A ofrenda yic sbꞌochaj templo
29
Ix lajvi chiꞌ, ix yalan vin̈aj rey David chiꞌ dꞌa masanil ebꞌ anima molanecꞌ chiꞌ icha tic: Ex vetchon̈abꞌ, an̈ej val vin̈ vuninal aj Salomón tic ix sicꞌjiel yuj Dios, palta yuneꞌ quelemto vin̈. Axo pax jun munlajel tic te nivan, yujto a jun templo chiꞌ man̈ yicoc anima, palta to scajnubꞌ Jehová Dios ol ajoc. 2 Ix vacꞌ val vip in molbꞌan masanil tastac ol cꞌanchaj dꞌa stemplo co Diosal chiꞌ: Aton qꞌuen oro, qꞌuen plata, qꞌuen bronce, qꞌuen hierro yedꞌ te teꞌ, icha jantac ol cꞌanchaj dꞌa junjun macan̈ munlajel. Te nivan qꞌuen cornalina ix in molbꞌej yedꞌ juntzan̈xo qꞌuen qꞌueen tzꞌoch yelvanubꞌoc yedꞌ tzijtum macan̈il qꞌuen qꞌueen vachꞌ yilji, man̈ jantacoc pax qꞌuen mármol. 3 A yedꞌ jantac tas molbꞌabꞌilxo chiꞌ vuuj yic sbꞌochaj templo chiꞌ, svacꞌanpax jantac qꞌuen oro yedꞌ qꞌuen plata to yel vicoꞌ, yujto te xajan stemplo in Diosal vuuj. 4 Aton 2 mil 300 quintal qꞌuen oro te vachꞌ yedꞌ 5 mil 300 quintal qꞌuen plata, te vachꞌ pax yaj qꞌuen sbꞌoi, yic tzꞌoch qꞌuen dꞌa sattac yol templo yedꞌ juntzan̈ cuarto, 5 yedꞌ dꞌa juntzan̈xo munlajel ol sbꞌo ebꞌ munlajvum dꞌa qꞌuen oro, ma dꞌa qꞌuen plata chiꞌ. Axo ticnaic, ¿mach ex val bꞌecan e cꞌol eyacꞌan e colval dꞌa Jehová? xchi vin̈ rey chiꞌ.6 Yuj chiꞌ, a ebꞌ yajal yaj dꞌa ebꞌ scꞌabꞌyoc, ebꞌ yajal yaj dꞌa junjun in̈tilal ebꞌ yetisraelal, ebꞌ nivac yajalil ebꞌ soldado yedꞌ ebꞌ yajal yaj dꞌa ebꞌ tzꞌilan smunlajel vin̈ rey, masanil ebꞌ chiꞌ, ix el val dꞌa scꞌol ebꞌ yacꞌan scolval. 7 Ix laj yacꞌ scolval ebꞌ yic sbꞌochaj templo chiꞌ: 3 mil 800 quintal qꞌuen oro, 7 mil 600 quintal qꞌuen plata, 13 mil 500 quintal qꞌuen bronce yedꞌ pax 75 mil quintal qꞌuen hierro, masanil juntzan̈ qꞌuen chiꞌ ix yacꞌ ebꞌ.
8 Yedꞌ pax ebꞌ bꞌaj ay qꞌuen qꞌueen vachꞌ yilji, ix yacꞌ qꞌuen ebꞌ dꞌa vin̈aj Jehiel yin̈tilal vin̈aj Gersón, yujto a vin̈ schaan masanil tas tzꞌacꞌji yic sbꞌochaj templo chiꞌ.
9 Ix tzalaj val masanil anima yuj jantac tas ix yacꞌ ebꞌ yajal chiꞌ, yujto dꞌa smasanil scꞌol ebꞌ ix yacꞌ juntzan̈ chiꞌ dꞌa Jehová. An̈ejtonaꞌ ix te tzalajpax vin̈aj rey David chiꞌ yedꞌ ebꞌ.
