Ix javi ix sreinail Sabá yil vin̈aj rey Salomón
10
1-2 A ix sreinail chon̈abꞌ Sabá, ix yabꞌ specal ix to te bꞌinajnac vin̈aj rey Salomón yuj sjelanil syacꞌ Jehová. Yuj chiꞌ ix javi ix dꞌa Jerusalén, yic syilan ix tato syal spacan juntzan̈ tas ajaltac scꞌanbꞌej ix dꞌa vin̈. Tzijtum ebꞌ schecabꞌ ix yedꞌnac, yedꞌnacpax nocꞌ camello ix. Al yaj nocꞌ dꞌa perfume, dꞌa qꞌuen oro yedꞌ dꞌa juntzan̈ qꞌuen qꞌueen te vachꞌ yilji. Ayic ix javi ix dꞌa yichan̈ vin̈aj rey Salomón chiꞌ, ix scꞌanbꞌan ix tas snibꞌej scꞌanbꞌej chiꞌ dꞌa vin̈. 3 Ix spacan vin̈ masanil tas ix scꞌanbꞌej ix chiꞌ, malaj val junoc tas scꞌanbꞌej ix chiꞌ to maj nachaj spacan vin̈. 4-5 Ix te sat scꞌol ix ayic ix yilan ix jantac sjelanil vin̈, yuj spalacio vin̈ bꞌobꞌil yuuj, yuj pax tas sva vin̈ dꞌa smexa yedꞌ bꞌaj cajan ebꞌ ayoch dꞌa yopisio yedꞌ vin̈. Chꞌocxo yilji pax spichul ebꞌ schecabꞌ vin̈, ebꞌ sbꞌachumalcot scopa vin̈ yedꞌ juntzan̈ silabꞌ sn̈ustzꞌa vin̈ dꞌa stemplo Jehová. Ayic ix yilan juntzan̈ chiꞌ ix, ix te sat scꞌool ix. 6 Yuj chiꞌ ix yal ix dꞌa vin̈aj Salomón chiꞌ icha tic: A tas ix vabꞌ specal dꞌa in chon̈abꞌ yuj masanil tastac tza cꞌulej yedꞌ a jelanil sbꞌinaji, a juntzan̈ chiꞌ te yel. 7 Ayic manto vil juntzan̈ tic, max in chalaj vabꞌi, axo ticnaic ix vil yedꞌ in sat, max cꞌochlaj nan̈al juntzan̈ tic ix alji vabꞌi. A a jelanil yedꞌ masanil tas ay dꞌayach, yelxo val ecꞌto dꞌa yichan̈ icha tas ix vabꞌ chiꞌ. 8 Te vachꞌ yic ebꞌ anima smunlaj dꞌayach, te vachꞌ pax yic ebꞌ a checabꞌ ayecꞌ edꞌoc yic syabꞌan a jelanil ebꞌ. 9 Aljocabꞌ vachꞌ lolonel dꞌa Jehová a Diosal, stzalaj edꞌoc yuj chiꞌ ix yacꞌ smacbꞌen Israel tic dꞌayach. Yujto te xajan chon̈abꞌ Israel tic yuj Jehová, yuj chiꞌ ix ach yacꞌoch reyal yic tzacꞌan yajalil dꞌa stojolal yedꞌ dꞌa svachꞌil, xchi ix reina chiꞌ dꞌa vin̈.10 Ix lajvi chiꞌ, ix yacꞌan 90 quintal qꞌuen oro ix, jantac perfume yedꞌ qꞌuen qꞌueen te vachꞌ yilji dꞌa vin̈aj rey Salomón chiꞌ. Man̈xa juneloc ix javi perfume dꞌa Israel icha jantac ix yacꞌ ix dꞌa vin̈ rey chiꞌ.
11-13 Axo vin̈ rey chiꞌ ix acꞌanpax masanil tas ix scꞌan ix sreinail Sabá chiꞌ, chꞌoc pax tas ix el dꞌa scꞌol vin̈ yacꞌan dꞌa ix. Ix lajvi chiꞌ, ix meltzaj ix dꞌa schon̈abꞌ yedꞌ ebꞌ schecabꞌ ajun yedꞌoc.
Ay pax juntzan̈xo tastac ix icꞌjicot dꞌa yol teꞌ sbarco vin̈aj rey Hiram, ix yicꞌcot qꞌuen oro ebꞌ dꞌa chon̈abꞌ Ofir. Man̈xo jantacoc te teꞌ sándalo sbꞌi yedꞌ qꞌuen qꞌueen te vachꞌ yilji. A teꞌ varanda ix och dꞌa stemplo Jehová yedꞌ teꞌ ix och dꞌa spalacio vin̈aj Salomón chiꞌ, a dꞌa teꞌ sándalo chiꞌ ix yacꞌ bꞌojoc teꞌ vin̈. Ix bꞌojipax teꞌ arpa dꞌa teꞌ yedꞌ salterio yic ebꞌ sbꞌitani. Man̈xa junelocxo ix javi jantac teꞌ sándalo icha teꞌ ix javi junel chiꞌ.
