Spojnac sbꞌa chon̈abꞌ Israel
10
Ix bꞌat vin̈aj Roboam dꞌa chon̈abꞌ Siquem, yujto ataꞌ ix smolbꞌej sbꞌa ebꞌ yetisraelal vin̈, yic tzꞌacꞌjicanoch vin̈ reyal yuj ebꞌ. 2 Ix cꞌoch specal jun tic dꞌa vin̈aj Jeroboam yuninal vin̈aj Nabat dꞌa Egipto, yuj chiꞌ ix paxta vin̈, yujto ataꞌ cꞌochnaccan vin̈ ayic yelnac vin̈ elelal dꞌa vin̈aj Salomón. 3 Ix avtajcot vin̈aj Jeroboam chiꞌ yuj ebꞌ yetisraelal. Ayic ix javi vin̈, ix bꞌat vin̈ yedꞌ ebꞌ yic sbꞌat lolon ebꞌ yedꞌ vin̈aj Roboam chiꞌ. Ix yalan ebꞌ dꞌa vin̈ icha tic:4 —A vin̈ a mam, yelxo te ya munlajel ayoch yuj vin̈ dꞌa quibꞌan̈. Axo ticnaic jun, iqꞌuel jabꞌoc munlajel ya ayoch dꞌa quibꞌan̈ tic, ol cacꞌn̈ejoch co bꞌa dꞌa yalan̈ a mandar, xchi ebꞌ.
5 Ix tacꞌvi vin̈aj Roboam chiꞌ dꞌa ebꞌ:
—Ato chabꞌej tzul in eyilxi, sval dꞌayex tas tzꞌaji, xchi vin̈ dꞌa ebꞌ.
Yuj chiꞌ ix pax ebꞌ anima chiꞌ smasanil. 6 Ix lajvi chiꞌ ix scꞌanbꞌan vin̈aj rey Roboam chiꞌ dꞌa ebꞌ vin̈ yichamtac vinaquil chon̈abꞌ, aton ebꞌ vin̈ munlajnac yedꞌ vin̈aj Salomón smam vin̈ icha tic:
—¿Tas junoc pensar tzeyacꞌ dꞌayin? ¿Tas svutej tacꞌvoc in bꞌa dꞌa juntzan̈ anima tic? xchi vin̈.
7 Ix yalan ebꞌ vin̈ dꞌa vin̈ icha tic:
—Tato vachꞌn̈ej ol utej a bꞌa dꞌa ebꞌ anima tic, ol a cꞌanabꞌajan a bꞌoan tas snibꞌej ebꞌ chiꞌ, tato vachꞌ pax ol utoc a tacꞌvi dꞌa ebꞌ, ol yacꞌn̈ejoch sbꞌa ebꞌ dꞌa yalan̈ a mandar dꞌa masanil tiempo, xchi ebꞌ vin̈.
8 Palta maj schalaj yabꞌ vin̈ tas ix yal ebꞌ vin̈ ichamtac vinac chiꞌ. Axo dꞌa juntzan̈ ebꞌ vin̈ quelemtac junn̈ej qꞌuibꞌnac vin̈ yedꞌoc, ataꞌ ix scꞌanbꞌej pax spensar vin̈ chiꞌ, aton ebꞌ vin̈ ayoch dꞌa opisio yedꞌ vin̈. 9 Ix scꞌanbꞌan vin̈ dꞌa ebꞌ vin̈ icha tic:
—¿Tas junoc pensar tzeyacꞌ dꞌayin a ex tic? ¿Tas svutej tacꞌvoc in bꞌa dꞌa juntzan̈ anima tic? Snibꞌej ebꞌ sviqꞌuel jabꞌoc munlajel aycanoch dꞌa yibꞌan̈ ebꞌ yuj vin̈ in mam, xchi vin̈.
