A strato vin̈aj Asa yedꞌ vin̈aj Ben-adad
16
Ayic 36 abꞌilxo yoch vin̈aj Asa reyal, ix cot vin̈aj Baasa sreyal Israel yacꞌ oval dꞌa Judá. Ix schaanel yich vin̈aj Baasa chiꞌ sbꞌoanoch smuroal chon̈abꞌ Ramá yic smacan bꞌe vin̈ yic man̈xa mach scꞌoch dꞌa yol yic Judá chiꞌ. 2 Yuj chiꞌ ix yiqꞌuelta masanil qꞌuen oro yedꞌ qꞌuen plata vin̈aj rey Asa chiꞌ dꞌa stemplo Jehová yedꞌ qꞌuen ay dꞌa spalacio vin̈, ix yacꞌanbꞌat qꞌuen vin̈ dꞌa vin̈aj Ben-adad sreyal Siria cajan dꞌa Damasco. Ix yalanbꞌat vin̈ icha tic: 3 Co bꞌo junoc co trato, icha yutejnac sbꞌa ebꞌ vin̈ co mam. Tic svacꞌbꞌat qꞌuen oro yedꞌ qꞌuen plata dꞌayach. Acꞌ lajvoc a trato yedꞌ vin̈aj Baasa sreyal Israel, yic vachꞌ tzꞌoch vaan vin̈ yacꞌan oval dꞌayin, xchibꞌat vin̈aj Asa chiꞌ.4 Ix scha scꞌol vin̈aj Ben-adad tas ix yal vin̈aj rey Asa chiꞌ, yuj chiꞌ ix schecancot juntzan̈ ebꞌ soldado vin̈ yedꞌ ebꞌ yajalil yic scot ebꞌ yacꞌ oval dꞌa juntzan̈ chon̈abꞌ yic Israel. Ix yacꞌan ganar chon̈abꞌ Ijón ebꞌ, chon̈abꞌ Dan, chon̈abꞌ Abel-naim yedꞌ juntzan̈ chon̈abꞌ bꞌaj sicꞌchajcan ixim trigo dꞌa yol yic Neftalí. 5 Ayic ix yabꞌan jun chiꞌ vin̈aj Baasa chiꞌ, ix yactan vin̈ sbꞌoanqꞌue Ramá chiꞌ yuj scolan schon̈abꞌ. 6 Ix yicꞌanbꞌat masanil anima vin̈aj rey Asa chiꞌ, aton ebꞌ ay dꞌa yol yic Judá, ix bꞌat yicꞌancot qꞌuen qꞌueen ebꞌ yedꞌ te teꞌ toxo ix smolbꞌej vin̈aj Baasa bꞌaj van sbꞌoanqꞌue Ramá chiꞌ. Axo yedꞌ juntzan̈ chiꞌ ix sbꞌoqꞌue smuroal chon̈abꞌ Geba yedꞌ chon̈abꞌ Mizpa ebꞌ.
7 A dꞌa jun tiempoal chiꞌ, ix javi jun vin̈ schecabꞌ Dios scuchan Hanani dꞌa vin̈aj rey Asa chiꞌ, ix yalan vin̈ icha tic: A ebꞌ soldado yic Siria ix acꞌoch yipoc a cꞌool, man̈oc Jehová, yuj chiꞌ toxo ix el ebꞌ dꞌa yol a cꞌabꞌ. 8 ¿Tom maxtzac a nacoti ayic yacꞌannac oval ebꞌ aj Etiopía yedꞌ ebꞌ aj Libia edꞌoc? Man̈xo jantacoc ebꞌ soldado, nocꞌ chej yedꞌ jantac carruaje yic oval yedꞌnac ebꞌ, palta acꞌnac ganar ebꞌ yuj Jehová, yujto a acꞌnacoch yipoc a cꞌool. 9 Yujto a Jehová syiln̈ej masanil tas tzuji dꞌa yolyibꞌan̈qꞌuinal tic, schꞌoxan spoder dꞌa ebꞌ tojol syutej spensar dꞌay, tato syacꞌoch ebꞌ yipoc scꞌool sicꞌlabꞌil. Axo ticnaic, a jun tas ix a cꞌulej tic, lajan val icha scꞌulej junoc anima malaj spensar. Yuj chiꞌ, a ticnaic yedꞌ ol bꞌeyn̈ej tiempo, ayn̈ej ebꞌ ol acꞌan oval edꞌoc, xchi vin̈ schecabꞌ Dios chiꞌ dꞌa vin̈.
10 Ix cot yoval vin̈aj rey Asa chiꞌ sicꞌlabꞌil dꞌa vin̈ schecabꞌ Dios chiꞌ, ix schecan vin̈ acꞌchajoch vin̈ dꞌa preso. An̈ejaꞌ dꞌa jun tiempoal chiꞌ, tzijtum ebꞌ dꞌa yol chon̈abꞌ chiꞌ ix acꞌjioch syaelal yuj vin̈.
A schamel vin̈aj rey Asa
11 A jantacto yabꞌixal vin̈aj rey Asa, ayic ix el yich masanto ix lajvi, aycan bꞌaj tzꞌibꞌabꞌilcan yabꞌixal ebꞌ sreyal Judá yedꞌ ebꞌ sreyal Israel. 12 Ayic 39 abꞌilxo yoch vin̈ reyal, ix och jun ilya te ov dꞌa yoc vin̈, palta maj sna sbꞌa scꞌol vin̈ yuj jun yaelal chiꞌ, man̈oc dꞌa Jehová ix yal sbꞌa vin̈, palta to a dꞌa ebꞌ an̈tum bꞌaj ix bꞌat vin̈. 13 Ayic ix tzꞌacvi 41 abꞌil yoch vin̈ reyal, ix cham vin̈. 14 Ix mucji vin̈ bꞌaj ix schec bꞌojoc yedꞌtal dꞌa schon̈abꞌ vin̈aj David. Nivan perfume ix yacꞌoch ebꞌ dꞌa yibꞌan̈ bꞌaj ix bꞌachchaj snivanil vin̈, ix och pax masanil macan̈il tas sucꞌuqꞌui sjabꞌ dꞌa vin̈, aton tas te vachꞌ yaj sbꞌoi. Ix yacꞌanoch jun nivan cꞌacꞌ ebꞌ yic schꞌoxanel ebꞌ to nivan yelcꞌoch vin̈ dꞌa sat ebꞌ.