Ix yacꞌ oval vin̈aj Abías chiꞌ yedꞌ vin̈aj Jeroboam. 3 A vin̈aj Abías chiꞌ, ix bꞌat vin̈ yedꞌ 400 mil ebꞌ vin̈ soldado te tecꞌan, te jelan pax ebꞌ vin̈ dꞌa oval, aton ebꞌ vin̈ sicꞌbꞌilel yuj vin̈. Axo vin̈aj Jeroboam chiꞌ, ix cot pax vin̈ yedꞌ 800 mil ebꞌ soldado sicꞌbꞌil pax el yuj vin̈. 4 Ix bꞌat vin̈aj Abías chiꞌ dꞌa lum jolom vitz Zemaraim dꞌa yol yic Efraín, ix yalan vin̈ icha tic: Ach Jeroboam yedꞌ masanil israel ayecꞌ edꞌoc, abꞌec: 5 ¿Tom man̈ eyojtacoc to a Jehová co Diosal a on̈ israel on̈ tic ix acꞌancan jun opisio tic dꞌa vin̈aj David yedꞌ dꞌa ebꞌ yin̈tilal dꞌa juneln̈ej, yic syacꞌan reyal, jun trato max yal-laj sqꞌuexchaji? 6 Axo vin̈aj Jeroboam chiꞌ, vin̈ yuninal vin̈aj Nabat, schecabꞌ vin̈aj Salomón, ix och vin̈ ajcꞌolal dꞌa vin̈ yajalil chiꞌ. 7 Ix yacꞌanoch sbꞌa juntzan̈ jaragana vinac chuc spensar yedꞌ vin̈, ix yacꞌan oval vin̈ yedꞌ vin̈aj Roboam yuninal vin̈aj Salomón. Yujto unin vinacto vin̈aj Roboam chiꞌ, manta val spensar vin̈, yuj chiꞌ maj yal stecꞌbꞌan sbꞌa vin̈ dꞌa yichan̈ ebꞌ. 8 A ticnaic jun, a e naani to ol yal eyacꞌan oval quedꞌ a on̈ yin̈til on̈ vin̈aj David tic, acꞌbꞌil jun opisio tic dꞌayon̈ yuj Jehová. An̈ej yujto nivan e bꞌisul, eyedꞌnac pax juntzan̈ yechel vacax nabꞌa oro ix schec bꞌojoc vin̈aj Jeroboam chiꞌ, yic tzꞌoch e diosaloc, yuj juntzan̈ chiꞌ ol eyacꞌ ganar e naani. 9 Ix e pechpaxel ebꞌ sacerdote yic Jehová, ebꞌ yin̈tilal vin̈aj Aarón yedꞌ ebꞌ levita. Ix e comon sicꞌanoch ebꞌ sacerdote icha sbꞌeybꞌal juntzan̈xo chꞌoc nacional. Yaln̈ej mach sjavi yedꞌ junoc nocꞌ quelem vacax yedꞌ ucvan̈oc nocꞌ chꞌac calnel, a jun chiꞌ tzꞌochcan sacerdoteal dꞌa juntzan̈ e diosal man̈ diosoc chiꞌ. 10 Palta a on̈xo tic, malaj bꞌaj ix cactejcan Jehová co Diosal. A ebꞌ sacerdote ayoch yacꞌ servil Jehová dꞌa co cal, aton ebꞌ yin̈tilal vin̈aj Aarón yedꞌ juntzan̈xo ebꞌ levita scolvaj yedꞌ ebꞌ. 11 Aton ebꞌ chiꞌ sn̈usantzꞌa silabꞌ yedꞌ incienso dꞌa Jehová dꞌa junjun qꞌuin̈ibꞌalil yedꞌ dꞌa junjun yemcꞌualil. Syacꞌanpaxem ixim pan ebꞌ te vachꞌ dꞌa sat mexa ayoch oro dꞌay dꞌa yichan̈ Jehová, syacꞌanpaxoch scꞌacꞌal candil ebꞌ nabꞌa oro dꞌa junjun yemcꞌualil. A on̈ tic sco cꞌanabꞌajej val icha tas syal Jehová co Diosal, palta a exxo tic, ix eyiqꞌuel e bꞌa dꞌay. 12 A Dios ayoch quedꞌoc, a ebꞌ sacerdote, listaxo yaj ebꞌ spuꞌan qꞌuen strompeta yic scacꞌan oval eyedꞌoc. Ex vetisraelal, man̈ eyacꞌ oval yedꞌ Jehová co Diosal yedꞌ ebꞌ co mam quicham, yujto man̈ ol eyacꞌlaj ganar, xchi vin̈aj Abías chiꞌ dꞌa ebꞌ.

