5 Ojtacxo tas ix in yutej vin̈aj Joab yuneꞌ ix Sarvia, ix smilcham chavan̈ ebꞌ vin̈ yajalil ebꞌ soldado quetisraelal vin̈: Aton vin̈aj Abner yuninal vin̈aj Ner yedꞌ vin̈aj Amasa yuninal vin̈aj Jeter. Man̈oclaj dꞌa scal oval ix miljicham ebꞌ vin̈ yuj vin̈, palta ichato dꞌa oval chiꞌ ix cham ebꞌ vin̈. Ichato ix bꞌon̈chajbꞌat stzecꞌul vin̈ yedꞌ xan̈abꞌ yuj schiqꞌuil ebꞌ vin̈. 6 Yuj chiꞌ n̈ican tzutej a bꞌa, mocabꞌ chamlaj vin̈aj Joab chiꞌ dꞌa ichn̈ejtaꞌ. 7 Axo pax ebꞌ vin̈ yuninal vin̈aj Barzilai aj Galaad, tza xajanej ebꞌ vin̈ in cꞌanaꞌ, tzavtejn̈ej ebꞌ vin̈ vael edꞌoc. A ebꞌ vin̈ chiꞌ, ix colvaj ebꞌ vin̈ vedꞌoc ayic ix in el dꞌa vin̈ ucꞌtac aj Absalón chamnac. 8 A pax vin̈aj Simei ayecꞌ dꞌa tic, vin̈ yuninal vin̈aj Gera aj Bahurim dꞌa yin̈tilal Benjamín, te chuc ix yal vin̈ dꞌayin ayic van in bꞌat dꞌa Mahanaim, palta ix cꞌoch vin̈ in scha dꞌa stiꞌ aꞌ Jordán. Ix vacꞌ in tiꞌ dꞌa yichan̈ Jehová to man̈ ol in milchamlaj vin̈. 9 Man̈ acꞌ nivancꞌolal vin̈. An̈ej, a ach tic te n̈ican ach. Scham a naani tas ol utej vin̈. Mocabꞌ ton̈ejoc ol cham vin̈ ichn̈ej taꞌ, palta to ol miljoccham vin̈, xchi vin̈aj rey David chiꞌ dꞌa vin̈aj Salomón chiꞌ.

10 Axo yic ix cham vin̈aj rey David chiꞌ, a dꞌa chon̈abꞌ scuch Schon̈abꞌ David, ataꞌ ix mucchaj vin̈. 11 40 abꞌil ix yacꞌ reyal vin̈ dꞌa chon̈abꞌ Israel. Uqueꞌ abꞌil dꞌa Hebrón, 33 abꞌil dꞌa Jerusalén. 12 Axo vin̈aj Salomón ix ochcan reyal sqꞌuexuloc vin̈ smam chiꞌ. Te tecꞌan ix aj vin̈aj Salomón yedꞌ yopisio chiꞌ.

13 A vin̈aj Adonías yuneꞌ ix Haguit, ix bꞌat vin̈ yil ix Betsabé, ix snun vin̈aj Salomón. Ix scꞌanbꞌan ix dꞌa vin̈ icha tic:

—¿Dꞌa juncꞌolal am tzach javi? xchi ix.

—Iꞌ, dꞌa juncꞌolal, xchi vin̈. 14 Ix yalan vin̈:

—Ay val jun tas tzin nibꞌej sval dꞌayach, xchi vin̈ dꞌa ix.

—Alaꞌ, xchi ix.

15 —Ojtac to toxonton vic yaj jun reyal tic. Ix stan̈vej masanil chon̈abꞌ Israel bꞌaqꞌuin̈ tzin och reyal. Axo ticnaic jun, axo vin̈ vucꞌtac ix och reyal chiꞌ, yujto icha chiꞌ ix aj snaan Jehová. 16 A ticnaic ay val jun tas tzin cꞌan dꞌayach, comonoc man̈ ol a teneqꞌui, xchi vin̈ dꞌa ix.

—Al tas tza nibꞌej chiꞌ, xchi ix.

