaquillam,
ñatac chaynütapis Diosninchicmi tuquicta müdachin.
¿Chaychun ampá amcunacta mana müdachipäcuśhunquimanchu,
mana chalapacuyniyu nunacuna?
31 “Chayurá ama ‘¿Imactalä micuśhä,
imactalä upyaśhä,
imawanlä müdacuśhä?’
nil llaquicuyalcaychu.
32 Diosman mana chalapacücunallam chaynu wañupaculcan.
Amcunapñatacmi ichá janay pachäćhu cä Tayta Diosniqui ima pishipacuśhayquitapis yaćhayanña.
33 Aśhwanpa wañupaculcay paypa gubirnullanćhu canayquipä,
jinaman munayninćhu cawsapäcunayquipäpis.
Jinaptiquiꞌa lluy pishipaculcäśhayquitapis uycälishunquim.
34 Chayurá amatac ‘¿Wälaman imalä ćhämanꞌa?’
nil llaquicuyalcaychu.
Chay wala muyuncuna quiquillanmá imanuy canantapis licacuycunꞌa.
Chayćhu imaymana sasachacuyniyü-cama ćhämumaptinchicmi licaycunapä canꞌa.