A strato Jehová yedꞌ vin̈aj Salomón
9
Ayic ix lajvi sbꞌoel stemplo Jehová yuj vin̈aj rey Salomón chiꞌ yedꞌ spalacio vin̈ yedꞌ pax juntzan̈xo tas snibꞌej vin̈ sbꞌoꞌo, 2 ix schꞌoxanxi sbꞌa Jehová dꞌa vin̈ dꞌa schaelal, icha aj schꞌoxan sbꞌa dꞌa vin̈ dꞌa chon̈abꞌ Gabaón. 3 Ix yalan Jehová chiꞌ dꞌa vin̈: Ix vabꞌ tas ix al dꞌa a lesal yedꞌ masanil tas ix a cꞌanaꞌ. Ix vacꞌcanoch jun templo ix a bꞌo tic vicoc yic vachꞌ a dꞌay ol ochn̈ej ejmelal dꞌayin. Ol in tan̈vejn̈ej jun templo tic, ol in ajn̈ej ecꞌ dꞌay dꞌa masanil tiempo. 4 Yuj chiꞌ, tato vachꞌn̈ej ol utej a bꞌa dꞌayin dꞌa smasanil a cꞌool, icha yutejnac sbꞌa vin̈aj David a mam, tato tzin acꞌoch yipoc a cꞌool, tojoln̈ej tzutej a bꞌa, tza cꞌanabꞌajan masanil tas ix vacꞌ a cꞌulej, tza cꞌanabꞌajan in cꞌaybꞌubꞌal yedꞌ in checnabꞌil, 5 a opisio tic ol bꞌeyn̈ejbꞌat dꞌa ebꞌ in̈tilal icha ajnac valan dꞌa vin̈ a mam chiꞌ, ayic valannac dꞌa vin̈ icha tic: Ayn̈ej in̈tilal ol och reyal dꞌa scal ebꞌ chon̈abꞌ israel, xin chi dꞌa vin̈. 6 Palta tato a ach tic yedꞌ ebꞌ in̈tilal ol eyiqꞌuel e bꞌa dꞌa in patic, man̈ ol e cꞌanabꞌajej in checnabꞌil yedꞌ in cꞌaybꞌubꞌal ix vacꞌ e cꞌanabꞌajej, axo dꞌa comon dios ol ex och ejmelal, ol eyalan e bꞌa dꞌay, 7 ol ex viqꞌuel dꞌa sat lum luum vacꞌnac tic dꞌayex. Axo jun templo ix in sicꞌcanoch vicoc tic, ol in patiquejcaneli, ol ex bꞌuchjoc yuj masanil nación. 8 A jun templo te vachꞌ yilji tic ticnaic, toxon̈ej ol qꞌuecan juyan qꞌuen sqꞌueenal. Yuj chiꞌ a ebꞌ ol ecꞌ dꞌa stzꞌey, ol stzetzej ebꞌ, ol laj yal-lan ebꞌ dꞌay junjun: ¿Tas yuj icha tic ix utaj jun chon̈abꞌ yedꞌ jun templo tic yuj Jehová? xcham ebꞌ. 9 Axo ol yalan ebꞌ anima chiꞌ icha tic: A ebꞌ israel tic, ix yiqꞌuel sbꞌa ebꞌ dꞌa spatic Jehová sDiosal, aton jun icꞌannaquelta ebꞌ smam yicham ebꞌ dꞌa Egipto. Axo ticnaic a juntzan̈ comon dios ix yacꞌoch ebꞌ dꞌa scꞌool, ix ochpax ebꞌ ejmelal dꞌay, yuj chiꞌ a sDiosal ebꞌ chiꞌ ix acꞌancot jun chucal tic dꞌa yibꞌan̈ ebꞌ, xcham ebꞌ anima chiꞌ, xchi Jehová dꞌa vin̈aj Salomón chiꞌ.Juntzan̈xo tas sbꞌonac vin̈aj Salomón
10 A vin̈aj Salomón chiꞌ, 20 abꞌil ix yacꞌ vin̈ sbꞌoanqꞌue chabꞌ nivac pat, aton stemplo Jehová yedꞌ pax spalacio vin̈. 11 A vin̈aj Hiram sreyal Tiro ix acꞌancot steꞌal juntzan̈ pat chiꞌ, aton teꞌ cꞌuteꞌ, teꞌ taj yedꞌ jantac qꞌuen oro ix och dꞌay. Yuj chiꞌ 20 chon̈abꞌ dꞌa yol smacbꞌen Galaad ix yacꞌ vin̈aj Salomón dꞌa vin̈aj Hiram chiꞌ. 12 Ayic ix xidꞌecꞌ vin̈aj Hiram chiꞌ yil juntzan̈ chon̈abꞌ chiꞌ, maj schalaj scꞌool vin̈. 13 Ix yalan vin̈ icha tic: Ach vamigo, ¿tas chon̈abꞌil juntzan̈ ix acꞌ tic dꞌayin? xchi vin̈. Yuj chiꞌ a jun macan̈ lum luum dꞌa juntzan̈ chon̈abꞌ chiꞌ, Cabul ix yacꞌ vin̈aj Hiram chiꞌ sbꞌiej luum, syalelcꞌochi “Malaj vachꞌ yochi”. 14 Axo jantac qꞌuen oro ix yacꞌ vin̈aj Hiram dꞌa vin̈aj Salomón chiꞌ jun, ay am 90 quintaloc qꞌueen.