17 Ix yalan vin̈:

—Tzin tevi dꞌayach to tzal dꞌa vin̈aj rey Salomón to syacꞌ ix Abisag aj Sunem vin̈ vetbꞌeyumoc. Ol scꞌanabꞌajej vin̈ tas tzalaꞌ, xchi vin̈ dꞌa ix.

18 —Ichocabꞌtaꞌ, ol val dꞌa vin̈ rey tas tza nibꞌej chiꞌ, xchi ix Betsabé chiꞌ.

19 Ix lajvi chiꞌ ix bꞌat ix yal dꞌa vin̈aj rey Salomón chiꞌ tas ix yal vin̈aj Adonías chiꞌ. Ixn̈ej yil vin̈ rey chiꞌ yochcꞌoch ix, ix qꞌue vaan vin̈, ix em n̈ojan vin̈ dꞌa yichan̈ ix. Ix lajvi chiꞌ, ix emxi cꞌojan vin̈ dꞌa yol sdespacho, ix schecan vin̈ icꞌchajcot jun nivan xila bꞌaj tzꞌem cꞌojan ix snun vin̈ chiꞌ dꞌa svachꞌ cꞌabꞌ. 20 Ix yalan ix:

—Tzin tevi dꞌayach to ay jaybꞌelan̈ in lolonel sval dꞌayach, mocabꞌ a teneqꞌui, xchi ix.

—Al masanil tas tza cꞌan chiꞌ nunin, man̈ a naꞌ to ol in tenecꞌ dꞌayach, xchi vin̈ rey chiꞌ dꞌa ix.

21 —Comonoc abꞌ tzacꞌ ix Abisag aj Sunem yetbꞌeyumoc vin̈ ucꞌtac aj Adonías, xchi ix.

22 Ix tacꞌvi vin̈ dꞌa ix snun chiꞌ: ¿Tas yuj tzul a cꞌan ix Abisag yetbꞌeyumoc vin̈aj Adonías chiꞌ? Ichato tzul a cꞌanaꞌ to svacꞌ vopisio tic dꞌa vin̈, yujto bꞌabꞌel vinac vin̈, aypaxoch vin̈aj sacerdote Abiatar yedꞌ vin̈aj Joab yuneꞌ ix Sarvia yedꞌ vin̈, xchi vin̈ dꞌa ix.

23 Ix lajvi yalan juntzan̈ chiꞌ vin̈aj rey Salomón chiꞌ, ix yacꞌan stiꞌ vin̈ dꞌa Jehová: Yacꞌocabꞌ in yaelal Jehová tato max cham vin̈aj Adonías yuj tas scꞌan chiꞌ. 24 A Jehová ix in acꞌanoch reyal sqꞌuexuloc vin̈ in mam, yic vachꞌ tzꞌaj yelcꞌoch bꞌaj ix yacꞌ stiꞌ to ix yacꞌ jun opisio tic dꞌayin yedꞌ dꞌa smasanil vin̈tilal. Yuj chiꞌ svacꞌ in tiꞌ dꞌa yichan̈ to a ticnaic ol cham vin̈aj Adonías chiꞌ, xchi vin̈.

25 A dꞌa jun rato chiꞌ ix yalan vin̈ rey chiꞌ dꞌa vin̈aj Benaía yuninal vin̈aj Joiada to bꞌat smilcham vin̈aj Adonías chiꞌ vin̈. Yuj chiꞌ ix bꞌat vin̈ smilcham vin̈aj Adonías chiꞌ. 26 Ix yalanpax vin̈ rey chiꞌ dꞌa vin̈aj sacerdote Abiatar: A ticnaic sval dꞌayach to tzach bꞌat dꞌa a chon̈abꞌ Anatot. Smoj val tzach chami, palta man̈ ol ach in milchamlaj yujto a ach ecꞌnac ach yilumaloc teꞌ scaxail strato Jehová dꞌa stiempoal vin̈ in mam. A jun ach pax abꞌnac syail dꞌa masanil bꞌaj yabꞌnac syail vin̈ in mam chiꞌ, xchi vin̈aj Salomón chiꞌ. 27 Icha chiꞌ ix aj yelcan vin̈aj Abiatar chiꞌ dꞌa sacerdoteal yuj vin̈aj Salomón chiꞌ, ix elcancꞌoch tas albꞌil yuj Jehová dꞌa Silo yuj ebꞌ yin̈tilal vin̈aj Elí.

