4 —A vin̈ a mam te ecꞌal ya munlajel ix yacꞌ vin̈ co cꞌulej. Axo ticnaic jun, sco nibꞌej to tziqꞌuel jabꞌoc juntzan̈ munlajel te ya chiꞌ dꞌa quibꞌan̈, yic ol cacꞌoch co bꞌa dꞌa yalan̈ a mandar, xchi ebꞌ.

5 Ix tacꞌvi vin̈aj Roboam chiꞌ:

—A ticnaic paxan̈ec, chabꞌejto tzex jax in eyilaꞌ, svalan dꞌayex tas tzꞌaji, xchi vin̈ dꞌa ebꞌ.

Ix pax ebꞌ anima chiꞌ. 6 Ix lajvi chiꞌ, ix scꞌanbꞌan vin̈ rey chiꞌ dꞌa ebꞌ vin̈ yichamtac vinaquil chon̈abꞌ munlajnac yedꞌ vin̈ smam vin̈ chiꞌ icha tic:

—¿Tas val junoc razón tzeyacꞌ dꞌayin, yic tzin pacan slolonel ebꞌ anima tic? xchi vin̈ dꞌa ebꞌ vin̈.

7 Ix tacꞌvi ebꞌ vin̈:

—Tato tza nibꞌej tzacꞌ servil jun chon̈abꞌ tic, vachꞌ tzutej tacꞌvoc a bꞌa dꞌa ebꞌ, yic vachꞌ ol yacꞌn̈ejoch sbꞌa ebꞌ dꞌa yalan̈ a mandar, xchi ebꞌ vin̈ dꞌa vin̈.

8 Palta maj schalaj yabꞌ vin̈ tas ix yal ebꞌ vin̈ ichamtac vinac chiꞌ. Ix lajvi chiꞌ ix scꞌanbꞌanxi vin̈ dꞌa juntzan̈ ebꞌ vin̈ quelemtac vinac jun ix qꞌuibꞌ vin̈ yedꞌoc, ebꞌ vin̈ ix och dꞌa yopisio yedꞌ vin̈. 9 Ix scꞌanbꞌan vin̈ dꞌa ebꞌ vin̈ icha tic:

—¿Tas junoc razón tzeyacꞌ dꞌayin, tas ol vutoc in pacan slolonel ebꞌ anima chiꞌ? Snibꞌej ebꞌ sviqꞌuel jabꞌoc munlajel yedꞌ juntzan̈xo tas aycanoch dꞌa yibꞌan̈ ebꞌ yuj vin̈ in mam, xchi vin̈ dꞌa ebꞌ vin̈.

10 Ix tacꞌvi ebꞌ vin̈ quelemtac chiꞌ dꞌa vin̈:

—A ebꞌ tzꞌalan chiꞌ to tziqꞌuel jabꞌoc munlajel aycanoch dꞌa yibꞌan̈ ebꞌ yuj vin̈ a mam chiꞌ, al dꞌa ebꞌ icha tic: Ya munlajel bꞌaj yacꞌnac ex och vin̈ in mam chiꞌ, a inxo pax tic, ecꞌalto syail bꞌaj ol ex vacꞌochi. 11 Al yutejnac eyicatz vin̈ in mam chiꞌ, a inxo pax tic, ecꞌalto ol vutej yalil eyicatz chiꞌ. A vin̈ in mam chiꞌ, an̈ej dꞌa nocꞌ tzꞌuum smacꞌnac ex vin̈, a inxo pax tic, a nocꞌ tzꞌuum ayoch qꞌuen qꞌueen dꞌa sn̈iꞌ ol vacꞌlabꞌej dꞌayex, xa chi dꞌa ebꞌ, xchi ebꞌ vin̈ quelemtac chiꞌ.

