A Chꞌan̈ Schabꞌil Libro
CRÓNICAS
Ix scꞌan sjelanil vin̈aj Salomón dꞌa Dios
1
A vin̈aj Salomón yuninal vin̈aj David, ix tecꞌcꞌaj val yopisio vin̈, yujto a Jehová sDiosal vin̈ ayoch yedꞌoc, ix te qꞌuechaan̈ vin̈ dꞌa yopisio chiꞌ. 2 Ix yavtan masanil ebꞌ yetisraelal vin̈: Aton ebꞌ nivac yajalil ebꞌ soldado, ebꞌ juez, ebꞌ yichamtac vinaquil chon̈abꞌ yedꞌ ebꞌ yajal yaj dꞌa scal ebꞌ scꞌabꞌ yoc. 3 Ix bꞌat vin̈ yedꞌ masanil ebꞌ ix smolbꞌej sbꞌa chiꞌ dꞌa jun lugar chaan̈ dꞌa Gabaón, yujto ataꞌ aycan cajnubꞌ bꞌaj schꞌox sbꞌa Jehová, aton jun sbꞌonaccan vin̈aj Moisés schecabꞌ Dios dꞌa tzꞌinan luum. 4 Palta a vin̈aj rey David icꞌjinaccot teꞌ scaxail strato Jehová dꞌa Quiriat-jearim, yacꞌannacoch vin̈ dꞌa yol jun mantiado bꞌobꞌil yuj dꞌa Jerusalén. 5 Axo pax jun altar nabꞌa bronce bꞌobꞌil yuj vin̈aj Bezaleel yuninal vin̈aj Uri, yixchiquin vin̈aj Hur, a dꞌa Gabaón chiꞌ aycani, dꞌa yichan̈ scajnubꞌ Jehová. Ix bꞌat vin̈aj rey Salomón chiꞌ yedꞌ masanil ebꞌ anima chiꞌ taꞌ, yic bꞌat scꞌanbꞌej sbꞌa ebꞌ dꞌa Dios.6 Ix qꞌuecꞌoch vin̈ dꞌa yichan̈ Jehová, bꞌaj ay jun altar bronce chiꞌ, aton dꞌa yichan̈ mantiado bꞌaj schꞌox sbꞌa Jehová. Ix schecan vin̈ n̈usjoctzꞌa mil nocꞌ silabꞌ dꞌa Jehová dꞌa yibꞌan̈ jun altar chiꞌ.
7 A dꞌa jun acꞌval chiꞌ, ix schꞌox sbꞌa Jehová dꞌa vin̈, ix yalan icha tic: Cꞌan dꞌayin tas tza nibꞌej, ol vacꞌ dꞌayach, xchi dꞌa vin̈. 8 Ix yalan vin̈ dꞌa Dios chiꞌ icha tic: A ach tic Mamin, ix acꞌ val a vachꞌcꞌolal dꞌa vin̈aj David in mam. A inxo ix in acꞌoch reyal sqꞌuexuloc vin̈. 9 A ticnaic ach Jehová Dios, elocabꞌcꞌoch tas ix al dꞌa vin̈ in mam chiꞌ, yujto ix in acꞌoch reyal dꞌa jun a chon̈abꞌ man̈ jantacoc sbꞌisul tic, icha spococal lum luum. 10 Yuj chiꞌ, acꞌ in jelanil, tzacꞌan vojtaquej tas svutej in cuchbꞌan jun chon̈abꞌ tic. Yujto malaj junoc mach syal yacꞌan yajalil dꞌa jun a chon̈abꞌ tic dꞌa yol yicoꞌ, xchi vin̈.
11 Ix yalanxi Dios dꞌa vin̈ icha tic: Yujto a jun tic ix javi dꞌa a pensar a cꞌanani, man̈oc a bꞌeyumal, ma snivanil elcꞌochi, ma schamel ebꞌ ajcꞌool, mato snajatbꞌi a qꞌuinal, man̈oc chiꞌ ix a cꞌanaꞌ, palta aꞌ a jelanil ix a cꞌanaꞌ yedꞌ aj pensaril yic ol yal acꞌan reyal dꞌa in chon̈abꞌ bꞌaj ach vacꞌoch reyal tic, 12 yuj chiꞌ, ol vacꞌ a jelanil yedꞌ aj pensaril chiꞌ. Ol vacꞌanpax a bꞌeyumal yedꞌ snivanil elcꞌochi. Malaj junoc rey jelan ecꞌnacxo icha ach tic, man̈xa pax junocxo icha ach tic olto ochoc, xchi dꞌa vin̈.
13 Ix lajvi chiꞌ ix emixta vin̈ dꞌa Gabaón bꞌaj ay scajnubꞌ Dios chiꞌ, ix jax vin̈ dꞌa Jerusalén, ix yacꞌan reyal vin̈ dꞌa Israel chiꞌ.
Ix smolbꞌej nocꞌ chej vin̈aj rey Salomón yedꞌ juntzan̈ carruaje
14 Ix smolbꞌan mil 400 carruaje yic oval vin̈aj rey Salomón chiꞌ yedꞌ 12 mil nocꞌ chej scuchan ebꞌ soldado. Ix yacꞌancan juntzan̈ chiꞌ vin̈ dꞌa Jerusalén yedꞌ dꞌa juntzan̈xo chon̈abꞌ. 15 Man̈xo jantacoc qꞌuen plata yedꞌ qꞌuen oro ix smolbꞌej vin̈ dꞌa Jerusalén chiꞌ, ichaxon̈ej qꞌuen comon qꞌueen ix aj qꞌueen. A teꞌ cꞌuteꞌ, toxon̈ej icha teꞌ caltacteꞌal higo dꞌa span̈anil yichtac lum vitz ix aj teꞌ. 16 A nocꞌ schej vin̈ rey chiꞌ, ix manchajcot nocꞌ dꞌa Muzri yedꞌ dꞌa Cilicia. A ebꞌ vin̈ smanvajum vin̈ rey chiꞌ smanancot nocꞌ taꞌ. 17 A junjun carruaje cotnac dꞌa Egipto chiꞌ, 600 siclo plata stojol, axo junjun nocꞌ chej chiꞌ, 150 siclo plata stojol nocꞌ. Axo masanil ebꞌ vin̈ sreyal ebꞌ heteo yedꞌ ebꞌ sirio, a ebꞌ vin̈ smananxi dꞌa ebꞌ schon̈vajum vin̈aj Salomón chiꞌ.