Anćhish ćhunca ishcayniyümi willacalcänanpä caćhaśha
10
Chaypïta Jesus anćhish ćhunca ishcayniyütaa aclalculmi ishcay-ishcay puntachila linancunäman.
2 Chayćhümi nila:
“Cusichananchic alli-allimari cacuyan;
apaycücunäñatacmi ichá ashlla.
Chaymi Duyñunta mañaculcänayqui cusichäcunacta caćhaycamunanpä.
Lucas 10.1-42
3 “Má,
Canan amcunacta caćhalcac atücunap ćhawpinmanmi uwishta-yupaypis.
4 Lipäcul yanꞌal-lätac luncuyquita,
illayniquita,
cambiacunayquipä śhucuyniquitapis apayalcanquiman.
Wayrallam lipäcunqui.
Caminu pulï nunacunawan tincul yanꞌal-lätac gänaśh limacunquiman.
5 Mayanpa wasinmanpis ćhalꞌa ‘Diosninchic jawcallacta caycachishunqui’ nilmi duyñunta saludaycälinqui.
6 Chay wasiyu allin nuna-cama captinꞌa cay niycuśhayquinümi lulacacunꞌa.
Shimi puntallanpa ćhasquishuptiquiꞌa Diospa yanapaynin amllawanmi caycunꞌa.
7-8 “May malcamanpis lipäcuptiqui allinpa ćhasquiycälishuptiquiꞌa chay yaycuycuśhayqui wasillaćhümi quïdapäcunqui.
Amam wasin-wasin yanꞌal pulipäcunquichu.
Imallactapis uycuśhuśhayquitá mana pinꞌacullal awnilmi micacalpälinqui,
upyacalpälinqui.
Lulapacücá lulaśhanpi ćhasquiycunanmi.
9 “Chaynütacmi ishyänincunactapis sänaycachipunqui.
Ñatac paycunactam:
‘Diospa gubirnunꞌa janayquićhüñam cayan’ nil niycälinqui.
10-11 Sïchuśh chay malcäćhu mana ćhasquipäcuśhuptiquiꞌa chayurá cälliman yalalcamul:
‘Cunca cuchuyniquiñaćh canꞌa.
Ćhaquïman laꞌamä pulbullayquitapis manamá apayächu.
Tuquicta yaćhapäcuy:
¡Diospa gubirnunꞌa janayquićhüñamari cayan!’
nil tapsiculcanqui.
12 Rasunpa,
cäraycunan muyuncäćhuꞌa Sodoma malcapïtapis mas mućhuycachishalämi chay malcacá canꞌa.
¡Imanuylä canꞌa mana chalapacücunacá!
13 “¡Imanuylä capäcunqui Corazin malca!
¡Imanuylä capäcunqui Betsaida malca!
Amcunaćhu milagru lulaśhäta Tirowan Sidon licapäcunman cala.
Chayürallaćh juchanpi wanaculcal sumä pinꞌacuywan llaquicuywan Diospa ñawpäninćhu uyshuläpacunman cala.
14 Chayurá rasunpa cäraycunan muyuncäćhuꞌa Tirowan Sidon amcunapïta mïnus mućhuycachishalämi capäcunꞌa.
15 Ñatac amcunapis Capernaum malca ‘Altuman juluśhaćh capäcuśhä’ niyalcanquićh.
Aśhwanpa allpäpa lulïninmanlämi wicapäśha capäcunquipis” nila.
16 Nilculmi yaćhapacünincunacta:
“Cay nishäta uyalipämay.
Willaśhayquita ćhasquïcunacá,
yaꞌactam uyaliyalcäman.
Chaynütac mana ćhasquishüniquicunacá yaꞌactamari mana ćhasquipämanchu.
Chaynu yaꞌacta mana ćhasquimäcunacá caćhamäní Taytätapis manatacmi ćhasquinchu” nila.
Anćhish ćhunca ishcayniyu caćhaśhancunämi cutipämun
17 Chay nilcuptinmi chay anćhish ćhunca caćhaśhancunaca liculcal cutïlälimula unaypïtá sumä cushisha-cama.
Chayćhümi nipäcula:
“Taytay,
aśhta achatucunapis lluymi cäsüläliman ampa śhutiquita limapäcuptiꞌa” nil.
18 Nipäcuptinmi nila:
“Aw,
Satanaśhpa tucuy gubirnun waclinuy juclla chincacuśhantam yaꞌa licalá.
19 Rasunpa,
chaypämi yaꞌa pudirnïta upäculac.
Chaymi aśhta culibraycunapis,
ćhupa apaläcucunapis jalupäcuptiquipis mana imanapäcuśhunquipischu.
Chaynütacmi imaymana Satanaśhpa pudirnintapis mana cäman muyuchipäcunqui.
20 Chay satanaśhcunaca cäsupäcuśhuśhayquipïta cushiculcänayquitá aśhwanpa cushiculcay altu sïlućhu śhutiquicuna ñä asintäśha caśhanpïta” nil.
