Ochnac vin̈aj Salomón ejmelal dꞌa comon dios
11
A vin̈aj rey Salomón chiꞌ, man̈ocn̈ej ix yisil vin̈ sreyal Egipto chiꞌ ix yicꞌ vin̈, palta ayto juntzan̈xo ebꞌ ix ix chꞌoc chon̈abꞌil ix yicꞌ vin̈, aton ebꞌ ix moabita, ebꞌ ix amonita, ebꞌ ix edomita, ebꞌ ix aj Sidón yedꞌ ebꞌ ix hitita. 2 Yalnac Jehová to ay yovalil yicꞌlan sbꞌa ebꞌ israel yedꞌ juntzan̈ ebꞌ ix chiꞌ, yic max montajbꞌat ebꞌ yuj ebꞌ ix dꞌa spatic juntzan̈ scomon diosal schon̈abꞌ ebꞌ ix chiꞌ. Palta axo vin̈aj rey Salomón chiꞌ, ix can sgana vin̈ dꞌa ebꞌ ix, ix yicꞌlan sbꞌa vin̈ yedꞌ ebꞌ ix. 3 Ay 700 ebꞌ ix yetbꞌeyum vin̈ chiꞌ, yisil rey ebꞌ ix. Ay pax 300 ebꞌ ix schabꞌil yetbꞌeyum vin̈ yaji. A yuj ebꞌ ix chiꞌ ix juviel spensar vin̈. 4 Axo yic ix ichamvinacax vin̈, ix somchajbꞌat spensar vin̈ yuj ebꞌ ix. Ix montajbꞌat vin̈ dꞌa spatic juntzan̈xo comon dios. Majxo yacꞌoch spensar vin̈ sicꞌlabꞌil dꞌa Jehová sDiosal icha yutejnac sbꞌa vin̈aj David smam vin̈. 5 Ix och vin̈ ejmelal dꞌa jun comon dios scuch Astoret, ix sdiosal ebꞌ aj Sidón yedꞌ dꞌa junxo comon dios scuch Milcom, sdiosal ebꞌ amonita. A juntzan̈ chiꞌ te yajbꞌilel yuj Jehová. 6 Yuj chiꞌ, te chuc tas ix scꞌulej vin̈ dꞌa yichan̈ Jehová chiꞌ, yujto man̈ cꞌanabꞌajumoclaj ix yutej sbꞌa vin̈ dꞌay, man̈ lajanoclaj ix yutej sbꞌa vin̈ icha yutejnac sbꞌa vin̈ smam chiꞌ.7 A dꞌa jun tzalan dꞌa stojolal bꞌaj sjavi cꞌu dꞌa Jerusalén, ataꞌ ix sbꞌoqꞌue stemplo sdiosal ebꞌ moabita vin̈, aton jun scuchan Quemos. Ix sbꞌopax stemplo sdiosal ebꞌ amonita vin̈, aton jun scuch Moloc. A juntzan̈ comon dios chiꞌ yajbꞌilel yuj Jehová. 8 Ichan̈ej chiꞌ ix scꞌulej vin̈ yedꞌ masanil ebꞌ ix ix chꞌoc chon̈abꞌil ix yicꞌaꞌ, yic syacꞌ silabꞌ ebꞌ ix yedꞌ incienso dꞌa sdiosal junjun. 9 Yuj chiꞌ ix cot yoval Jehová sDiosal Israel dꞌa vin̈aj Salomón chiꞌ, yujto ix paticajcanel yuj vin̈, vachꞌchom chael schꞌoxnac sbꞌa dꞌa vin̈. 10 Ix yal Jehová dꞌa vin̈ to ay yovalil yoch ejmelal dꞌa juntzan̈ comon dios, palta maj scꞌanabꞌajej vin̈ scꞌulan tas ix yal Jehová chiꞌ. 11 Yuj chiꞌ ix yal Jehová chiꞌ dꞌa vin̈ icha tic: Yujto icha tic ix a cꞌulej, maj a cꞌanabꞌajej in trato yedꞌ in checnabꞌil valnac dꞌayach, yuj chiꞌ ol viqꞌuecꞌ opisio tic, ol vacꞌan dꞌa junoc ebꞌ a checabꞌ. 12 Palta yujto xajan vin̈ a mam vuuj, yuj chiꞌ yacbꞌan pitzanachto, man̈ ol viqꞌuecꞌlaj opisio tic, palta a dꞌa jun uninal, ataꞌ ol viqꞌueqꞌui. 13 Man̈ ol viqꞌuecꞌ yopisio chiꞌ smasanil. Olto can junoc macan̈ dꞌa yol scꞌabꞌ yujto xajan vin̈ in checabꞌ aj David vuuj yedꞌ chon̈abꞌ Jerusalén tic, yujto sicꞌbꞌilel vuuj, xchi dꞌa vin̈.