15-24 A vin̈aj rey Salomón chiꞌ, ix yacꞌ val pural vin̈ yoch ebꞌ yin̈tilal ebꞌ cananeo dꞌa munlajel, aton ebꞌ maj yal satjiel yuj ebꞌ israel ayic sjavinac ebꞌ dꞌa Canaán chiꞌ. A ebꞌ chiꞌ aton ebꞌ amorreo, ebꞌ hitita, ebꞌ ferezeo, ebꞌ heveo yedꞌ ebꞌ jebuseo. A juntzan̈ anima chiꞌ, checabꞌ yaj ebꞌ, man̈ yicoclaj sbꞌa ebꞌ. Yuj smunlajel ebꞌ ix sbꞌoqꞌue spalacio vin̈ rey chiꞌ yedꞌ stemplo Jehová. Ix sbꞌoanpaxqꞌue smuroal Jerusalén ebꞌ. Ix svachꞌ bꞌoan juntzan̈xo chon̈abꞌ ebꞌ, aton Hazor, Meguido yedꞌ Gezer yic syal scolan sbꞌa ebꞌ dꞌa oval. (A dꞌa yalan̈taxo a vin̈ sreyal Egipto yacꞌnac oval vin̈ dꞌa chon̈abꞌ Gezer chiꞌ, yacꞌannac ganar vin̈. Masanil ebꞌ cananeo cajan taꞌ smilnaccham vin̈, sn̈usannacpaxtzꞌa chon̈abꞌ chiꞌ vin̈. A jun chon̈abꞌ chiꞌ ix yacꞌ vin̈ dꞌa ix yisil ayic ix yicꞌlan sbꞌa ix yedꞌ vin̈aj Salomón chiꞌ. Axo vin̈aj Salomón chiꞌ ix bꞌoanxiqꞌue yuj smunlajel ebꞌ cananeo chiꞌ.) Ix sbꞌoanpaxqꞌue chon̈abꞌ Bet-horón ebꞌ dꞌa yalan̈ yedꞌ Baalat yedꞌ Tadmor ay dꞌa tzꞌinan lum dꞌa yol yic Judá yedꞌ juntzan̈xo chon̈abꞌ bꞌaj smolchajcan tas tzꞌabꞌlaji yedꞌ juntzan̈ chon̈abꞌ bꞌaj ay nocꞌ chej stocꞌan carruaje yic oval. Ix sbꞌoanpaxqꞌue masanil juntzan̈xo tas ebꞌ ix schec vin̈aj Salomón sbꞌo ebꞌ dꞌa Jerusalén, dꞌa Líbano yedꞌ dꞌa smasanil yol smacbꞌen Israel chiꞌ. An̈ejtonaꞌ a ebꞌ ix bꞌudꞌan jun chꞌolan dꞌa stojolal bꞌaj sqꞌueul cꞌu dꞌa Jerusalén chiꞌ. Ix sbꞌo jun tic ebꞌ ayic toxo ix el ix yisil vin̈ sreyal Egipto, ix yetbꞌeyum vin̈aj Salomón dꞌa yol schon̈abꞌcan vin̈aj David, ix bꞌat cajnaj ix dꞌa spat ix sbꞌoqꞌue vin̈aj Salomón chiꞌ. Maj yacꞌlaj pural ebꞌ yetisraelal vin̈aj Salomón chiꞌ smunlaji. A tas ix scꞌulej ebꞌ, 550 ebꞌ ix acꞌjioch yil juntzan̈ munlajel chiꞌ. Ix och ebꞌ yajalil yedꞌ vin̈aj Salomón chiꞌ, ix ochpax ebꞌ sat yajalil dꞌa ebꞌ soldado, yajalil dꞌa carruaje yic oval yedꞌ dꞌa ebꞌ soldado sqꞌue dꞌa yibꞌan̈ chej.
25 Oxtaquel syacꞌ silabꞌ vin̈aj rey Salomón chiꞌ dꞌa Jehová dꞌa junjun abꞌil, aton silabꞌ sn̈usjitzꞌa smasanil yedꞌ silabꞌ yic juncꞌolal yedꞌ Dios. A dꞌa altar ix sbꞌoqꞌue vin̈ yicoc Jehová, ataꞌ ix yacꞌ silabꞌ chiꞌ vin̈. Ix schecanpax vin̈ n̈usjoctzꞌa incienso dꞌa yichan̈ Jehová ayic ix lajvi sbꞌoel jun templo chiꞌ.
26 Ix schecanpax vin̈ bꞌojoc juntzan̈ teꞌ barco dꞌa Ezión-geber dꞌa slacꞌanil Elat, dꞌa stiꞌ aꞌ Chacchac Mar dꞌa yol yic Edom. 27 A vin̈aj rey Hiram ix checancot juntzan̈ ebꞌ smunlajvum, aton ebꞌ te cꞌaynac yecꞌ dꞌa yibꞌan̈ aꞌ mar. Ix bꞌat ebꞌ dꞌa yol teꞌ barco chiꞌ yedꞌ ebꞌ smunlajvum vin̈aj rey Salomón chiꞌ. 28 Ix cꞌoch ebꞌ dꞌa Ofir, ataꞌ ix yicꞌcot 310 quintal qꞌuen oro ebꞌ dꞌa vin̈aj rey Salomón chiꞌ.