6-7 A vin̈aj Abiam chiꞌ, ix yacꞌn̈ej oval vin̈ yedꞌ vin̈aj Jeroboam chiꞌ, icha scꞌulejnac vin̈aj Roboam smam vin̈. A yabꞌixal vin̈aj Abiam chiꞌ yedꞌ masanil tas scꞌulejnac vin̈, tzꞌibꞌabꞌilcan bꞌaj aycan yabꞌixal ebꞌ vin̈ sreyal Judá. 8 Axo yic ix cham vin̈, ix mucji vin̈ dꞌa schon̈abꞌ vin̈aj David, axo jun vin̈ yuninal vin̈ scuchan Asa ix ochcan reyal sqꞌuexuloc.

9 A vin̈aj Asa, ix schael yich vin̈ yacꞌan reyal dꞌa Judá, a val yic 20 abꞌil yoch vin̈aj Jeroboam chiꞌ reyal dꞌa Israel. 10 A vin̈aj Asa chiꞌ, 41 abꞌil ix yacꞌ reyal vin̈ dꞌa Jerusalén. Maaca sbꞌi ix snun chichim vin̈, yisil ix vin̈aj Abisalom.

11 Te vachꞌ tas ix scꞌulej vin̈aj rey Asa chiꞌ dꞌa yichan̈ Jehová, icha val ix scꞌulej vin̈aj rey David smam icham vin̈. 12 Ix spechel masanil ebꞌ vin̈ vinac vin̈ dꞌa yol smacbꞌen chiꞌ, aton ebꞌ vin̈ scꞌulan ajmulal yedꞌ yetvinaquil dꞌa juntzan̈ lugar bꞌaj tzꞌoch ejmelal. Masanil juntzan̈ yechel comon dios ix sbꞌo ebꞌ smam yicham vin̈, ix laj satpaxel vin̈. 13 Ix yiqꞌuel snivanil yelcꞌoch ix snun chichim vin̈, aton ix Maaca. Ix schecpax vin̈ macꞌjocpoj jun yechel Asera yajbꞌentac yacꞌnac bꞌo ix snun chichim chiꞌ, ix schecan n̈usjoctzꞌa vin̈ dꞌa stiꞌ aꞌ Cedrón. 14 Vachꞌchom maj yiqꞌuel vin̈ masanil juntzan̈ lugar yic ejmelal dꞌa juntzan̈ lugar chaan̈, palta te vachꞌ ix yutej spensar vin̈ dꞌa yichan̈ Jehová dꞌa masanil tiempo. 15 Ix yacꞌanpaxcanoch qꞌuen oro vin̈ yedꞌ qꞌuen plata bꞌaj sicꞌchajcan tas tzꞌacꞌji yicoc Jehová yedꞌ juntzan̈xo yamcꞌabꞌ ix yacꞌcan vin̈ smam vin̈ yedꞌ pax juntzan̈ ix sbꞌo vin̈.

16 Ayn̈ej oval dꞌa scal vin̈aj Asa sreyal Judá yedꞌ vin̈aj Baasa sreyal Israel. 17 Ix cot vin̈aj Baasa yacꞌ oval dꞌa Judá, ix och ijan vin̈ sbꞌoan scuartel dꞌa chon̈abꞌ Ramá, yic smacan bꞌe vin̈ yic vachꞌ man̈xa mach syal scꞌoch dꞌa Judá chiꞌ. 18 Yuj chiꞌ, axo vin̈aj Asa chiꞌ ix icꞌanelta masanil qꞌuen oro yedꞌ qꞌuen plata sicꞌbꞌiltocan dꞌa yol stemplo Jehová yedꞌ dꞌa spalacio vin̈. Ix schecanbꞌat ebꞌ ayoch dꞌa yopisio yedꞌ vin̈ yic sbꞌat yacꞌancan qꞌuen chiꞌ ebꞌ dꞌa vin̈aj Ben-adad sreyal Siria cajan dꞌa Damasco, aton vin̈ yuninal vin̈aj Tabrimón, yixchiquin vin̈aj Hezión. A yedꞌ qꞌuen tumin chiꞌ, ix yalanbꞌat vin̈ dꞌa vin̈aj Ben-adad chiꞌ icha tic: 19 Co bꞌo junoc co trato, icha scꞌulejnac ebꞌ co mam quicham. Tic svacꞌbꞌat qꞌuen oro yedꞌ qꞌuen plata in silabꞌoc dꞌayach. Acꞌ lajvoc a trato yedꞌ vin̈aj Baasa sreyal Israel yic ol yactej vin̈ yacꞌan oval vedꞌoc, xchibꞌat vin̈aj Asa chiꞌ.