14 Yuj chiꞌ a Jehová ix acꞌancot jun vin̈ ajcꞌool dꞌa vin̈aj Salomón chiꞌ, aton vin̈aj Hadad yin̈tilalcan ebꞌ vin̈ sreyal Edom. 15-16 A dꞌa yalan̈taxo, ayic yacꞌannac ganar chon̈abꞌ Edom chiꞌ vin̈aj rey David, a vin̈aj Joab yajalil ebꞌ soldado bꞌat yedꞌ jun macan̈ ebꞌ soldado Israel, yic bꞌat smucan ebꞌ chamnac ebꞌ, vaqueꞌ ujal can ebꞌ taꞌ. Yacbꞌan chiꞌ, svachꞌ milancham masanil ebꞌ vin̈ vinac aj Edom chiꞌ ebꞌ. 17 A dꞌa jun tiempoal chiꞌ, yuneꞌ quelemto vin̈aj Hadad chiꞌ, palta elcan lemnaj vin̈, bꞌatcan vin̈ yedꞌ juntzan̈ ebꞌ schecabꞌ vin̈ smam, sbꞌatcan ebꞌ dꞌa Egipto. 18 El ebꞌ dꞌa Madián, scꞌoch ebꞌ dꞌa Parán. Ataꞌ yicꞌbꞌat juntzan̈xo ebꞌ vin̈ vinac ebꞌ, scꞌochcan ebꞌ dꞌa vin̈ sreyal Egipto chiꞌ. Ataꞌ acꞌji spat ebꞌ, svael ebꞌ yedꞌ slum ebꞌ yuj vin̈ rey chiꞌ.
19 A vin̈aj Hadad chiꞌ, te vachꞌ snaan vin̈ rey chiꞌ dꞌa spatic vin̈, yuj chiꞌ yacꞌ jun ix smuꞌ vin̈ rey chiꞌ yetbꞌeyumoc vin̈, aton ix snulej ix reina Tahpenes. 20 Yalji jun yuneꞌ ix yedꞌ vin̈aj Hadad chiꞌ, Genubat yacꞌ ix sbꞌiej. A ix Tahpenes chiꞌ ilan qꞌuibꞌ jun unin chiꞌ dꞌa spalacio vin̈ rey chiꞌ, junn̈ej qꞌuibꞌnac yedꞌ ebꞌ yuninal vin̈ rey chiꞌ. 21 Axo yic yabꞌan specal vin̈aj Hadad dꞌa Egipto chiꞌ to a vin̈aj rey David chamnacxo vin̈, chamnacxo pax vin̈aj Joab yajalil ebꞌ soldado, yalan vin̈ icha tic dꞌa vin̈ sreyal Egipto chiꞌ:
—Cha in meltzaj dꞌa in chon̈abꞌ, xchi vin̈.
22 Stacꞌvi vin̈ rey chiꞌ dꞌa vin̈ icha tic:
—¿Tas yuj tza nibꞌej tzach meltzaj dꞌa a chon̈abꞌ chiꞌ? ¿Tom ay tas syacꞌ palta dꞌayach vuuj? xchi vin̈.
