Ix ulecꞌ ix sreinail Sabá yil vin̈aj Salomón
9
A ix sreinail Sabá, ix yabꞌ specal ix to a vin̈aj rey Salomón, te nivan yelcꞌoch vin̈, yuj chiꞌ ix javi ix dꞌa Jerusalén yic tzul scꞌanbꞌan juntzan̈ lolonel ix te ajaltac snachajeli, yic syil ix tato yel te jelan vin̈aj Salomón chiꞌ. Nivan ebꞌ schecabꞌ ix yedꞌnac, nivan nocꞌ camello cuchjinac perfume, nivan qꞌuen oro yedꞌ qꞌuen qꞌueen te vachꞌ yilji yedꞌnac ix. Ayic ix javi ix yil vin̈aj rey Salomón chiꞌ, ix scꞌanbꞌan ix dꞌa vin̈ masanil tas nabꞌil yuuj. 2 Axo ix spacan masanil tas ix scꞌanbꞌej ix chiꞌ vin̈, malaj junoc tas ix scꞌanbꞌej ix chiꞌ maj yal spacan vin̈. 3 Ayic ix yilan ix reina chiꞌ jantac sjelanil vin̈aj Salomón chiꞌ yedꞌ spalacio vin̈ bꞌobꞌil yuuj, 4 yedꞌ tastac sva vin̈ dꞌa sat smexa yedꞌ bꞌaj ay ebꞌ ay yopisio yedꞌ vin̈ yedꞌ juntzan̈xo ebꞌ schecabꞌ vin̈ yedꞌ spichul ebꞌ, te chꞌocxo pax yilji spichul ebꞌ tzꞌacꞌan svino vin̈ rey chiꞌ yedꞌ juntzan̈ silabꞌ sn̈usjitzꞌa dꞌa stemplo Jehová, ix te sat scꞌool ix yilan masanil juntzan̈ chiꞌ. 5 Ix yalan ix dꞌa vin̈ rey chiꞌ icha tic: A tas ix vabꞌ dꞌa in chon̈abꞌ yuj jantac tas ix a bꞌoꞌo yedꞌ jantac a jelanil sbꞌinaji, yel ton val. 6 Ayic ix vabꞌan chiꞌ, maj vacꞌochlaj dꞌa in cꞌol tastac tzꞌalchaj chiꞌ, palta axo ticnaic jun, svil val yedꞌ yol in sat. Max qꞌuecꞌochlaj nan̈al juntzan̈ svil tic ix alji vabꞌi, yujto a a jelanil tic, yelxo val ecꞌto dꞌa yichan̈ tas ix vabꞌ chiꞌ. 7 Te vachꞌ yic ebꞌ tzach acꞌan servil, te vachꞌ yic ebꞌ ayn̈ejecꞌ edꞌoc, syabꞌan a jelanil ebꞌ. 8 Alchajocabꞌ vachꞌ lolonel dꞌa Jehová a Diosal, ste tzalaj edꞌoc, yuj chiꞌ ix ach yacꞌoch reyal yic tza chꞌoxan yajalil. Te xajan chon̈abꞌ Israel tic yuj a Diosal chiꞌ, yujto snibꞌej to ayn̈ej ecꞌ jun chon̈abꞌ tic dꞌa masanil tiempo, yuj chiꞌ ach yacꞌoch sreyaloc, yic tzacꞌan reyal dꞌa svachꞌilal yedꞌ dꞌa stojolal, xchi ix reina chiꞌ.9 Ix lajvi chiꞌ ix yacꞌan 100 quintal qꞌuen oro ix dꞌa vin̈ yedꞌ jantac perfume yedꞌ qꞌuen qꞌueen te vachꞌ yilji. Malaj juneloc nivan perfume chiꞌ ix javi dꞌa Israel icha ix siej ix sreinail Sabá chiꞌ dꞌa vin̈aj rey Salomón chiꞌ.
