2 Masanil tas ix scꞌulej vin̈aj Asa chiꞌ, vachꞌn̈ej, te tojol dꞌa yichan̈ Jehová Dios. 3 Yujto ix schec vin̈ icꞌchajel masanil altar yic scomon diosal ebꞌ chꞌoc nacional yedꞌ juntzan̈ lugar yic ejmelal bꞌajtac chaan̈. Ix schecan vin̈ macꞌchajpoj juntzan̈ qꞌuen qꞌueen ay yelcꞌoch dꞌa ebꞌ, ix schecan vin̈ macꞌchajpoj teꞌ yechel Asera. 4 Ix yalanpax vin̈ dꞌa ebꞌ ay dꞌa yol smacbꞌen to syacꞌ val och sbꞌa ebꞌ dꞌa yol scꞌabꞌ Jehová sDiosal ebꞌ yedꞌ ebꞌ smam yicham. Yovalil scꞌanabꞌajej scꞌaybꞌubꞌal yedꞌ schecnabꞌil Jehová chiꞌ ebꞌ. 5 An̈ejtonaꞌ ix schecan vin̈ icꞌchajel juntzan̈ lugar yic ejmelal bꞌajtac chaan̈ dꞌa yol yic Judá chiꞌ. Ayic ayoch vin̈aj Asa chiꞌ reyal, malajn̈ej oval.

6 A Jehová ix acꞌan juncꞌolal dꞌa scal ebꞌ, malaj bꞌaj ix yacꞌ oval ebꞌ, yuj chiꞌ ix schec vin̈aj Asa chiꞌ bꞌochajqꞌue juntzan̈ chon̈abꞌ dꞌa yol yic Judá chiꞌ, ix laj och smuroal. 7 Ix yalan vin̈ dꞌa masanil ebꞌ anima icha tic: Co bꞌoecqꞌue juntzan̈ chon̈abꞌ tic, tzꞌochpax smuroal dꞌa spatictac. Sco bꞌoanpax bꞌaj stan̈vej ebꞌ soldado dꞌa yibꞌan̈ smuroal chiꞌ yedꞌ spuertail tzꞌecꞌ cꞌatan qꞌuen hierro syamnubꞌoc, yujto ayecꞌ co chon̈abꞌ tic dꞌa yol co cꞌabꞌ. Icha chiꞌ yaji yujto sco cꞌanabꞌajej Jehová co Diosal. Aꞌ ix acꞌan juncꞌolal dꞌa co cal yedꞌ masanil ebꞌ ay dꞌa co lacꞌanil tic, xchi vin̈. Yuj chiꞌ te vachꞌ ix aj sbꞌoelcꞌoch munlajel chiꞌ.

8 A vin̈aj Asa chiꞌ, ay 300 mil soldado vin̈, yedꞌnac smaclabꞌ jul-labꞌ ebꞌ vin̈ yedꞌ pax slanza ebꞌ vin̈. Ay pax 280 mil ebꞌ vin̈ yin̈tilal Benjamín, yedꞌnac pax smaclabꞌ jul-labꞌ ebꞌ vin̈ yedꞌ sjul-labꞌ. Masanil ebꞌ vin̈ soldado chiꞌ, te jelan ebꞌ vin̈. 9 Ix cot vin̈aj Zera sreyal Etiopía yedꞌ jun millón soldado yedꞌ 300 carruaje yic oval, ix javi ebꞌ dꞌa Maresa. 10 Ix bꞌat vin̈aj rey Asa chiꞌ, ix schalan sbꞌa vin̈ yedꞌ ebꞌ dꞌa lum pan̈an yic Sefata dꞌa slacꞌanil Maresa chiꞌ. Ataꞌ ix cꞌoch vin̈ yacꞌ oval yedꞌ vin̈aj Zera chiꞌ. 11 Ix tevi vin̈aj Asa chiꞌ dꞌa Jehová Dios icha tic: Mamin Jehová, a ach tic lajann̈ej tzꞌaj a colvaj dꞌa ebꞌ nivan sbꞌisul yedꞌ dꞌa ebꞌ jayvan̈n̈ej. Yuj chiꞌ Mamin, colvajan̈ quedꞌoc yujto tzach cacꞌoch yipoc co cꞌool. Yuj chiꞌ val dꞌa a bꞌi tzon̈ javi cacꞌ oval yedꞌ juntzan̈ soldado tic. A ach tic, co Diosal ach, chꞌoxeli to malaj mach syal stecꞌbꞌan sbꞌa dꞌa ichan̈, xchi vin̈.

12 Yuj chiꞌ ix colvaj Jehová chiꞌ yedꞌ vin̈ yedꞌ ebꞌ aj Judá. Ix acꞌji ganar ebꞌ etíope chiꞌ yuj ebꞌ, ix el lemnaj ebꞌ dꞌa ebꞌ. 13 Ix bꞌat vin̈aj Asa chiꞌ yedꞌ ebꞌ soldado dꞌa spatic ebꞌ, masanto ix cꞌoch ebꞌ dꞌa Gerar. Ix acꞌji ganar masanil ebꞌ etíope chiꞌ, man̈xa junoc ebꞌ ix cani, majxo yal-laj stecꞌbꞌan sbꞌa ebꞌ dꞌa yichan̈ Jehová yedꞌ dꞌa ebꞌ soldado. Pilan ix yiqꞌuecꞌ masanil tastac yedꞌnac ebꞌ ajcꞌol ebꞌ soldado vin̈aj Asa chiꞌ. 14 Ix yacꞌanpax oval vin̈ yedꞌ juntzan̈ chon̈abꞌ ay dꞌa slacꞌanil Gerar chiꞌ. Ix yacꞌ ganar juntzan̈ chon̈abꞌ chiꞌ vin̈, yujto ix och jun xivcꞌolal dꞌa ebꞌ yuj Jehová. Ix yacꞌ ganar masanil juntzan̈ chon̈abꞌ chiꞌ ebꞌ aj Judá chiꞌ. Jantac bꞌeyumal ay dꞌa juntzan̈ chon̈abꞌ chiꞌ ix yicꞌn̈ejcot ebꞌ. 15 Ix och pax ebꞌ bꞌaj molan nocꞌ molbꞌetzal nocꞌ, jantac nocꞌ calnel yedꞌ nocꞌ camello ix yicꞌcot ebꞌ ayic ix meltzaj ebꞌ dꞌa Jerusalén.