Stacꞌvi vin̈aj Hadad chiꞌ:
—Tzꞌacan yaj masanil dꞌayin uuj, palta tzin tevi dꞌayach to tzin a cha meltzajoc, xchi vin̈. Yuj chiꞌ chaji meltzaj vin̈ yuj vin̈ rey chiꞌ. A vin̈aj Hadad chiꞌ ix och ajcꞌolal dꞌa vin̈aj Salomón chiꞌ.
23 Ay junxo vin̈ scuchan Rezón yuninal vin̈aj Eliada, a Dios ix acꞌanoch dꞌa spensar vin̈, ix och vin̈ ajcꞌolal dꞌa vin̈aj Salomón chiꞌ. A vin̈aj Rezón chiꞌ elnac lemnaj vin̈ dꞌa vin̈ sreyal, aton vin̈aj Hadad-ezer sreyal Soba. 24 Ayic yacꞌjinac ganar vin̈aj Hadad-ezer sreyal Soba chiꞌ yedꞌ smiljicham ebꞌ soldado vin̈ yuj vin̈aj rey David, a vin̈aj Rezón chiꞌ smolbꞌej jun n̈ilan̈ ebꞌ elcꞌum vin̈, yoch vin̈ yajaloc ebꞌ. Sbꞌatcan cajan vin̈ yedꞌ ebꞌ soldado chiꞌ dꞌa Damasco, ataꞌ acꞌjioch vin̈ reyal yuj ebꞌ. 25 Ix te och vin̈ ajcꞌolal dꞌa chon̈abꞌ Israel ayic ayoch vin̈aj Salomón chiꞌ reyal, icha ix yutej sbꞌa vin̈aj Hadad sreyal Edom.
26 Ay pax junxo vin̈ ayoch dꞌa yopisio yedꞌ vin̈aj Salomón chiꞌ, ix meltzajoch vin̈ ajcꞌolal dꞌa vin̈. Aton vin̈aj Jeroboam yuninal vin̈aj Nabat aj Sere dꞌa yin̈tilal ebꞌ Efraín. Chamnacxo smam vin̈ chiꞌ, axo ix snun vin̈, Serúa sbꞌi ix. 27 Icha val tic ix aj spitzvichaan̈ oval yuj vin̈: A vin̈aj rey Salomón chiꞌ ix checan bꞌudꞌjoc jun chꞌolan yic vachꞌ schalaj sbꞌa smuroal schon̈abꞌ vin̈aj rey David. 28 A vin̈aj Jeroboam chiꞌ te n̈ican vin̈, ayic ix yilan vin̈ rey chiꞌ to te ay yelcꞌoch vin̈ dꞌa sat ebꞌ yetchon̈abꞌ, ix yacꞌanoch vin̈ yajalil dꞌa ebꞌ munlajvum yin̈tilalcan José.
29 A junel ix elta vin̈aj Jeroboam chiꞌ dꞌa stiel Jerusalén chiꞌ, cꞌocbꞌil ix schalaj sbꞌa vin̈ yedꞌ vin̈aj Ahías schecabꞌ Dios, aj Silo. Ayoch jun sjucan pichul vin̈aj Ahías chiꞌ, te acꞌto. Ix lolon ebꞌ vin̈ schꞌocoj schavan̈il. 30 Ix yicꞌanel jun sjucan pichul vin̈aj Ahías chiꞌ, lajchaveꞌ ix yutej vin̈ sn̈icꞌchitanbꞌati. 31 Ix yalan vin̈ dꞌa vin̈aj Jeroboam chiꞌ icha tic: Cha lajun̈eoc icoꞌ, yujto icha tic syal Jehová co Diosal dꞌayach: Ol viqꞌuecꞌ smacbꞌen vin̈aj Salomón, axo dꞌayach ol vacꞌ lajun̈eoc in̈tilal. 