28 An̈ejaꞌ vin̈aj Joab, ix yacꞌpaxoch sbꞌa vin̈ yedꞌ vin̈aj Adonías chiꞌ, vachꞌchom maj yacꞌoch sbꞌa vin̈ yedꞌ vin̈aj Absalón. Yuj chiꞌ, ayic ix cꞌoch jun lolonel tic dꞌa vin̈, ix bꞌat scꞌubꞌanel sbꞌa vin̈ dꞌa yol scajnubꞌ Jehová yalani, ix och yubꞌyubꞌ vin̈ dꞌa schꞌaac altar dꞌa schiquintac. 29 Ix bꞌat alji dꞌa vin̈aj Salomón chiꞌ chajtil to a dꞌa altar dꞌa scajnubꞌ Jehová, ataꞌ ayecꞌ vin̈aj Joab chiꞌ scol sbꞌa. Ix yalan vin̈aj Salomón chiꞌ dꞌa vin̈aj Benaía to sbꞌat vin̈ smilcham vin̈ taꞌ. 30 Ix bꞌat vin̈ bꞌian, ix yalan vin̈ dꞌa vin̈aj Joab chiꞌ:

—Toxo ix yal vin̈ rey to tzach elta, xchi vin̈ dꞌa vin̈.

Ix tacꞌvi vin̈aj Joab chiꞌ:

—Maay. A dꞌa tic tzin chami, xchi vin̈.

Ix bꞌat yalanxi vin̈aj Benaía chiꞌ dꞌa vin̈ rey tas ix yutej vin̈aj Joab chiꞌ yalani. 31 Ix yalan vin̈aj rey Salomón chiꞌ:

—Chamocabꞌ vin̈ taꞌ, ujocabꞌ icha sgana vin̈ chiꞌ. Bꞌat a mucan snivanil vin̈ chiꞌ, yic vachꞌ a schamel ebꞌ malaj smul smilnaccham vin̈, man̈xooc dꞌa yibꞌan̈ vin̈ in mam yedꞌ dꞌa vibꞌan̈ scani. 32 Aocabꞌ Jehová tzꞌacꞌancanoch juntzan̈ chamel chiꞌ smuloc vin̈, yujto man̈oc vin̈ in mam checjinac vin̈ ayic smilannac vin̈aj Abner vin̈, aton vin̈ yuninal vin̈aj Ner yajalil ebꞌ soldado Israel yedꞌ vin̈aj Amasa yuninal vin̈aj Jeter yajalil ebꞌ soldado Judá. A ebꞌ vin̈ chavan̈ chiꞌ más te vachꞌ ebꞌ vin̈ dꞌa yichan̈ vin̈aj Joab chiꞌ, tojol spensar ebꞌ vin̈. 33 A schamel ebꞌ vin̈ chiꞌ ochocabꞌcan smuloc vin̈aj Joab chiꞌ yedꞌ ebꞌ yin̈tilal dꞌa juneln̈ej. Palta yacꞌocabꞌ svachꞌcꞌolal Jehová dꞌa quibꞌan̈ a on̈ yin̈tilal on̈ vin̈aj rey David tic, ol on̈ ochn̈ejcan dꞌa sdespacho vin̈, xchi vin̈.

