3 Ix och val Jehová yedꞌ vin̈aj Josafat chiꞌ, yujto a tas sbꞌeybꞌalejnac vin̈aj David smam yicham vin̈ dꞌa sbꞌabꞌelal, a chiꞌ ix sbꞌeybꞌalej vin̈. Maj yacꞌlaj servil juntzan̈ yechel Baal vin̈, 4 palta to a Jehová sDiosal smam yicham vin̈ ix yacꞌ servil, ix scꞌanabꞌajej val schecnabꞌil Dios chiꞌ vin̈. Man̈oc sbꞌeybꞌal ebꞌ ay dꞌa chon̈abꞌ Israel ix sbꞌeybꞌalej vin̈. 5 Yuj chiꞌ a Jehová ix acꞌan val tecꞌcꞌaj vin̈ dꞌa yopisio chiꞌ. Masanil ebꞌ aj Judá chiꞌ, ix siej tastac ebꞌ dꞌa vin̈, yuj chiꞌ ix te qꞌuechaan̈ sbꞌeyumal vin̈, te nivan ix aj yelcꞌoch vin̈. 6 Ix yacꞌ val och vin̈ dꞌa scꞌol sbꞌeybꞌalan scꞌaybꞌubꞌal Jehová, ix schecan vin̈ icꞌchajel juntzan̈ yic ejmelal bꞌajtac chaan̈ yedꞌ masanil juntzan̈ yechel Asera dꞌa yol smacbꞌen Judá chiꞌ.

7 Ayic yoxil abꞌilxo yoch vin̈ reyal chiꞌ, ix schecanbꞌat juntzan̈ ebꞌ vin̈ sat yajal vin̈: Aton vin̈aj Ben-hail, vin̈aj Abdías, vin̈aj Zacarías, vin̈aj Natanael yedꞌ vin̈aj Micaías yic scꞌaybꞌaj masanil ebꞌ anima yuj ebꞌ vin̈ dꞌa scꞌaybꞌubꞌal Jehová dꞌa yol smacbꞌen Judá chiꞌ. 8 Ix bꞌatpax juntzan̈ ebꞌ vin̈ levita tic yedꞌ ebꞌ vin̈: Aton vin̈aj Semaías, vin̈aj Netanías, vin̈aj Zebadías, vin̈aj Asael, vin̈aj Semiramot, vin̈aj Jonatán, vin̈aj Adonías, vin̈aj Tobías yedꞌ vin̈aj Tobadonías, yedꞌ pax ebꞌ vin̈ sacerdote, aton vin̈aj Elisama yedꞌ vin̈aj Joram. 9 Ix checjibꞌat ebꞌ vin̈ yedꞌ chꞌan̈ yumal scꞌaybꞌubꞌal Jehová, yic sbꞌat cꞌaybꞌaj ebꞌ anima dꞌa masanil chon̈abꞌ dꞌa yol yic Judá chiꞌ yuj ebꞌ vin̈.

10 Yuj chiꞌ, masanil anima dꞌa juntzan̈ nación dꞌa slacꞌanil Judá chiꞌ, ix xiv ebꞌ dꞌa Jehová, majxo stecꞌbꞌej sbꞌa ebꞌ yacꞌan oval yedꞌ vin̈aj Josafat chiꞌ. 11 Axo ix aji, ay ebꞌ filisteo ix icꞌancot tas yic siej ebꞌ dꞌa vin̈aj Josafat chiꞌ, ix yicꞌpaxcot qꞌuen plata ebꞌ, icha qꞌuen tumin tzꞌacꞌjioch dꞌa yibꞌan̈ ebꞌ yacꞌani. Yedꞌ pax ebꞌ árabe, ix yicꞌcot 7 mil 700 nocꞌ chꞌac calnel ebꞌ, icha pax chiꞌ sbꞌisul nocꞌ chiva ix yicꞌcot ebꞌ.

12 Icha val chiꞌ ix aj yicꞌan yip yopisio vin̈aj Josafat chiꞌ. Ix schecan vin̈ bꞌochajqꞌue juntzan̈ chon̈abꞌ tzꞌoch smuroal dꞌa yol smacbꞌen Judá chiꞌ yedꞌ juntzan̈ chon̈abꞌ bꞌaj sicꞌchajcan tastac svaji. 13 Man̈ jantacoc tas svaji sicꞌan yuj vin̈ dꞌa masanil yol smacbꞌen Judá chiꞌ, ay pax ebꞌ soldado te jelan ayecꞌ dꞌa Jerusalén. 14 Aton sbꞌi ebꞌ vin̈ yajal yaj dꞌa ebꞌ soldado tic icha syal yin̈tilal ebꞌ vin̈:

A vin̈aj Adnas yajal yaj dꞌa 300 mil soldado te jelan dꞌa yin̈tilal Judá. 15 Axo vin̈aj Johanán yajal yaj dꞌa 280 mil soldado. 16 Axo vin̈aj Amasías yuninal vin̈aj Zicri, ix el val dꞌa scꞌol vin̈ yacꞌanoch sbꞌa yacꞌan servil Jehová, a vin̈ yajal yaj dꞌa 200 mil soldado te jelan.

17 Axo vin̈aj Eliada yajal yaj dꞌa ebꞌ soldado yin̈tilal Benjamín, aton ebꞌ te jelan dꞌa oval, 200 mil sbꞌisul ebꞌ, yedꞌnac sjul-labꞌ ebꞌ yedꞌ maclabꞌ jul-labꞌ chiꞌ. 18 Axo vin̈aj Jozabad yajal yaj dꞌa 180 mil soldado lista yaj yedꞌ syamcꞌabꞌ yic oval. 19 Masanil ebꞌ tic ayoch ebꞌ dꞌa yalan̈ smandar vin̈ rey chiꞌ. Man̈ ayoc ochlaj ebꞌ ay dꞌa juntzan̈ chon̈abꞌ ayoch smuroal dꞌa yol yic Judá stzꞌacubꞌoc ebꞌ tic.