32 Palta yujto xajan vin̈ in checabꞌ aj David vuuj yedꞌ pax chon̈abꞌ Jerusalén sicꞌbꞌilel vuuj dꞌa scal masanil chon̈abꞌ Israel, yuj chiꞌ olto vacꞌcan junoc in̈tilal dꞌa yin̈tilal vin̈aj Salomón chiꞌ. 33 A vin̈aj Salomón chiꞌ ix in yactejcan vin̈, ix och vin̈ ejmelal dꞌa Astarté, ix sdiosal ebꞌ aj Sidón yedꞌ dꞌa Quemos sdiosal ebꞌ moabita yedꞌ dꞌa Milcom sdiosal ebꞌ amonita. Te man̈xa svachꞌil tas syutej sbꞌa vin̈ dꞌa vichan̈, maxtzac scꞌanabꞌajej in cꞌaybꞌubꞌal vin̈ yedꞌ in checnabꞌil. Man̈ ichoc yutejnac sbꞌa vin̈aj David smam vin̈, man̈ ichoctaꞌ syutej sbꞌa vin̈. 34 Palta yacbꞌan pitzanto vin̈, man̈ ol viqꞌuecꞌlaj yopisio vin̈ tic dꞌa reyal. Yujto xajan vin̈ in checabꞌ aj David vuuj to in sicꞌnaquel vin̈, scꞌanabꞌajejnac val in checnabꞌil vin̈ yedꞌ in cꞌaybꞌubꞌal. 35 Palta a dꞌa jun vin̈ yuninal vin̈aj Salomón chiꞌ ol viqꞌuecꞌ lajun̈eoc in̈tilal, ol vacꞌan dꞌayach. 36 Junxon̈ej in̈tilal ol vacꞌcan dꞌa vin̈ yic vachꞌ ayto mach ol naancot vin̈ in checabꞌ aj David dꞌa vichan̈ dꞌa Jerusalén tic, aton jun chon̈abꞌ in sicꞌnaccanel bꞌaj tzꞌoch ejmelal dꞌayin. 37 Ol ach vacꞌoch reyal dꞌa yibꞌan̈ tas tza nibꞌej, aton chon̈abꞌ Israel. 38 Yuj chiꞌ, tato ol a cꞌanabꞌajej masanil tas tzin chec a cꞌulej tic, tato tojoln̈ej pax ol utej a bꞌa dꞌa vichan̈, tato ol a cꞌanabꞌajejn̈ej in cꞌaybꞌubꞌal yedꞌ in checnabꞌil, icha yutejnac sbꞌa vin̈ in checabꞌ aj David, tato icha chiꞌ, ayinn̈ej ecꞌ edꞌoc. Ol vacꞌn̈ej opisio, icha ajnac vacꞌan yopisio vin̈ in checabꞌ aj David chiꞌ, ol vacꞌanoch chon̈abꞌ Israel tic dꞌa yol a cꞌabꞌ. 39 Ol vacꞌoch yaelal dꞌa yibꞌan̈ ebꞌ yin̈tilal vin̈aj David junoc tiempoal yujn̈ej smul vin̈aj Salomón chiꞌ, palta man̈ ol vacꞌcanochlaj dꞌa juneln̈ej, xchi Jehová dꞌayach, xchi vin̈aj Ahías chiꞌ.
40 A yuj tas ix yal Jehová chiꞌ, ix snibꞌej vin̈aj Salomón smilcham vin̈aj Jeroboam chiꞌ. Yuj chiꞌ ix el lemnaj vin̈, ix bꞌatcan vin̈ dꞌa Egipto bꞌaj ayoch vin̈aj Sisac reyal. Ix cann̈ej vin̈ taꞌ masanto ix cham vin̈aj Salomón chiꞌ.
A schamel vin̈aj Salomón
41 A yabꞌixal juntzan̈xo tas scꞌulejnac vin̈aj Salomón chiꞌ yedꞌ sjelanil vin̈, tzꞌibꞌabꞌilcan bꞌaj tzꞌibꞌabꞌil yabꞌixal vin̈. 42 A vin̈aj Salomón chiꞌ, 40 abꞌil ix yacꞌ reyal vin̈ dꞌa Jerusalén dꞌa yibꞌan̈ masanil chon̈abꞌ Israel. 43 Ayic ix cham vin̈, ix mucchaj vin̈ dꞌa schon̈abꞌ vin̈aj David vin̈ smam. Ix lajvi chiꞌ axo jun yuninal vin̈ scuchan Roboam ix ochcan reyal sqꞌuexuloc.