10 Yuj chiꞌ ix yal vachꞌ lolonel vin̈ dꞌa Jehová dꞌa yichan̈ masanil ebꞌ anima chiꞌ, ix yalan vin̈ icha tic: Mamin Jehová, co Diosal ach, sDiosal ach pax vin̈ co mam quicham Israel. Alchajocabꞌ vachꞌ lolonel dꞌayach dꞌa masanil tiempo. 11 Ic yaj smasanil tas, te nivan elcꞌochi, ay a poder, ay a tziquiquial, Yajal ach dꞌa satchaan̈ yedꞌ dꞌa sat luum tic. 12 A ach tzacꞌ bꞌeyumal yic tzon̈ icꞌanchaan̈. Yajal ach dꞌa yibꞌan̈ smasanil. A dꞌa yol a cꞌabꞌ ay masanil ipalil. Tzacꞌ snivanil yelcꞌochi yedꞌ poder dꞌa ebꞌ bꞌaj a gana acꞌani. 13 Yuj val chiꞌ ach co Diosal, scacꞌ yuj diosal, scalanpax vachꞌ lolonel dꞌayach yuj a bꞌinajnaquil. 14 Val yel, a in tic yedꞌ ebꞌ vetchon̈abꞌ tic, malaj val jabꞌoc tas syal co sian dꞌayach, yujto masanil juntzan̈ tic a dꞌayach scoti, yuj chiꞌ a tas tzacꞌ dꞌayon̈, aꞌ scacꞌpax dꞌayach. 15 A on̈ tic, eqꞌuelbꞌan̈ej tzon̈ ecꞌ dꞌa tic. Mamin, lajan quecꞌ icha ajnac yecꞌ ebꞌ co mam quicham. A co qꞌuinal dꞌa sat luum tic, lajan icha xobꞌal lum luum, man̈ najtiloc tzon̈ eqꞌui.
16 Yuj chiꞌ Mamin Jehová co Diosal, ic yaj masanil juntzan̈ bꞌeyumal tic. A dꞌayach scot masanil juntzan̈ tas ix co molbꞌej tic yic sco bꞌoanqꞌue jun templo yuj ach quicꞌanchaan̈. 17 Mamin, vojtac val to tza chꞌolbꞌitej co pensar, an̈ej val tojolal scha a cꞌool. Yuj chiꞌ dꞌa val smasanil in cꞌool svacꞌ juntzan̈ tic dꞌa yol a cꞌabꞌ. A ticnaic, svil dꞌa tzalajcꞌolal to a masanil ebꞌ a chon̈abꞌ molanecꞌ tic, val dꞌa smasanil scꞌool ebꞌ yedꞌ stzalajcꞌolal ebꞌ syacꞌ silabꞌ dꞌayach. 18 Mamin Jehová, co Diosal ach, sDiosal ach pax ebꞌ co mam quicham, aton vin̈aj Abraham, vin̈aj Isaac yedꞌ vin̈aj Israel. Acꞌn̈ejoch dꞌa spensar ebꞌ a chon̈abꞌ tic, yic tzꞌeln̈ej dꞌa scꞌol ebꞌ yacꞌani. Yacꞌocabꞌ val och sbꞌa ebꞌ dꞌa yol a cꞌabꞌ. 19 An̈ejtonaꞌ tzacꞌan vachꞌ pensaril dꞌa vin̈ vuninal aj Salomón tic, yic scꞌanabꞌajej masanil a checnabꞌil vin̈ yedꞌ a cꞌaybꞌubꞌal dꞌa smasanil scꞌool, sbꞌeybꞌalanpax vin̈, yic ol yal sbꞌoanqꞌue jun templo vin̈, jun ix in molbꞌejcan tas ol och dꞌay, xchi vin̈aj rey David chiꞌ dꞌa slesal.
