11
Ayic ix javi vin̈aj Roboam chiꞌ dꞌa Jerusalén, ix smolbꞌan 180 mil soldado vin̈, ebꞌ sicꞌbꞌilel dꞌa scal ebꞌ yin̈tilal Judá yedꞌ dꞌa scal ebꞌ yin̈tilal Benjamín, yic sbꞌat ebꞌ yacꞌ oval dꞌa juntzan̈xo ebꞌ yetisraelal chiꞌ, yic tzꞌochxican ebꞌ dꞌa yol scꞌabꞌ vin̈ junelxo. 2 Palta ix yal Jehová dꞌa vin̈aj Semaías schecabꞌ icha tic: 3 Al dꞌa vin̈aj Roboam yuninal vin̈aj Salomón sreyal Judá chiꞌ, yedꞌ dꞌa masanil ebꞌ israel cajan dꞌa yol yic Judá chiꞌ yedꞌ dꞌa ebꞌ yic Benjamín 4 to a in sval icha tic: Man̈ eyacꞌ oval yedꞌ ebꞌ eyetisraelal chiꞌ. Meltzajan̈ec dꞌa e pat e masanil, yujto a in ix vaqꞌuelcꞌoch jun tic, xchi Jehová, xa chi dꞌa ebꞌ.Ayic ix yabꞌan ebꞌ tas ix yal Jehová chiꞌ, ix pax ebꞌ dꞌa spat junjun, majxo bꞌatlaj ebꞌ yacꞌ oval yedꞌ vin̈aj Jeroboam, vin̈ ix och sreyaloc ebꞌ ix pax chiꞌ.
5-10 Ix cann̈ej vin̈aj Roboam chiꞌ dꞌa Jerusalén, ix svachꞌ bꞌoan smuroal juntzan̈ chon̈abꞌ vin̈, juntzan̈ ay dꞌa yol smacbꞌen Judá yedꞌ Benjamín: Aton Belén, Etam, Tecoa, Bet-sur, Soco, Adulam, Gat, Maresa, Zif, Adoraim, Laquis, Azeca, Zora, Ajalón yedꞌ Hebrón. 11 Vachꞌ ix aj sbꞌochajoch smuroal juntzan̈ chon̈abꞌ chiꞌ, ix yacꞌanoch ebꞌ yajalil soldado vin̈ stan̈vej. Nivan ixim trigo, aceite yedꞌ vino ix molchaj dꞌa juntzan̈ chon̈abꞌ chiꞌ. 12 Ix yacꞌanpaxcan smaclabꞌ jul-labꞌ vin̈ yedꞌ qꞌuen lanza dꞌa juntzan̈ chon̈abꞌ chiꞌ, yic syal scolan sbꞌa dꞌa oval. Icha chiꞌ ix aj yochcan yopisio vin̈aj Roboam chiꞌ dꞌa yol yic Judá yedꞌ dꞌa yol yic Benjamín.
13 A ebꞌ sacerdote yedꞌ ebꞌ levita, ix cot ebꞌ dꞌa yol smacbꞌen Israel, yic syacꞌanoch sbꞌa ebꞌ yedꞌ vin̈aj Roboam chiꞌ. 14 A ebꞌ levita chiꞌ, ix yactejcan schon̈abꞌ ebꞌ yedꞌ lum bꞌaj sva nocꞌ smolbꞌetzal nocꞌ ebꞌ, ix javi ebꞌ dꞌa Jerusalén yedꞌ dꞌa juntzan̈xo chon̈abꞌ dꞌa yol yic Judá yic scajnaj ebꞌ taꞌ, yujto a vin̈aj Jeroboam yedꞌ ebꞌ tzacꞌanto ochnac reyal yuj vin̈ ix pechanel ebꞌ dꞌa yopisio yacꞌan servil Jehová. 15 A vin̈aj Jeroboam chiꞌ, ix yacꞌoch ebꞌ comon anima vin̈ sacerdoteal yacꞌan servil comon dios, yic tzꞌoch ebꞌ ejmelal dꞌa juntzan̈ lugar chaan̈, dꞌa ebꞌ enemigo yedꞌ dꞌa juntzan̈ yechel vacax ix schec vin̈ bꞌojoc. 16 Axo ebꞌ ay dꞌa junjun yin̈tilal ebꞌ israel to ayoch spensar yoch ejmelal dꞌa Jehová Dios, ix cot tzacꞌan ebꞌ yedꞌ ebꞌ sacerdote yic Jehová chiꞌ yedꞌ ebꞌ levita pax chiꞌ. Ix javi ebꞌ dꞌa Jerusalén chiꞌ, yic vachꞌ syal yacꞌan silabꞌ ebꞌ dꞌa Jehová sDiosal ebꞌ yedꞌ smam yicham. 17 Yuj chiꞌ ix tecꞌcꞌaj yopisio vin̈aj Roboam chiꞌ dꞌa smacbꞌen Judá dꞌa oxeꞌ abꞌil, yujto an̈ej oxeꞌ abꞌil chiꞌ ix sbꞌeybꞌalej sbꞌeybꞌal vin̈aj David yedꞌ vin̈aj Salomón vin̈.
18 A vin̈aj Roboam chiꞌ, ix yicꞌ ix Mahalat vin̈ yisil vin̈aj Jerimot yuninal vin̈aj David, a ix snun ix, aton ix Abihail yisil vin̈aj Eliab, yixchiquin vin̈aj Isaí. 19 A ebꞌ yuninal vin̈aj Roboam yedꞌ ix Mahalat chiꞌ, aton vin̈aj Jeús, vin̈aj Semarías yedꞌ vin̈aj Zaham. 20 Ix yicꞌanpax ix Maaca vin̈, ix yisil vin̈aj Absalón. A ebꞌ yuninal vin̈ yedꞌ ix, aton vin̈aj Abías, vin̈aj Atai, vin̈aj Ziza yedꞌ vin̈aj Selomit. 21 A vin̈aj Roboam chiꞌ, 18 ebꞌ ix yetbꞌeyum vin̈ yedꞌ 60 ebꞌ ix schabꞌil yetbꞌeyum vin̈. 28 yuninal vin̈ yedꞌ 60 ebꞌ ix yisil. A ix Maaca chiꞌ, te xajan ix yuj vin̈ dꞌa yichan̈ juntzan̈xo ebꞌ ix chiꞌ.
22 Ix snibꞌej vin̈ to a vin̈aj Abiam yuneꞌ ix Maaca chiꞌ ix ochcan reyal sqꞌuexuloc, yuj chiꞌ ix yacꞌoch vin̈ vin̈ yajalil dꞌa scal juntzan̈xo ebꞌ yuninal. 23 Vachꞌ ix yutej vin̈ snaani, yuj chiꞌ ix spucbꞌat ebꞌ yuninal vin̈ chiꞌ dꞌa juntzan̈ chon̈abꞌ ayoch smuroal dꞌa yol yic Judá chiꞌ yedꞌ dꞌa yol yic Benjamín. Tzijtum tas ix yacꞌ vin̈ sva ebꞌ, tzijtum pax ebꞌ ix yetbꞌeyum ebꞌ vin̈ ix yacꞌoch vin̈.