Ix sqꞌuex sbꞌeybꞌal ebꞌ anima yuj vin̈aj Asa
15
A jun vin̈ scuchan Azarías yuninal vin̈aj Obed, ix och Yespíritu Dios dꞌa vin̈, 2 ix elta vin̈ schaꞌ vin̈aj Asa chiꞌ, ix yalan vin̈ icha tic dꞌa vin̈: Mamin Asa, abꞌ tas ol val dꞌayach yedꞌ dꞌa e masanil ex vetchon̈abꞌ aj Judá yedꞌ ex yin̈tilal Benjamín: A Jehová ayoch quedꞌoc tato ayon̈ och tzacꞌan yuuj. Tato an̈ej dꞌay tzon̈ tevi, ol tacꞌvocn̈ej dꞌayon̈, palta tato ol cactejcan jun, ol on̈ yactejpaxcani. 3 Nivanxo tiempo to man̈xooc Dios te yel ayoch quedꞌoc, man̈xa ebꞌ sacerdote tzꞌacꞌan cꞌaybꞌubꞌal, man̈xa ley. 4 Axo ix javi yaelal dꞌa quibꞌan̈, ix cacꞌanxioch co bꞌa dꞌa yol scꞌabꞌ Jehová co Diosal, ix on̈ scolanxi. 5 Ayic mantzac cacꞌoch co bꞌa dꞌa yol scꞌabꞌ chiꞌ, man̈xalaj junoc mach juncꞌolal sbꞌeyeqꞌui, yujto te nivan yaelal ayoch dꞌa yibꞌan̈ masanil anima dꞌa yolyibꞌan̈qꞌuinal tic. 6 Ay ebꞌ anima ix laj satlajel sbꞌa, ay pax juntzan̈ chon̈abꞌ ix satanel juntzan̈xo chon̈abꞌ, yujto a Dios ix acꞌan somchaj ebꞌ yuj juntzan̈ nivac yaelal chiꞌ. 7 Palta a ex tic, tecꞌan tzeyutej e bꞌa, man̈ eyacꞌ chabꞌax e cꞌool, yujto a Jehová ol pactzitan e munlajel tic, xchi vin̈ dꞌa ebꞌ.8 Ayic ix yabꞌan vin̈aj Asa tas ix yal vin̈ schecabꞌ Dios chiꞌ, ix stecꞌbꞌan val sbꞌa vin̈. Ix schecan vin̈ icꞌchajel masanil juntzan̈ comon dios yajbꞌentac dꞌa yichan̈ Jehová ay dꞌa yol smacbꞌen Judá, dꞌa yol yic Benjamín yedꞌ dꞌa yoltac juntzan̈ chon̈abꞌ ix yiqꞌuecꞌ vin̈ dꞌa tzalquixtac dꞌa yol yic Efraín. Ix schecan vin̈ bꞌochajxi jun altar ay dꞌa yamaqꞌuil stemplo Jehová. 9 Ix lajvi chiꞌ, ix smolbꞌan masanil anima vin̈, ebꞌ ay dꞌa yol yic Judá chiꞌ, dꞌa yol yic Benjamín yedꞌ juntzan̈xo ebꞌ cotnac dꞌa yol yic Efraín, dꞌa yol yic Manasés yedꞌ dꞌa yol yic Simeón, aton ebꞌ javinac cajan dꞌa scal ebꞌ, yujto tzijtum ebꞌ cajan dꞌa yol smacbꞌen vin̈aj Jeroboam ix javi cajan dꞌa yol smacbꞌen Judá yujto ix yil ebꞌ to ayoch Jehová Dios yedꞌ vin̈aj Asa chiꞌ.
10 Axo dꞌa yoxil ujal yic 15 abꞌilxo yoch vin̈aj Asa chiꞌ reyal, ix smolbꞌan sbꞌa masanil ebꞌ dꞌa Jerusalén. 11 A dꞌa jun cꞌu chiꞌ, ix yacꞌ silabꞌ ebꞌ dꞌa Jehová. 700 nocꞌ vacax yedꞌ 7 mil nocꞌ calnel ix yacꞌ ebꞌ. Aton nocꞌ chiꞌ ix yicꞌcanecꞌ ebꞌ dꞌa ebꞌ ajcꞌool dꞌa oval. 12 Ataꞌ ix yacꞌ stiꞌ ebꞌ to an̈ej Jehová sDiosal ebꞌ yedꞌ ebꞌ smam yicham, ol yacꞌ servil ebꞌ yedꞌ smasanil scꞌool. 13 Ix yacꞌ pax stiꞌ ebꞌ, tato ay mach to man̈oc Jehová Dios syacꞌ servil, vachꞌchom icham anima, ma unin, vinac, ma ix, yovalil schami. 14 Ix el yav ebꞌ yuj tzalajcꞌolal ayic ix yacꞌan stiꞌ ebꞌ dꞌa Jehová, ix spuꞌan qꞌuen strompeta ebꞌ yedꞌ nocꞌ chꞌaac. 15 Masanil ebꞌ ay dꞌa smacbꞌen Judá chiꞌ ix tzalaj val ebꞌ yuj bꞌaj ix yacꞌ stiꞌ chiꞌ dꞌa smasanil scꞌool, ix el val dꞌa scꞌol ebꞌ yacꞌan servil Jehová. Yuj chiꞌ ix colvaj Jehová chiꞌ yedꞌ ebꞌ, juncꞌolal ix aj ebꞌ yedꞌ masanil chon̈abꞌ ay dꞌa slacꞌanil.
16 An̈ejtonaꞌ, ix yicꞌanel yopisio ix Maaca vin̈aj Asa chiꞌ, aton ix snun chichim vin̈, yujto ix schec ix bꞌojoc jun yechel Asera te yajbꞌentac dꞌa yichan̈ Jehová. A vin̈aj Asa chiꞌ ix checan macꞌjipoj jun yechel chiꞌ, chocꞌ ix aji. Ix schecan vin̈ n̈usjitzꞌa dꞌa stiꞌ aꞌ Cedrón. 17 Vachꞌchom maj yiqꞌuel juntzan̈ lugar vin̈ yic ejmelal bꞌajtac chaan̈ dꞌa Israel, palta cꞌanabꞌajumn̈ej ix yutej sbꞌa vin̈ dꞌa Jehová. 18 Ix yacꞌanoch masanil qꞌuen oro yedꞌ qꞌuen plata vin̈ dꞌa yol templo, aton qꞌuen acꞌbꞌil dꞌa Jehová yuj vin̈ yedꞌ smam. 19 Malajn̈ej oval ix ochi, masanto yic 35 abꞌilxo yoch vin̈ reyal.