12 Axo dꞌa schabꞌjial chiꞌ, ix jax vin̈aj Jeroboam yedꞌ masanil ebꞌ chon̈abꞌ israel yil vin̈aj rey Roboam chiꞌ, icha ix aj yalan vin̈. 13 Axo vin̈ rey chiꞌ, maj yal-laj vin̈ icha ix aj yalan ebꞌ vin̈ ichamtac vinac chiꞌ, palta te chuc ix yutej vin̈ spacan dꞌa ebꞌ chon̈abꞌ chiꞌ. 14 A tas ix yal ebꞌ vin̈ quelemtac, a ix yal vin̈ dꞌa ebꞌ, ix yalan vin̈ icha tic: Al yutejnac eyicatz vin̈ in mam chiꞌ, a inxo pax tic, ecꞌalto ol vutej yalil eyicatz chiꞌ. A vin̈ in mam chiꞌ, an̈ej dꞌa nocꞌ tzꞌuum smacꞌnac ex vin̈, a inxo pax tic, a nocꞌ tzꞌuum ayoch qꞌuen qꞌueen dꞌa sn̈iꞌ ol vacꞌlabꞌej dꞌayex, xchi vin̈ dꞌa ebꞌ anima chiꞌ. 15-19 Ayic ix yilan ebꞌ israel chiꞌ to maj schalaj yabꞌ vin̈ rey chiꞌ tas ix yal ebꞌ, yuj chiꞌ ix yalan ebꞌ icha tic:

Ix checjibꞌat vin̈aj Adoram yuj vin̈ rey chiꞌ yic bꞌat lolon vin̈ yedꞌ ebꞌ israel chiꞌ, yujto a vin̈ ay yopisio scuchbꞌan ebꞌ munlajvum yovalil smunlaji. Axo ebꞌ israel chiꞌ, ix qꞌue somnaj ebꞌ, ix sjulqꞌuenancham vin̈ ebꞌ. Axo yic ix yabꞌan jun chiꞌ vin̈aj Roboam chiꞌ, ix qꞌue vin̈ dꞌa yol scarruaje, ix cot lemnaj vin̈ dꞌa Jerusalén.

Ix lajvi chiꞌ, axo masanil macan̈il ebꞌ israel ay dꞌa stojolal norte ix pax ebꞌ dꞌa spat. Axon̈ej dꞌa ebꞌ cajan dꞌa juntzan̈ chon̈abꞌ dꞌa yol yic Judá ix yacꞌ reyal vin̈aj Roboam chiꞌ. Ichaton chiꞌ ix aj yicꞌanel sbꞌa ebꞌ israel dꞌa yol scꞌabꞌ yin̈tilal vin̈aj David. Icha chiꞌ ix aj yelcꞌoch tas yalnaccan Jehová dꞌa vin̈ schecabꞌ, aton vin̈aj Ahías aj Silo, yuj vin̈aj Jeroboam yuninal vin̈aj Nabat.

20 Ayic ix yabꞌan ebꞌ israel to ayxo ecꞌ vin̈aj Jeroboam dꞌa yol schon̈abꞌ ebꞌ, ix schecan ebꞌ avtajcot vin̈ yic schꞌoxan sbꞌa vin̈ dꞌa yichan̈ ebꞌ. Ix yacꞌanoch vin̈ ebꞌ sreyaloc. Axon̈ej ebꞌ yin̈tilal Judá ix can yedꞌ vin̈aj Roboam yixchiquin vin̈aj David.

21 Ayic ix jax vin̈aj Roboam dꞌa Jerusalén chiꞌ, ix smolbꞌan 180 mil ebꞌ soldado vin̈ dꞌa yin̈tilal Judá yedꞌ dꞌa yin̈tilal Benjamín yic syacꞌan oval ebꞌ yedꞌ ebꞌ yetisraelal yic smeltzajxioch ebꞌ dꞌa yalan̈ smandar vin̈ yalani. 22 Palta ix yalan Jehová dꞌa vin̈aj Semaías schecabꞌ icha tic: 23 Al dꞌa vin̈aj Roboam yuninal vin̈aj Salomón, sreyal Judá yedꞌ dꞌa masanil ebꞌ yin̈tilal Judá chiꞌ, dꞌa yin̈tilal Benjamín yedꞌ dꞌa juntzan̈xo ebꞌ anima ayecꞌ dꞌa scal ebꞌ: 24 A Jehová tzꞌalan icha tic: Man̈ eyacꞌ oval yedꞌ ebꞌ eyetisraelal chiꞌ, yujto a in ix el dꞌa in cꞌool to icha chiꞌ tzꞌaji. Meltzajan̈ec dꞌa e pat, xchi Jehová, xa chi dꞌa ebꞌ, xchi dꞌa vin̈.

