A vin̈aj Salomón yedꞌ ix yisil vin̈ sreyal Egipto
3
Ix yicꞌlaj sbꞌa vin̈aj Salomón yedꞌ ix yisil vin̈ sreyal Egipto yic tzꞌoch juncꞌolal dꞌa scal schon̈abꞌ ebꞌ. A dꞌa schon̈abꞌcan vin̈aj David ix icꞌjibꞌat ix yuj vin̈ yacbꞌan sbꞌochaj spalacio vin̈ yedꞌ stemplo Jehová yedꞌ pax muro dꞌa spatictac Jerusalén. 2 A dꞌa jun tiempoal chiꞌ, a dꞌa juntzan̈ lugar chaan̈, ataꞌ syacꞌ silabꞌ ebꞌ anima vachꞌchom man̈ smojoc, yujto manto bꞌolaj stemplo Jehová.Ix scꞌan sjelanil vin̈aj Salomón dꞌa Dios
3 Te ay val och Jehová dꞌa scꞌool vin̈aj Salomón, scꞌanabꞌajej val scꞌaybꞌubꞌal Jehová vin̈, aton albꞌilcan yuj vin̈ smam vin̈. Vachꞌchom icha chiꞌ, palta an̈ejaꞌ ix yacꞌ juntzan̈ silabꞌ vin̈ yedꞌ incienso dꞌa Jehová dꞌa juntzan̈ lugar chaan̈ chiꞌ. 4 Ix xidꞌecꞌ vin̈ yacꞌ silabꞌ dꞌa Gabaón yujto, nivan yelcꞌoch jun lugar chiꞌ. Jun mil nocꞌ silabꞌ ix yacꞌ n̈usjoc tzꞌa vin̈ dꞌa jun altar ay taꞌ.
5 A dꞌa jun acꞌval ayic ayecꞌ vin̈ dꞌa Gabaón chiꞌ, ix schꞌoxan sbꞌa Jehová dꞌa vin̈ dꞌa vayichal. Ix yalan dꞌa vin̈: Cꞌan tas tza nibꞌej dꞌayin, ol vacꞌ dꞌayach, xchi dꞌa vin̈.
6 Ix tacꞌvi vin̈: Mamin, a xajanejnac val vin̈ a checabꞌ aj David, aton vin̈ in mam, yujto ach scꞌanabꞌajejn̈ej vin̈, tojoln̈ej yutejnac sbꞌa vin̈ dꞌayach. Yuj chiꞌ ix el dꞌa a cꞌool to a in yuninal in vin̈ tic tzin emcan cꞌojan dꞌa sdespacho, icha ix aj yelcꞌoch ticnaic. 7 Mamin Jehová in Diosal, vachꞌchom quelem into, mantalaj in jelanil yic svalan tas tzꞌaj ebꞌ anima, palta ix el val dꞌa a cꞌool ix in acꞌanoch reyal sqꞌuexuloc vin̈ in mam chiꞌ. 8 Axo ticnaic ayinxo och yilumaloc a chon̈abꞌ sicꞌbꞌilel uuj tic. A val jun a chon̈abꞌ tic te nivan, maxtzac bꞌischaj ebꞌ anima. 9 Yuj chiꞌ tzin cꞌan dꞌayach to tzacꞌ in jelanil yic vachꞌ ol yal in cuchbꞌani yedꞌ snachajel vuuj bꞌaj ay tas vachꞌ yedꞌ tas chuc. ¿Tas val ol aj in chꞌolbꞌitan jun a chon̈abꞌ te nivan tic, tato man̈ ol acꞌ in jelanil? xchi vin̈.
10 Ix scha val scꞌol Jehová tas ix scꞌan vin̈ chiꞌ. 11 Yuj chiꞌ ix yal icha tic: Yujto maj a cꞌanaꞌ yic snajtilax a qꞌuinal, man̈oc pax a bꞌeyumal, ma schamel ebꞌ ayoch ajcꞌolal dꞌayach ix a cꞌanaꞌ, palta a a jelanil ix a cꞌanaꞌ yic tza chꞌolbꞌitan in chon̈abꞌ tic, 12 yuj chiꞌ ol vacꞌ tas tza cꞌan chiꞌ. Ol vacꞌ a jelanil chiꞌ. Malaj junoc mach ecꞌnacxo lajan spensar icha ach tic. Malaj pax junocxo mach ol pitzvocchaan̈ ayic toxo ix ach ecꞌbꞌati. 13 Man̈ocn̈ejlaj chiꞌ ol vacꞌ dꞌayach, palta ol vacꞌpax a bꞌeyumal yedꞌ snivanil elcꞌochi, vachꞌchom maj a cꞌanaꞌ. Syalelcꞌochi to malaj junocxo rey icha ach tic yacbꞌan pitzan ach. 14 Tato ol a cꞌanabꞌajejn̈ej tas tzin nibꞌej yedꞌ in checnabꞌil icha aj scꞌanabꞌajannac vin̈ a mam, ol vacꞌ najatbꞌoc a qꞌuinal, xchi Dios chiꞌ dꞌa vin̈.