34 Ix lajvi chiꞌ ix bꞌat vin̈aj Benaía smilcham vin̈aj Joab chiꞌ. Ayic toxo ix cham vin̈, ix bꞌat mucjican snivanil vin̈ dꞌa spat dꞌa tzꞌinan luum. 35 Axo vin̈ rey chiꞌ ix acꞌanoch vin̈aj Benaía chiꞌ yajaliloc ebꞌ soldado sqꞌuexuloc vin̈aj Joab chiꞌ. Ix acꞌjipaxoch vin̈aj sacerdote Sadoc sqꞌuexuloc vin̈aj Abiatar. 36 Ix lajvi chiꞌ, ix avtaj vin̈aj Simei yuj vin̈ rey chiꞌ, ix yalan vin̈ dꞌa vin̈:

—Bꞌoqꞌue junoc a pat dꞌa Jerusalén tic bꞌaj tzach cajnaji, juneln̈ej tzach can dꞌa tic. 37 Tato tzach el jun, tzach cꞌaxpajecꞌ dꞌa aꞌ Cedrón, axo a cham chiꞌ. A a chamel chiꞌ, a ach tzicꞌcot dꞌa ibꞌan̈, xchi vin̈ rey chiꞌ dꞌa vin̈.

38 Ix tacꞌvi vin̈aj Simei chiꞌ:

—Ichocabꞌ taꞌ mamin rey, ol in cꞌanabꞌajej tas tzal chiꞌ, xchi vin̈.

Najtil ix ecꞌ cajan vin̈aj Simei chiꞌ dꞌa Jerusalén. 39 Palta axo ix el yoxil abꞌil, ix el chavan̈ ebꞌ vin̈ schecabꞌ vin̈, axo dꞌa Gat bꞌaj ayoch vin̈aj Aquis yuninal vin̈aj Maaca reyal ix cꞌochcan ebꞌ vin̈. Axo yic ix alji dꞌa vin̈ to a dꞌa Gat ayecꞌ ebꞌ vin̈ schecabꞌ vin̈ chiꞌ, 40 elan̈chamel ix yacꞌoch stzꞌum nocꞌ sbꞌuru vin̈. Ix bꞌat vin̈ say ebꞌ vin̈ schecabꞌ dꞌa Gat chiꞌ. Axo yic ix ilchaj ebꞌ vin̈ yuj vin̈ ix yicꞌan meltzaj ebꞌ vin̈. 41 Axo ix yabꞌan vin̈aj Salomón to a vin̈aj Simei ix xidꞌecꞌ vin̈ dꞌa Gat, palta ayxoecꞌ vin̈ dꞌa Jerusalén chiꞌ. 42 Yuj chiꞌ ix schec vin̈ rey chiꞌ avtajcot vin̈, ix yalan vin̈ dꞌa vin̈:

—¿Tom maj val dꞌayach to tzacꞌ a tiꞌ dꞌa yichan̈ Jehová to max yal el dꞌa yol chon̈abꞌ tic? Ix cham val valan dꞌayach tato ay bꞌaj tzach bꞌat dꞌa junocxo lugar tzach chamxon̈ej. Ina ix a tacꞌvej a tiꞌoc to tza cꞌanabꞌajej tas ix val chiꞌ. 43 ¿Tas yuj maj a cꞌanabꞌajej bꞌaj ix acꞌ a tiꞌ chiꞌ dꞌa yichan̈ Jehová? 44 Nacot ticnaic jantac chucal alnac dꞌa vin̈ in mam. A ticnaic a Jehová ol ach chꞌolbꞌitanoc, ol cotcan dꞌa ibꞌan̈ yuj masanil tas a cꞌulejnac chiꞌ. 45 Palta yacꞌocabꞌ svachꞌcꞌolal Jehová dꞌa vibꞌan̈ a in tic. A on̈ yin̈tilal on̈ vin̈aj rey David tic ol on̈ ochn̈ejcan dꞌa sdespacho dꞌa masanil tiempo, xchi vin̈ rey chiꞌ.

46 Ix lajvi chiꞌ, ix yalan vin̈ rey chiꞌ dꞌa vin̈aj Benaía yic bꞌat smilcham vin̈aj Simei chiꞌ vin̈. Ix smilancham vin̈aj Simei chiꞌ vin̈. Icha chiꞌ ix aj svachꞌ ochcan reyal chiꞌ dꞌa yol scꞌabꞌ vin̈aj Salomón chiꞌ.