Ayic ix yabꞌan ebꞌ anima chiꞌ, ix meltzaj ebꞌ icha ix aj yalan Jehová.

25 Ix lajvi chiꞌ, ix svachꞌ bꞌoanqꞌue chon̈abꞌ Siquem vin̈aj Jeroboam chiꞌ, aton ay dꞌa tzalquixtac dꞌa yol yic Efraín. Ataꞌ ix cajnaj vin̈. Ix sbꞌoanpaxqꞌue chon̈abꞌ Penuel vin̈. 26 Ix snaan vin̈ icha tic: A ticnaic tecan ol yicꞌxiecꞌ in reyal tic jun vin̈ yin̈tilal vin̈aj David. 27 Tato ol bꞌatn̈ej ebꞌ anima tic yacꞌ silabꞌ dꞌa stemplo Jehová dꞌa Jerusalén, axom yacꞌanxioch spensar ebꞌ dꞌa vin̈aj Roboam sreyal Judá. Ol am in smilcham ebꞌ, ol am bꞌatcan ebꞌ smasanil yedꞌ vin̈aj Roboam chiꞌ, xchi vin̈.

28 Axo yic ix lajvi slolon vin̈ yedꞌ ebꞌ ayoch yajalil yedꞌoc, ix schecan vin̈ bꞌojoc chabꞌ yechel quelem vacax nabꞌa oro. Ix yalan vin̈ dꞌa masanil anima icha tic: Ex vetisraelal, man̈xo ex bꞌat dꞌa Jerusalén. Ajaltac e bꞌati, ina val co diosal tic, aton icꞌannac on̈ elta dꞌa Egipto, xchi vin̈ dꞌa ebꞌ. 29 Jun yechel vacax chiꞌ ix yacꞌcan vin̈ dꞌa chon̈abꞌ Betel, ix yacꞌancan junxo vin̈ dꞌa chon̈abꞌ Dan. 30 A yuj jun chiꞌ ix och smul ebꞌ anima chiꞌ, yujto ix bꞌat ebꞌ dꞌa chon̈abꞌ Dan yaqꞌuem sbꞌa dꞌa jun yechel chiꞌ. 31 Ix sbꞌoanpaxqꞌue spatil sdiosal vin̈ chiꞌ dꞌa juntzan̈ lugar chaan̈. Ix yacꞌanoch yopisio ebꞌ comon anima vin̈ dꞌa sacerdoteal, man̈ levitaoc ebꞌ. 32 Ix lajvi chiꞌ ix yacꞌanoch jun qꞌuin̈ vin̈ dꞌa 15 yoch svajxaquil uj yic jun abꞌil chiꞌ icha jun qꞌuin̈ tzꞌecꞌ dꞌa Judá. Ix yacꞌanqꞌue silabꞌ vin̈ dꞌa yibꞌan̈ altar dꞌa jun yechel vacax ix sbꞌo vin̈ chiꞌ dꞌa chon̈abꞌ Betel. Ix yacꞌanpaxoch ebꞌ sacerdote chiꞌ vin̈ yilumaloc spatil sdiosal ix sbꞌo dꞌa juntzan̈ lugar chaan̈. 33 Yuj chiꞌ a dꞌa 15 yoch svajxaquil uj chiꞌ, ix yacꞌanoch jun qꞌuin̈ chiꞌ vin̈, munil ix snaelta vin̈ dꞌa yol yicoꞌ. Ix yacꞌan silabꞌ vin̈ dꞌa yibꞌan̈ altar ix sbꞌo dꞌa chon̈abꞌ Betel chiꞌ. A dꞌa jun cꞌu chiꞌ ix sn̈uspaxtzꞌa incienso vin̈ dꞌa yibꞌan̈ altar chiꞌ.