15 Axo yic ix el svayan̈ vin̈aj rey Salomón chiꞌ, ix nachajel yuj vin̈ to van svayichan vin̈. Axo yic ix jax vin̈ dꞌa Jerusalén, ix bꞌat vin̈ bꞌaj ayecꞌ scaxail strato Jehová, ataꞌ ix schec vin̈ n̈usjoctzꞌa silabꞌ stzꞌa smasanil yedꞌ silabꞌ yic juncꞌolal yedꞌ Dios. Ix lajvi chiꞌ, ix yavtan vin̈ masanil ebꞌ ayoch yopisio yedꞌoc yic sva ebꞌ yedꞌ vin̈.
A sjelanil vin̈aj rey Salomón
16 A dꞌa jun tiempoal chiꞌ, ix cꞌoch chavan̈ ebꞌ ix ajmul ix sbꞌo yaj jun yoval dꞌa yichan̈ vin̈aj rey Salomón chiꞌ. 17 Ix yalan jun ix dꞌa vin̈:
—Mamin rey, a in tic yedꞌ jun ix tic junn̈ej patil caji. Ayic ix cꞌoch scꞌual, ix alji jun vuneꞌ. 18 Schabꞌjial val chiꞌ, ix aljipax yic ix tic. A on̈n̈ej co chavan̈il dꞌa yol teꞌ pat chiꞌ, malaj junocxo mach. 19 Axo dꞌa jun acꞌval ix scꞌan̈atzancham yuneꞌ ix chiꞌ ayic te chamnac el ix svayi. 20 Axom dꞌa chimilacꞌval, ix qꞌue vaan ix, ayic te chamnac in el in vayi, ix yicꞌanqꞌue vaan yuneꞌ ix chamnacxo chiꞌ, ix ul stelbꞌancanoch ix dꞌa in tzꞌey, axo vic pitzan chiꞌ ix yicꞌbꞌat ix dꞌa stzꞌey sqꞌuexuloc yic chiꞌ. 21 Axo yic ix sacbꞌi jun, ix vacꞌan yim vuneꞌ chiꞌ valani, palta chamnacxo. Axo yic ix te sacbꞌi, ix vilani to man̈ vicoclaj jun unin chiꞌ, xchi ix.
22 Ix lajvi chiꞌ, ix yalan yic junxo ix chiꞌ:
—Maay, a jun unin pitzan tic vicoꞌ, axo jun chamnacxo chiꞌ icoꞌ, xchi ix chiꞌ.
Ix yalanpax ix bꞌabꞌel chiꞌ:
—Maay, a jun chamnacxo chiꞌ icoꞌ, axo jun pitzan tic vicoꞌ, xchi ix.
Icha chiꞌ ix aj stelan sbꞌa ebꞌ ix dꞌa yichan̈ vin̈ rey chiꞌ. 23 Yuj chiꞌ ix yalan vin̈: A jun ix tic syal ix: Vic jun unin pitzan tic, axo jun chamnacxo chiꞌ icoꞌ, xchi ix. An̈ejaꞌ junxo ix chiꞌ, icha chiꞌ syutej ix yalan dꞌa ix bꞌabꞌel ix alan chiꞌ, xchi vin̈ rey chiꞌ. 24 Yuj chiꞌ ix yalan vin̈:
—Iqꞌueccot junoc qꞌuen espada dꞌayin, xchi vin̈.
—Chabꞌ tzeyutej jun unin pitzan tic, tzeyacꞌan nan̈aloc yic junjun ebꞌ ix, xchi vin̈.
26 A ix ay yic jun neneꞌ unin pitzan chiꞌ, ix och val pitzꞌnaj cuscꞌolal dꞌa spixan ix, ix yalan ix dꞌa vin̈ rey chiꞌ:
—Mamin rey, elocabꞌ dꞌa a cꞌol max chabꞌajlaj snan̈al jun unin tic. Acꞌjocabꞌ dꞌa ix tic, xchi ix. Ix yalan junxo ix chiꞌ:
—Max canlaj vedꞌoc, max canpaxlaj yedꞌ ix tic. Chabꞌajocabꞌ snan̈al, xchi ix.
27 Yuj chiꞌ ix yalan vin̈ rey chiꞌ:
—Man̈ e milcham jun unin chiꞌ, aqꞌuec dꞌa ix malaj sgana smiljicham chiꞌ, yujto val yel a ix ay yicoꞌ, xchi vin̈.
28 Masanil ebꞌ aj Israel chiꞌ, ix yabꞌ ebꞌ tas ix aj sbꞌoan yaj jun oval chiꞌ vin̈ rey chiꞌ. Te nivan ix aj yelcꞌoch vin̈ dꞌa sat ebꞌ, yujto ix nachajel yuj ebꞌ to ix acꞌji sjelanil vin̈ yuj Dios yic sbꞌoan yaj oval vin̈.