Jesusmi yaćhapacücunäpi Diosta anradisicun
21 Chayćhümi Jesus Chuya Ispirituwan sumä cushisha nila:
“Alawaycucmi janay pachäćhu cay pachäćhu cä Tayta Diosní.
Lluy yaćhayniyu,
umayu nunacunäpi caycuna pacaycuśhayquitam tantiaycachinqui mana cäpa licaśha nunacunäman.
Aw,
Taytay,
caynu canantam munalanqui” nil.
22 Chaypïtam nunacunäta nila:
“Taytämi yaꞌap maquïman ćhulaycamula cay lluy munaytapis yaćhaytapis.
Taytallämá yaćhan paypi śhamüśha caśhäta.
Chaynütacmi yaꞌalla yaćhá pay mayan caśhantapis.
Chaymi mayantapis lisiycachishäcälla Taytäta lisipäcunꞌa” nil.
23 Chay nilculmi yaćhapacünincunallacta japä nila:
“Cay licaśhayquipi cushisha capäcuy.
24 Rasunpa achca unay mandacücunäwan Diospa willacünincunam ichá maynu wañupacuyalcalpis caycunacta mana licaycälilachu nï uyaliycälilapischu” nil.
Jesusmi Samaria-lädu llaquipayniyu nunapi willan
25 Chaypïmi camachicuyta yaćhachicüca yaćhapänan-laycu Jesusta tapula:
“Yaćhachicü taytay,
¿imactatan lulaycüman wiñay simpri cawsanäpä?”
nil.
26 Niptinmi quiquinta tapula:
“¿Imanintan Moisespa camachicuyninćhu lïgiptiqui?”
nil.
27 Niptinmi:
“ ‘Tayta Diosllayquiman tucuy śhunꞌuyquitapis,
llapan pinsayniquitapis,
lluy callpayquitapis ćhulaycuy.
Ñatac nuna-masiquita tucuy śhunꞌuyquiwan quiquiquitanuy cuyacuywan licaycuy’ niyanmi” nila.
28 Niptinmi:
“Allintam niyanqui.
Chaycunacta lulalꞌa wiñay simpripämi cawsanqui” nin.
29 Niptinmi “¿Caychun upällächimanman?”
niycänu tapulañatac:
“Nimay rasuncäta.
¿Ima nunapïtan niyanqui?”
nil.
30 Niptinmi nila:
“Má,
canan uyalimay.
Juc nunash Jerusalenpïta Jericó malcaman liñä.
Chay liyaptinshi caminućhu suwacuna lluy maꞌalcul calapatäla.
Jinalculshi pasaypictaña jitalayäta caćhaycul liculcäla.
31 Chaypi unascactash licalïmun juc allin rispitaśha sasirdüti.
Jinalshi chay jitalayä nunäta licalcullal pasacun mana llaquipaycul ima.
32 Chay unay ipantañatacshi sasirdütip yanapänin Leví caśhta nunapis licalïmun.
Chaypis chaynütacshi pasacun licalcul licalcul juc-lädunpa.
33 Chay jina ipanmanñatacshi licalïmun jamuyäcuśhan Samaria-lädu nuna.
34 Payshi chay nunäta licälul-pacha śhunꞌunpis alalaycuptin yanapaycü cürriycula.
Jinalculshi lluy dañäduncunacta asaytinwan bïnu rimidyunwan jampiycula.
Jinayculshi intiru dañädunta lataśhwan wataycul uywanman sillacalcachil apala juc wasiman chayćhu cuydaycunanpä.
35 Chay walantinñatacshi licunanpä chay wasiyücäta illayta pägaycul nila:
‘Cay nunäta cuydaycul ima nisidällantapis alcansaycapällämanqui.
Maychica gastaptiquipis cutimulmi yaꞌa cutiycachishayqui’ ” nil.
36 Cayta nilculmi Jesus tapula:
“Má nimay,
cay quimsanpïta ¿mayannintan chay nunäta cuyala?”
nil.
37 Niptinmi tapucü nunaca nila:
“Llaquipaycul lluy dañäduncunacta jampiycücäćhari” nil.
Niptinmi:
“Chayurá ampis paynu-ari lulamuy” nila.
Jesusmi Martactawan Mariacta watucun
38 Chaypïtam Jesus llapa yaćhapacünincunawan Jerusalenman pasayal juc tacsa malcallaman ćhälälin.
Chayćhümi Marta śhutiyu walmi jamachila.
39 Chayćhu Jesus yaćhachiptinmi ñañan Maria ima lulaynintapis caćhaycul Jesuspa ñawpäninman taycucuycul gänaśhwan uyalila.
40 Martañatacmi ichá lulayninćhu mastá afanädu-afanädu cacuyan.
Chaymi Jesusta nila:
“Taytay,
¿ampá allinchun cay ñañá mana imallactapis yanapämal yanꞌal cayäśhan?
Niycullay-ari yanapämänanpä” nil.