13 Palta axo vin̈aj Jeroboam, toxo ix yal vin̈ dꞌa nan̈al ebꞌ soldado to a dꞌa spatic ebꞌ soldado yic Judá scot ebꞌ, axo nan̈alxo ebꞌ scan dꞌa yichan̈ ebꞌ yic Judá chiꞌ. 14 Axo ix yilanbꞌat ebꞌ yic Judá chiꞌ to vanxo sjavi ebꞌ soldado dꞌa spatic ebꞌ yedꞌ dꞌa yichan̈ ebꞌ, yuj chiꞌ ix tevi ebꞌ dꞌa Jehová, ix spuꞌan qꞌuen strompeta ebꞌ sacerdote. 15 Ayic ix el yav ebꞌ yic Judá chiꞌ yic oval, axo Dios ix acꞌan och vin̈aj Jeroboam chiꞌ yedꞌ masanil ebꞌ yetisraelal dꞌa yol scꞌabꞌ vin̈aj Abías sreyal Judá chiꞌ. 16 Icha chiꞌ ix aj yel lemnaj ebꞌ israel dꞌa ebꞌ yic Judá chiꞌ. 17 A vin̈aj Abías chiꞌ yedꞌ ebꞌ soldado, te nivan anima ix smilcham ebꞌ. 500 mil soldado yic Israel sicꞌbꞌil yajel ix chami. 18 Yuj chiꞌ emnaquilxon̈ej ix yutej sbꞌa ebꞌ israel dꞌa jun tiempoal chiꞌ. Axo ebꞌ yic Judá chiꞌ, ix yacꞌ ganar ebꞌ dꞌa yibꞌan̈ ebꞌ, yujto ix yacꞌoch Jehová ebꞌ yipoc scꞌool, aton sDiosal ebꞌ yedꞌ ebꞌ smam yicham. 19 Ix bꞌat ebꞌ soldado vin̈aj Abías chiꞌ dꞌa spatic ebꞌ yic vin̈aj Jeroboam chiꞌ, ix yicꞌancanecꞌ juntzan̈ schon̈abꞌ vin̈aj Jeroboam chiꞌ ebꞌ, aton Betel, Jesana yedꞌ Efraín yedꞌ yaldeail junjun. 20 A vin̈aj Jeroboam chiꞌ, majxo yicꞌlaj yip yopisio vin̈ chiꞌ yacbꞌan pitzan vin̈aj Abías chiꞌ. Axo Jehová ix icꞌanel sqꞌuinal vin̈aj Jeroboam chiꞌ, ix cham vin̈. 21 Ix yicꞌ val yip yopisio vin̈aj Abías chiꞌ. 14 ebꞌ ix yetbꞌeyum vin̈, 22 ebꞌ yuninal vin̈ yedꞌ 16 ebꞌ ix yisil. 22 A jantacto yabꞌixal vin̈aj Abías chiꞌ yedꞌ tastac scꞌulejnac vin̈, aycan dꞌa yumal ix stzꞌibꞌejcan vin̈aj Iddo schecabꞌ Dios.