20 Ix scha scꞌol vin̈aj Ben-adad chiꞌ tas ix yalbꞌat vin̈aj rey Asa chiꞌ, yuj chiꞌ ix scheccot ebꞌ soldado vin̈ yacꞌ oval dꞌa yol yic Israel. Aton juntzan̈ chon̈abꞌ tic ix yacꞌ ganar ebꞌ soldado vin̈ chiꞌ: Ijón, Dan, Abel-bet-maaca yedꞌ masanil Cineret yedꞌ masanil smacbꞌen Neftalí. 21 Ayic ix yabꞌan vin̈aj Baasa icha chiꞌ, ix yactan vin̈ sbꞌoanqꞌue chon̈abꞌ Ramá, ix meltzaj vin̈ dꞌa chon̈abꞌ Tirsa. 22 Yuj chiꞌ ix smolbꞌej masanil ebꞌ vin̈ aj Judá vin̈aj rey Asa chiꞌ, man̈xa junoc mach maj cꞌochoc. Ix yicꞌancot jantac qꞌuen qꞌueen ebꞌ yedꞌ te teꞌ, aton juntzan̈ chiꞌ van yacꞌanoch vin̈aj Baasa yic sbꞌoanqꞌue chon̈abꞌ Ramá chiꞌ. Axo yedꞌ juntzan̈ chiꞌ ix sbꞌoqꞌue scuartel vin̈aj rey Asa chiꞌ dꞌa chon̈abꞌ Geba dꞌa yol yic Benjamín yedꞌ dꞌa chon̈abꞌ Mizpa.

23 A jantacto yabꞌixal vin̈aj Asa, juntzan̈ oval ix yacꞌ ganar vin̈, masanil tas ix scꞌulej vin̈ yedꞌ juntzan̈ chon̈abꞌ ix sbꞌoqꞌue vin̈, tzꞌibꞌabꞌilcan bꞌaj aycan yabꞌixal ebꞌ vin̈ sreyal Judá.

Axo yic ichamxo vin̈, ix och jun yabꞌil dꞌa yoc vin̈. 24 Ayic ix cham vin̈, ix mucji vin̈ dꞌa schon̈abꞌ vin̈aj rey David bꞌaj mucan ebꞌ smam yicham. Axo vin̈ yuninal vin̈ scuchan Josafat ix ochcan reyal sqꞌuexuloc.

25 Ayic schabꞌilxo abꞌil yoch vin̈aj Asa reyal dꞌa Judá, ix schaanel yich vin̈aj Nadab yuninal vin̈aj Jeroboam yacꞌan reyal dꞌa Israel, chabꞌ abꞌil ix yacꞌ reyal vin̈. 26 Te chuc tas ix scꞌulej vin̈ dꞌa yichan̈ Jehová. A sbꞌeybꞌal vin̈ smam vin̈ ix sbꞌeybꞌalej, aton vin̈ cuchbꞌannacbꞌat ebꞌ israel dꞌa chucal. 27-28 Palta axo vin̈aj Baasa yuninal vin̈aj Ahías yin̈tilal Isacar ix och ajcꞌolal dꞌa vin̈aj Nadab chiꞌ. Ayic ix yacꞌan oval vin̈aj Nadab yedꞌ ebꞌ soldado Israel dꞌa chon̈abꞌ Gibetón, dꞌa yol yic ebꞌ filisteo, ataꞌ ix miljicham vin̈ yuj vin̈aj Baasa chiꞌ. Yuj chiꞌ ayic yoxilxo abꞌil yoch vin̈aj Asa reyal dꞌa Judá, ix schaanel yich vin̈aj Baasa chiꞌ yacꞌan reyal dꞌa chon̈abꞌ Israel. 29 An̈ej val yic ix och vin̈ reyal chiꞌ, ix smilancham masanil yin̈tilal vin̈aj Jeroboam chiꞌ vin̈, pilan ix cham ebꞌ yuj vin̈, man̈xa junoc ebꞌ ix cani, icha yalnaccan vin̈aj Ahías schecabꞌ Jehová aj Silo. 30 Ix uji jun tic yuj smul vin̈aj Jeroboam ix yacꞌochi ayic ix scuchbꞌanbꞌat ebꞌ yetisraelal vin̈ dꞌa chucal. Yuj chiꞌ ix stzuntzajcot yoval scꞌol Jehová sDiosal chon̈abꞌ Israel yuj vin̈.

31 A jantacto yabꞌixal vin̈aj Nadab yedꞌ masanil tas ix scꞌulej, tzꞌibꞌabꞌilcan bꞌaj aycan yabꞌixal ebꞌ vin̈ sreyal Israel. 32 Ix ochn̈ej oval dꞌa scal vin̈aj Asa sreyal Judá yedꞌ vin̈aj Baasa sreyal Israel.

33 Ayic yoxilxo abꞌil yoch vin̈aj Asa reyal dꞌa Judá, ix schaanel yich vin̈aj Baasa yuninal vin̈aj Ahías yacꞌan reyal dꞌa Israel, dꞌa chon̈abꞌ Tirsa. 24 abꞌil ix yacꞌ reyal vin̈. 34 Masanil tas ix scꞌulej vin̈, te chuc dꞌa yichan̈ Jehová, icha scꞌulejnac vin̈aj Jeroboam, aton vin̈ cuchbꞌannacbꞌat ebꞌ israel dꞌa chucal.