20 Ix lajvi chiꞌ ix yalanxi vin̈ dꞌa ebꞌ anima chiꞌ icha tic: A ticnaic ex vetchon̈abꞌ, alec vachꞌ lolonel dꞌa Jehová co Diosal, xchi vin̈. Yuj chiꞌ masanil ebꞌ anima chiꞌ ix alan vachꞌ lolonel dꞌa Jehová Dios, aton sDiosal pax smam yicham ebꞌ. Ix em cuman ebꞌ, ix empax n̈ojan ebꞌ dꞌa yichan̈ Dios ayic ayecꞌ ebꞌ dꞌa yichan̈ vin̈ rey chiꞌ. 21 Axo dꞌa junxo cꞌu, ix sn̈usan silabꞌ ebꞌ dꞌa Jehová: Mil nocꞌ quelemtac vacax, mil nocꞌ chꞌac calnel, mil nocꞌ yunetac calnel. Ix yacꞌpax vino ebꞌ, aton tzꞌacꞌjitaxon yedꞌ junjun macan̈ nocꞌ silabꞌ. Te nivan nocꞌ silabꞌ ix yacꞌ ebꞌ yic schiꞌan nocꞌ ebꞌ smasanil. 22 A val dꞌa jun cꞌu chiꞌ, ix va ebꞌ, ix yucꞌan aꞌ ebꞌ dꞌa tzalajcꞌolal dꞌa yichan̈ Jehová.
Ix yacꞌanqꞌue aceite ebꞌ dꞌa sjolom vin̈aj Salomón yuninal vin̈aj rey David dꞌa yichan̈ Jehová dꞌa schaelal, yic tzꞌochcan vin̈ sreyaloc ebꞌ. Ix yacꞌanpaxqꞌue aceite ebꞌ dꞌa sjolom vin̈aj Sadoc yic tzꞌochcan vin̈ sat sacerdoteal. 23 Icha chiꞌ ix aj yoch vin̈aj Salomón reyal sqꞌuexuloc vin̈ smam dꞌa yopisio ix yacꞌ Jehová. Te vachꞌ ix aj yelcꞌoch vin̈ yedꞌ yopisio chiꞌ. Masanil ebꞌ israel ix cꞌanabꞌajan vin̈. 24 Masanil ebꞌ yajal yaji, ebꞌ soldado yedꞌ juntzan̈xo ebꞌ vin̈ yuninal vin̈aj rey David, ix yacꞌ stiꞌ ebꞌ scꞌanabꞌajan vin̈aj rey Salomón chiꞌ. 25 Ix icꞌji val chaan̈ vin̈aj Salomón chiꞌ yuj Jehová dꞌa yichan̈ chon̈abꞌ Israel, ix acꞌji sbꞌinajnaquil vin̈ yuuj. Malaj junoc sreyal Israel ecꞌnacxo icha ix aj sbꞌinaj vin̈ chiꞌ.
A schamel vin̈aj rey David
26-27 A vin̈aj rey David, yuninal vin̈aj Isaí, 40 abꞌil ix yacꞌ reyal vin̈ dꞌa Israel. Uqueꞌ abꞌil ix yacꞌ reyal vin̈ dꞌa ebꞌ yin̈tilal Judá dꞌa Hebrón, 33 abꞌil ix yacꞌpax reyal vin̈ dꞌa masanil ebꞌ israel dꞌa Jerusalén. 28 Te bꞌeyum ix aj vin̈, te nivan pax ix aj yelcꞌoch vin̈. Ichamilxo ix icꞌan scham vin̈, acꞌancꞌolal ix cham vin̈. Axo vin̈aj Salomón vin̈ yuninal vin̈ ix ochcan reyal sqꞌuexuloc.
29 A jantacto yabꞌixal vin̈aj rey David chiꞌ, yictax ix schaanel yich vin̈ masanto ix cham vin̈, aycan bꞌaj tzꞌibꞌabꞌil yuj ebꞌ schecabꞌ Dios, aton vin̈aj Samuel, vin̈aj Natán yedꞌ vin̈aj Gad. 30 Ataꞌ tzꞌibꞌabꞌilcan masanil tas ix scꞌulej vin̈ dꞌa yopisio, snivanil yelcꞌoch vin̈, masanil tastac ix ecꞌ dꞌa yibꞌan̈ vin̈ yedꞌ dꞌa yibꞌan̈ chon̈abꞌ Israel yedꞌ dꞌa yibꞌan̈ juntzan̈xo nación.