10 An̈ejaꞌ pax ebꞌ vin̈ vinac smunlaj dꞌa vin̈aj Hiram yedꞌ ebꞌ vin̈ smunlaj dꞌa vin̈aj Salomón chiꞌ, ix xidꞌecꞌ ebꞌ vin̈ yicꞌcot qꞌuen oro dꞌa Ofir, ix yicꞌanpaxcot teꞌ sándalo ebꞌ vin̈ yedꞌ qꞌuen qꞌueen te vachꞌ yilji. 11 A yedꞌ teꞌ sándalo chiꞌ ix schec vin̈ rey chiꞌ bꞌojoc sbꞌeal stemplo Jehová yedꞌ spalacio vin̈ bꞌachquiltac sqꞌuei yedꞌ stitac. A yedꞌ teꞌ chiꞌ ix sbꞌopax teꞌ arpa vin̈ yedꞌ salterio yic scꞌan ebꞌ tzꞌacꞌan juntzan̈ yamcꞌabꞌ chiꞌ. Malaj bꞌaj tzꞌilchaj teꞌ lajan yedꞌ teꞌ chiꞌ dꞌa yol smacbꞌen Judá. 12 Ix el dꞌa scꞌol vin̈ rey chiꞌ yacꞌan masanil tas ix scꞌan ix sreinail Sabá chiꞌ. Chꞌoc pax yaj tas toxo ix yacꞌ vin̈ sqꞌuexuloc tastac ix yicꞌcot ix. Ix lajvi chiꞌ, ix pax ix dꞌa schon̈abꞌ chiꞌ yedꞌ masanil ebꞌ ajun yedꞌ ix.
A sbꞌeyumal vin̈aj Salomón yedꞌ snivanil yelcꞌochi
13 A qꞌuen oro schaꞌ vin̈aj Salomón dꞌa junjun abꞌil, 500 quintal qꞌueen. 14 Chꞌoc pax yaj qꞌuen syacꞌ ebꞌ chon̈vajum yedꞌ pax qꞌuen oro, qꞌuen plata syacꞌ ebꞌ sreyal Arabia yedꞌ ebꞌ ayoch dꞌa yopisio dꞌa junjun macan̈ smacbꞌen Israel. 15 Ix schec vin̈ bꞌochaj 200 nivac maclabꞌ jul-labꞌ, ayoch qꞌuen oro dꞌay, ay am lajchaveoc libra qꞌuen oro ayoch dꞌa junjun. 16 Ix lajvi chiꞌ, ix schecanpax vin̈ bꞌojoc 300 xo yunetac maclabꞌ jul-labꞌ chiꞌ. Ay am vaqueoc libra qꞌuen oro ix och dꞌa junjun. Axo dꞌa jun nivan pat scuchan Te teꞌ yic Líbano ix yacꞌcan vin̈. 17 Ix schecanpax vin̈ bꞌojoc jun scꞌojnubꞌ dꞌa sdespacho, ix acꞌjioch qꞌuen oro te vachꞌ dꞌay, ix acꞌjipaxoch marfil yelvanubꞌoc. 18 A jun cꞌojnubꞌ chiꞌ, vac tzol sqꞌue sbꞌachquiltaquil scꞌoochal. Aypaxem qꞌuen oro bꞌaj tzꞌem bꞌachan yoc vin̈ rey chiꞌ, yaman yaj yedꞌ jun cꞌojnubꞌ chiꞌ. Ayqꞌue scꞌabꞌ jun cꞌojnubꞌ chiꞌ dꞌa junjun stzꞌeytac. Bꞌobꞌilpaxoch yechel junjun nocꞌ choj dꞌa junjun scꞌabꞌ chiꞌ. 19 Ay pax lajchavexo yechel nocꞌ choj chiꞌ, junjun aycan dꞌa sn̈itac junjun sbꞌachquiltaquil chiꞌ. Malaj junocxo rey bꞌoannac yic icha yic vin̈ chiꞌ. 20 Masanil scopa vin̈ rey chiꞌ, nabꞌa oro yedꞌ masanil yamcꞌabꞌ ay dꞌa jun nivan pat scuch Te teꞌ yic Líbano. Malaj junoc yamcꞌabꞌ chiꞌ plata, yujto a dꞌa stiempoal vin̈ rey chiꞌ, a qꞌuen plata chiꞌ malaj yelcꞌoch qꞌueen. 21 A ebꞌ schecabꞌ vin̈ rey chiꞌ, sbꞌat ebꞌ yedꞌ ebꞌ schecabꞌ vin̈aj Hiram yedꞌ juntzan̈ nivac barco icha teꞌ sbꞌat dꞌa Tarsis. Oxeꞌ abꞌil sbꞌatcan ebꞌ yic sbꞌat yicꞌancot qꞌuen oro ebꞌ, qꞌuen plata, marfil, nocꞌ chabꞌin yedꞌ nocꞌ pavo real.
