3 Ix lajvi chi, ix bꞌat vin̈aj Salomón chiꞌ yacꞌ oval dꞌa chon̈abꞌ Hamat dꞌa yol yic Soba, ix yacꞌan ganar vin̈. 4 Ix sbꞌoanxiqꞌue chon̈abꞌ Tadmor vin̈, jun ay dꞌa taquin̈ luum yedꞌ juntzan̈ chon̈abꞌ dꞌa yol yic Hamat bꞌaj smolchaj masanil tas svaji. 5 An̈ejtonaꞌ ix sbꞌoxiqꞌue chon̈abꞌ Bet-horón vin̈, jun ay dꞌa yibꞌan̈qꞌuei yedꞌ Bet-horón ay dꞌa yalan̈emta. A juntzan̈ chon̈abꞌ chiꞌ, ayoch smuroal yedꞌ spuertail. Aypaxoch cꞌatan qꞌuen qꞌueen syamnubꞌaloc spuertail chiꞌ. 6 Ix sbꞌoanxiqꞌue chon̈abꞌ Baalat vin̈ yedꞌ juntzan̈xo chon̈abꞌ bꞌaj smolchaj masanil tas svaji. Ix sbꞌoanpax juntzan̈ yedꞌtal carruaje vin̈ yic oval yedꞌ bꞌaj tzꞌaj nocꞌ chej yic oval yedꞌ masanil tas snibꞌej vin̈ ix sbꞌo dꞌa Jerusalén chiꞌ, dꞌa Líbano yedꞌ dꞌa masanil yol smacbꞌen. 7-8 Ay pax juntzan̈ yin̈tilal ebꞌ anima man̈ satbꞌiloquel yuj ebꞌ israel aycan cajan dꞌa scal ebꞌ, aton ebꞌ heteo, ebꞌ amorreo, ebꞌ heveo, ebꞌ ferezeo yedꞌ ebꞌ jebuseo. A ebꞌ chiꞌ man̈ israeloc ebꞌ. Ix acꞌjicanoch ebꞌ dꞌa munlajel yuj vin̈aj Salomón chiꞌ. 9 Palta malaj junoc ebꞌ yetisraelal vin̈ ix yacꞌ pural yacꞌanoch dꞌa munlajel chiꞌ. Ix yacꞌoch ebꞌ vin̈ dꞌa soldadoal, dꞌa sat yajalil ebꞌ vin̈ soldado, dꞌa yajalil dꞌa ebꞌ ayoch dꞌa carruaje yic oval yedꞌ dꞌa ebꞌ vin̈ soldado sqꞌue dꞌa yibꞌan̈ chej. Ataꞌ ix yacꞌoch ebꞌ yetisraelal vin̈ chiꞌ. 10 Axo ebꞌ sat yajal tzꞌilan ebꞌ smunlaj chiꞌ, 250 ebꞌ.

11 A vin̈aj Salomón chiꞌ, ix yiqꞌuel ix yisil vin̈ sreyal Egipto vin̈ bꞌaj cajan dꞌa schon̈abꞌ vin̈aj David, ix yicꞌanbꞌat ix vin̈ dꞌa junxo palacio ix sbꞌo vin̈ yicoc ix, yujto ix snaꞌ vin̈ to man̈ smojoc scajnaj ix bꞌaj ecꞌnac sdespacho vin̈aj rey David, yujto ataꞌ ecꞌnac teꞌ scaxail strato Jehová, te nivan yelcꞌoch jun lugar chiꞌ. 12 Ix yacꞌ n̈usjoctzꞌa silabꞌ vin̈aj rey Salomón dꞌa Jehová dꞌa yibꞌan̈ altar ix sbꞌoqꞌue dꞌa yichan̈ templo chiꞌ. 13 Aton dꞌa juntzan̈ cꞌual albꞌilcan yuj vin̈aj Moisés dꞌa ley to tzꞌacꞌji silabꞌ chiꞌ, ataꞌ ix yacꞌ n̈usjoctzꞌa juntzan̈ silabꞌ chiꞌ vin̈: Aton dꞌa scꞌual icꞌoj ip, dꞌa qꞌuin̈ yic tzꞌalji qꞌuen uj yedꞌ pax dꞌa oxeꞌ nivac qꞌuin̈ tzꞌoch dꞌa yol abꞌil: Aton qꞌuin̈ yic ixim pan malaj yich, qꞌuin̈ ayic slajvi smolji sat avbꞌen yedꞌ qꞌuin̈ yic chinama.

14 Ix yacꞌanpaxoch ebꞌ sacerdote vin̈ yedꞌ ebꞌ levita dꞌa munlajel dꞌa templo dꞌa stzolal. Ix acꞌjioch ebꞌ dꞌa yopisio chiꞌ, icha yajcan yalan vin̈aj David smam vin̈. Ay juntzan̈ ebꞌ levita yopisio sbꞌitan dꞌa Jehová, scolvaj ebꞌ yedꞌ ebꞌ sacerdote dꞌa junjun cꞌu. Ay pax juntzan̈xo ebꞌ stan̈van spuertail templo chiꞌ 15 yedꞌ bꞌaj smolbꞌaj tastac yic templo. Yuj chiꞌ malaj val jabꞌoc ix sqꞌuex vin̈ tastac tzꞌaj smunlaj ebꞌ sacerdote yedꞌ ebꞌ levita icha yajcan yuj vin̈aj David chiꞌ. 16 Masanil munlajel nabꞌil yuj vin̈aj rey Salomón chiꞌ, yictax ix em yich stemplo Jehová masanto ix bꞌoeli, vachꞌ ix aj yicꞌan sbꞌa smasanil.

17 Ix lajvi chiꞌ, ix bꞌat vin̈aj Salomón chiꞌ dꞌa Ezión-geber yedꞌ dꞌa Elat, dꞌa stitac aꞌ Chacchac Mar, dꞌa yol yic Edom. 18 Ix yacꞌcot juntzan̈ teꞌ barco vin̈aj Hiram yedꞌ ebꞌ smunlajtaxon dꞌa teꞌ barco chiꞌ. A ebꞌ vin̈ chiꞌ, yojtac ebꞌ vin̈ yecꞌ dꞌa yibꞌan̈ aꞌ mar. Ix xidꞌecꞌ ebꞌ vin̈ yedꞌ ebꞌ schecabꞌ vin̈aj Salomón chiꞌ dꞌa Ofir. Quenxon̈ej man̈ 320 quintaloc qꞌuen oro ix javi yuj ebꞌ dꞌa vin̈aj Salomón chiꞌ.