A sbꞌinajnaquil vin̈aj rey Salomón
14 A qꞌuen oro scha vin̈aj rey Salomón dꞌa junjun abꞌil, 500 quintal qꞌueen. 15 Chꞌoc pax yaj qꞌuen syacꞌ ebꞌ chon̈vajum yedꞌ pax qꞌuen syacꞌ ebꞌ vin̈ sreyal Arabia yedꞌ ebꞌ yajal dꞌa yol smacbꞌen Israel chiꞌ. 16 Ix schec vin̈ rey chiꞌ bꞌojoc 200 nivac jen̈an oro maclabꞌ jul-labꞌ, ay am lajchaveoc libra qꞌuen oro ix och dꞌa junjun. 17 Ix lajvi chiꞌ ix schecanpax bꞌojoc 300-xo cotac smaclabꞌil jul-labꞌ chiꞌ vin̈, ay am vaqueoc libra qꞌuen oro ix och dꞌa junjun. Ix yacꞌoch juntzan̈ chiꞌ vin̈ dꞌa yol jun pat scuchan Spatil Te teꞌ yic Líbano. 18 Ix schecanpax vin̈ bꞌojoc jun scꞌojnubꞌ dꞌa sdespacho, ix acꞌjioch qꞌuen oro te vachꞌ dꞌay, ix acꞌjipaxoch marfil yelvanubꞌoc. 19-20 A jun cꞌojnubꞌ chiꞌ, vac tzol sqꞌue sbꞌachquiltaquil scꞌoochal. Ay lajchaveꞌ yechel nocꞌ choj aycan dꞌa stitac jun cꞌooch chiꞌ, vaqueꞌ nocꞌ dꞌa junjun stitac. A yelav yich spatic jun cꞌojnubꞌ chiꞌ, setansetan yaji. A scꞌabꞌ dꞌa junjun stzꞌeytac, ayoch junjun yechel nocꞌ choj dꞌay. Malaj junocxo rey bꞌoannac junoc scꞌojnubꞌ icha jun chiꞌ. 21 A scopa vin̈ rey chiꞌ, nabꞌa oro smasanil yedꞌ jantac xalu yedꞌ chen scꞌanchaj dꞌa jun pat scuchan Spatil Te teꞌ yic Líbano. Malaj junoc yamcꞌabꞌ chiꞌ plata, yujto a dꞌa stiempoal vin̈aj rey Salomón chiꞌ, a qꞌuen plata chiꞌ malaj yelcꞌoch qꞌueen. 22 A vin̈aj Salomón chiꞌ, ay juntzan̈ teꞌ snivac barco vin̈ tzꞌecꞌ yedꞌ juntzan̈ teꞌ yic vin̈aj Hiram. Dꞌa junjun yoxil abꞌil sjavi ebꞌ schecabꞌ vin̈ yedꞌ teꞌ barco chiꞌ, yedꞌnac qꞌuen oro ebꞌ, qꞌuen plata, marfil, nocꞌ chabꞌin yedꞌ nocꞌ pavo real.
23 Icha chiꞌ ix aj ste qꞌuechaan̈ vin̈aj rey Salomón chiꞌ yuj sjelanil yedꞌ sbꞌeyumal dꞌa yichan̈ juntzan̈xo ebꞌ rey dꞌa yolyibꞌan̈qꞌuinal tic. 24 Masanil juntzan̈ chon̈abꞌ, snibꞌej ebꞌ syilaꞌ yedꞌ yabꞌan jantac sjelanil vin̈ ix acꞌji yuj Dios. 25 A ebꞌ anima sjavi dꞌa junjun abꞌil, syicꞌcot juntzan̈ silabꞌ tic ebꞌ: Qꞌuen plata, qꞌuen oro, pichul caro stojol, yamcꞌabꞌ yic oval, juntzan̈ sucꞌuqꞌui sjabꞌ, nocꞌ chej yedꞌ nocꞌ mula.
26 Ix smolbꞌan jantac carruaje yic oval yedꞌ nocꞌ chej vin̈aj Salomón chiꞌ. Ay mil 400 carruaje yedꞌ 12 mil nocꞌ chej sqꞌue ebꞌ soldado dꞌa yibꞌan̈. Ay carruaje yedꞌ nocꞌ chej chiꞌ ayecꞌ dꞌa juntzan̈ chon̈abꞌ to yictaxon juntzan̈ chiꞌ yaji. Ay pax juntzan̈xo carruaje chiꞌ ayecꞌ yedꞌ ebꞌ soldado stan̈van vin̈ rey chiꞌ dꞌa Jerusalén. 27 Man̈xo jantacoc qꞌuen plata ix smolbꞌej vin̈ rey chiꞌ dꞌa Jerusalén chiꞌ, icha val qꞌuen comon qꞌueen. Man̈xo jantacoc pax teꞌ cꞌuteꞌ, icha teꞌ caltacteꞌal higo ay dꞌa span̈anil yichtac vitz, icha chiꞌ yaj teꞌ. 28 A nocꞌ schej vin̈ rey chiꞌ, a dꞌa Egipto scot nocꞌ yedꞌ dꞌa Cilicia, yujto a ebꞌ schon̈vajum vin̈, a ebꞌ smanancot nocꞌ taꞌ. 29 A junoc carruaje smanchajcot dꞌa Egipto, 600 siclos plata stojol, axo junoc nocꞌ chej, 150 siclos stojol nocꞌ. A ebꞌ vin̈ sreyal hitita yedꞌ ebꞌ vin̈ sreyal sirio smananpax nocꞌ dꞌa ebꞌ schon̈vajum vin̈aj rey Salomón chiꞌ.