22 A vin̈aj rey Salomón chiꞌ, ecꞌbꞌal sbꞌeyumal vin̈ yedꞌ pax sjelanil vin̈ dꞌa yichan̈ masanil ebꞌ rey dꞌa yolyibꞌan̈qꞌuinal tic. 23 Masanil ebꞌ vin̈ rey chiꞌ, ix javi ebꞌ vin̈ dꞌa vin̈ yic tzul yilan ebꞌ vin̈, ma tzul yabꞌan ebꞌ vin̈ jantac sjelanil vin̈ ix acꞌji yuj Dios. 24 Masanil ebꞌ chiꞌ ix yicꞌcot silabꞌ ebꞌ dꞌa vin̈ dꞌa junjun abꞌil: Aton qꞌuen plata, qꞌuen oro, pichul, yamcꞌabꞌ yic oval, perfume, nocꞌ chej yedꞌ nocꞌ mula.
Ix sman carruaje vin̈aj Salomón yedꞌ nocꞌ chej
25 Ay 4 mil spatil nocꞌ chej yedꞌ carruaje yic vin̈aj rey Salomón chiꞌ yedꞌ 12 mil nocꞌ chej scuchan ebꞌ soldado. Ay carruaje yedꞌ nocꞌ chej ayecꞌ yedꞌ ebꞌ stan̈vumal vin̈ rey dꞌa Jerusalén, ay pax ayecꞌ dꞌa juntzan̈xo chon̈abꞌ. 26 Ix yacꞌ reyal vin̈ dꞌa yibꞌan̈ juntzan̈xo ebꞌ vin̈ rey scotn̈ej dꞌa aꞌ Éufrates, masanto scꞌoch dꞌa yol yic ebꞌ filisteo, scꞌoch dꞌa smojonal Egipto. 27 A dꞌa Jerusalén chiꞌ, a qꞌuen plata icha comon qꞌueen ix aj qꞌueen yuj vin̈ rey chiꞌ. Axo teꞌ cꞌuteꞌ, lajan ix aj teꞌ icha teꞌ caltacteꞌal higo dꞌa yichtac vitz. 28 A nocꞌ schej vin̈ rey chiꞌ, a dꞌa Egipto scot nocꞌ yedꞌ dꞌa juntzan̈xo nación.
A schamel vin̈aj rey Salomón
29 A jantacto yabꞌixal vin̈aj rey Salomón chiꞌ, ayic ix el yich masanto slajvubꞌ, tzꞌibꞌabꞌilcan dꞌa chꞌan̈ yuum vin̈aj Natán schecabꞌ Dios yedꞌ dꞌa chꞌan̈ yic vin̈aj Ahías schecabꞌ Dios aj Silo yedꞌ dꞌa chꞌan̈ bꞌaj tzꞌibꞌabꞌilcan tas ix chꞌoxji yil vin̈ schecabꞌ Dios scuch Iddo yic tzꞌalji yuj vin̈aj Jeroboam yuninal vin̈aj Nabat. 30 A vin̈aj Salomón chiꞌ, 40 abꞌil ix yacꞌ reyal vin̈ dꞌa Jerusalén dꞌa yibꞌan̈ chon̈abꞌ Israel, 31 axo yic ix cham vin̈, ix mucchaj vin̈ dꞌa schon̈abꞌ vin̈aj David smam vin̈. Ix lajvi chiꞌ axo vin̈aj Roboam yuninal vin̈ ix ochcan reyal sqꞌuexuloc.