10 Ix tacꞌvi juntzan̈ ebꞌ vin̈ quelemtac vinac chiꞌ icha tic:
—A ebꞌ tzꞌalan chiꞌ to tziqꞌuel jabꞌoc munlajel aycanoch dꞌa yibꞌan̈ ebꞌ yuj vin̈ a mam chiꞌ, al dꞌa ebꞌ icha tic: Tato ya munlajel bꞌaj ayex och yuj vin̈ in mam chiꞌ, a inxo pax tic, ecꞌalto syail bꞌaj ol ex vacꞌochi. 11 Tato al ix yutej eyicatz vin̈ in mam chiꞌ, a inxo pax tic, ecꞌalto yalil ol vutej eyicatz chiꞌ. Tato an̈ej nocꞌ tzꞌuum ix yacꞌlabꞌej vin̈ in mam chiꞌ ex smacꞌani, a inxo tic, a nocꞌ tzꞌum ayoch qꞌueen dꞌa sn̈iꞌ ol vacꞌlabꞌej dꞌayex, xa chi dꞌa ebꞌ, xchi ebꞌ vin̈.
12 Axo dꞌa schabꞌjial chiꞌ, ix jax vin̈aj Jeroboam yedꞌ masanil ebꞌ anima chiꞌ dꞌa vin̈aj rey Roboam chiꞌ, icha ix aj yalan vin̈ dꞌa ebꞌ. 13 Palta te chuc ix yutej vin̈ spacan dꞌa ebꞌ. Maj scꞌanabꞌajej vin̈ tas ix yal ebꞌ vin̈ yichamtac vinaquil chon̈abꞌ chiꞌ. 14 A tas ix yal ebꞌ vin̈ quelemtac vinac chiꞌ, a ix yal vin̈ dꞌa ebꞌ icha tic: Tato al ix yutej eyicatz vin̈ in mam chiꞌ, a inxo tic, ecꞌalto ol vutej yalil eyicatz chiꞌ. Tato an̈ej nocꞌ tzꞌum ix yacꞌlabꞌej vin̈ ex smacꞌani, a inxo pax tic, a nocꞌ tzꞌuum ayoch qꞌueen dꞌa sn̈iꞌ ol vacꞌlabꞌej dꞌayex, xchi vin̈. 15 Maj schalaj yabꞌ vin̈ rey chiꞌ tas ix yal ebꞌ anima chiꞌ, yujto a Jehová ix acꞌan scꞌulej vin̈ yic vachꞌ tzꞌelcꞌoch tas ix schec yal vin̈aj Ahías aj Silo dꞌa vin̈aj Jeroboam yuninal vin̈aj Nabat. 16 Ayic ix yilan masanil ebꞌ anima chiꞌ to maj scha yabꞌ vin̈ rey chiꞌ, ix yalan ebꞌ icha tic:
Man̈xalaj calan quic dꞌa yin̈tilal vin̈aj David yuninal vin̈aj Isaí.
Chꞌoc yin̈til ebꞌ, chꞌoc pax quin̈tilal.
Ex quetisraelal, con̈ paxec dꞌa co pat junjun on̈. Olxo yil sbꞌa ebꞌ yin̈tilal vin̈aj David tic, xchi ebꞌ.
A dꞌa jun rato chiꞌ ix laj pax ebꞌ dꞌa spat. 17-19 Ix lajvi chiꞌ, ix checjibꞌat vin̈aj Adoram yuj vin̈aj Roboam dꞌa ebꞌ israel ix paxcan chiꞌ. A vin̈aj Adoram chiꞌ ay yopisio yilan ebꞌ acꞌbꞌil pural smunlaji. Ayic ix cꞌoch vin̈ dꞌa ebꞌ ix paxcan chiꞌ, ix julqꞌuenajcham vin̈ yuj ebꞌ. Yuj chiꞌ ix qꞌue vin̈aj Roboam chiꞌ dꞌa yol scarruaje, ix cot vin̈ elelal, ix javi vin̈ dꞌa Jerusalén. Icha chiꞌ ix aj yelcan ebꞌ israel chiꞌ dꞌa yol scꞌabꞌ ebꞌ yin̈tilal vin̈aj David. Axon̈ej juntzan̈xo ebꞌ cajan dꞌa juntzan̈ chon̈abꞌ dꞌa yol yic Judá bꞌaj ix yacꞌ reyal vin̈.