Ix acꞌji ganar Judá yuj vin̈aj Sisac
12
Ayic toxo ix tecꞌcꞌaj yopisio vin̈aj Roboam chiꞌ snaani, ix yactancan vin̈ scꞌanabꞌajan scꞌaybꞌubꞌal Jehová yedꞌ masanil ebꞌ yetchon̈abꞌ. 2 Yujto pit ix yutej sbꞌa ebꞌ dꞌa Jehová chiꞌ, yuj chiꞌ ayic oyeꞌ abꞌilxo yoch vin̈aj Roboam chiꞌ reyal, ix javi vin̈aj Sisac sreyal Egipto yacꞌ oval dꞌa Jerusalén. 3 Ix javi vin̈ yedꞌ mil 200 carruaje yic oval yedꞌ pax 60 mil soldado ayqꞌue dꞌa yibꞌan̈ chej yedꞌ pax jantac ebꞌ vin̈ soldado, man̈xo bꞌischajbꞌenoc ebꞌ vin̈. A ebꞌ aj Libia, ebꞌ aj Suca yedꞌ ebꞌ aj Etiopía ix cot yedꞌ ebꞌ aj Egipto chiꞌ. 4 Ix acꞌji ganar juntzan̈ chon̈abꞌ ayoch smuroal dꞌa Judá yuj ebꞌ masanto ix javi ebꞌ dꞌa Jerusalén.5 Yuj chiꞌ ix cꞌoch vin̈ schecabꞌ Dios scuchan Semaías dꞌa yichan̈ vin̈aj Roboam chiꞌ yedꞌ dꞌa ebꞌ ayoch yajalil dꞌa smacbꞌen Judá. Molanecꞌ ebꞌ dꞌa Jerusalén chiꞌ yuj xivelal dꞌa vin̈aj Sisac chiꞌ. Ix yalan vin̈ dꞌa ebꞌ icha tic:
—Icha tic ix aj yalan Jehová: Yujto ix in eyactejcani, yuj chiꞌ toxo ix ex vactejcan dꞌa yol scꞌabꞌ vin̈aj Sisac chiꞌ, xchi, xchi vin̈.
6 A ebꞌ yajal yaj yedꞌ vin̈ rey chiꞌ, emnaquilxon̈ej ix aj yojtacanel spitalil ebꞌ, ix yalan ebꞌ icha tic:
—Smojton val icha chiꞌ tzon̈ yutej Jehová chiꞌ, xchi ebꞌ.
7 Ayic ix yilan Jehová to emnaquil ix yutej sbꞌa ebꞌ, ix yalanxi dꞌa vin̈aj Semaías chiꞌ icha tic: Yujto emnaquil ix yutej sbꞌa ebꞌ, yuj chiꞌ man̈ ol in satel ebꞌ, palta toxo val ol in col ebꞌ, man̈xo ol vacꞌlabꞌej vin̈aj Sisac chiꞌ yic svacꞌanbꞌat jantac yoval in cꞌol dꞌa chon̈abꞌ Jerusalén chiꞌ. 8 An̈ej bꞌian to ol can ebꞌ dꞌa yol scꞌabꞌ vin̈aj Sisac chiꞌ, yic vachꞌ ol nachajel yuj ebꞌ to secojtac vacꞌji servil dꞌa yichan̈ pax yacꞌji servil ebꞌ vin̈ sreyal juntzan̈xo chꞌoc nacional, xchi Jehová.
9 Ix javi vin̈aj Sisac sreyal Egipto chiꞌ yacꞌ oval dꞌa Jerusalén chiꞌ. Ix yicꞌanbꞌat jantac bꞌeyumal vin̈ sicꞌan dꞌa stemplo Jehová yedꞌ dꞌa spalacio vin̈ rey chiꞌ. Ix yicꞌanpaxbꞌat juntzan̈ maclabꞌ jul-labꞌ vin̈, aton juntzan̈ nabꞌa oro bꞌobꞌilcan yuj vin̈aj rey Salomón. 10 Axo yedꞌ qꞌuen bronce ix sbꞌo juntzan̈xo smaclabꞌ jul-labꞌ vin̈aj Roboam chiꞌ sqꞌuexuloc juntzan̈ nabꞌa oro chiꞌ, ix yacꞌancan vin̈ dꞌa ebꞌ stan̈van stiꞌ spalacio vin̈ chiꞌ. 11 Ayic sbꞌat vin̈ rey chiꞌ juntac el dꞌa stemplo Jehová, syicꞌanbꞌat maclabꞌ jul-labꞌ chiꞌ ebꞌ. Axo spaxta ebꞌ, syicꞌanxicanoch ebꞌ dꞌa yedꞌtal bꞌaj stan̈vej chiꞌ. 12 Yujto ix yacꞌxioch sbꞌa vin̈aj Roboam chiꞌ dꞌa yol scꞌabꞌ Jehová, yuj chiꞌ ix och vaan yoval scꞌol Jehová chiꞌ dꞌa yibꞌan̈ vin̈, maj satjiel-laj masanil chon̈abꞌ yuuj, yuj chiꞌ vachꞌ ix ajxican ebꞌ aj Judá.
13 Ix yicꞌxi yip yopisio vin̈aj Roboam chiꞌ dꞌa Jerusalén chiꞌ. 41 abꞌil sqꞌuinal vin̈ ayic ix schaanel yich vin̈ yacꞌan reyal. 17 abꞌil ix yacꞌ reyal vin̈ dꞌa Jerusalén, aton jun chon̈abꞌ chiꞌ sicꞌbꞌilel yuj Jehová dꞌa yol smacbꞌen ebꞌ israel yic scajnaj taꞌ. Naama sbꞌi ix snun vin̈, aj Amón ix. 14 A tas ix scꞌulej vin̈, te chuc, yujto maj yacꞌoch vin̈ dꞌa scꞌol scꞌanabꞌajan tas ix yal Jehová.
15 A jantacto yabꞌixal vin̈aj Roboam chiꞌ, ayic ix el yich masanto dꞌa slajvubꞌ, tzꞌibꞌabꞌilcan dꞌa yumal yuj vin̈aj Semaías yedꞌ dꞌa yumal yic vin̈aj Iddo, aton ebꞌ vin̈ schecabꞌ Dios.
16 Ix yacꞌn̈ej oval vin̈aj Roboam yedꞌ vin̈aj Jeroboam. Axo yic ix cham vin̈aj Roboam chiꞌ, ix mucji vin̈ dꞌa schon̈abꞌ vin̈aj David. Axo vin̈aj Abías yuninal vin̈ ix ochcan reyal sqꞌuexuloc.