Ix yalcan vin̈aj rey David tas ol aj sbꞌo templo
28
A dꞌa Jerusalén ix smolbꞌej masanil ebꞌ yajal yaj dꞌa chon̈abꞌ Israel vin̈aj rey David: Aton ebꞌ yajal yaj dꞌa junjun in̈tilal, ebꞌ yajal yaj dꞌa junjun macan̈ ebꞌ soldado tzꞌilan vin̈ rey chiꞌ yedꞌ ebꞌ sat yajal yaj dꞌa junjun nivac n̈ilan̈ ebꞌ soldado. Ix smolbꞌejpax ebꞌ yajal yaj dꞌa ebꞌ tzꞌilan tastac ay dꞌa vin̈ rey chiꞌ, aton masanil lum luum yedꞌ masanil nocꞌ nocꞌ, ebꞌ tzꞌilan ebꞌ vin̈ yuninal vin̈, ebꞌ ayoch dꞌa yopisio yedꞌ vin̈ yedꞌ masanil ebꞌ soldado te tecꞌan yedꞌ juntzan̈xo ebꞌ vin̈ nivan yelcꞌochi.2 Ix lajvi chiꞌ ix qꞌue lin̈an vin̈, ix yalan vin̈ icha tic: Abꞌec e masanil ex vetchon̈abꞌ. Ay val och dꞌa in pensar in bꞌoanqꞌue junoc templo bꞌaj scan teꞌ scaxail strato Jehová dꞌa juneln̈ej, yic vachꞌ ataꞌ scajnaj co Diosal chiꞌ. Toxo ix in molbꞌej masanil tastac ol cꞌanchaj dꞌay. 3 Palta ix yal Jehová chiꞌ dꞌayin icha tic: Man̈oc ach ol a bꞌoqꞌue jun in cajnubꞌ chiꞌ, yujto acꞌum ach oval, man̈ jantacoc anima a milnacchamoc, xchi dꞌayin. 4 Palta a Jehová co Diosal chiꞌ ix in sicꞌancaneli yic tzin och reyal dꞌa co chon̈abꞌ tic dꞌa juneln̈ej, yujto aꞌ ix sicꞌanel yin̈tilal Judá, yic syacꞌan yajalil dꞌa masanil quin̈tilal. Axo dꞌa yin̈tilal Judá chiꞌ, a yin̈tilal vin̈ in mam ix sicꞌcaneli, axo pax dꞌa yin̈tilal vin̈ in mam chiꞌ, a in ix in siqꞌuel dꞌa scal ebꞌ vucꞌtac yic tzin och reyal dꞌa co chon̈abꞌ tic. 5 Axo ticnaic, a dꞌa scal jantac ebꞌ vuninal ix yacꞌ Jehová chiꞌ, ataꞌ ix siqꞌuel vin̈ vuninal aj Salomón tic, yic tzꞌochcan vin̈ reyal in qꞌuexuloc dꞌa co chon̈abꞌ tic. 6 Ix yalanpax Jehová chiꞌ dꞌayin icha tic: A vin̈ uninal aj Salomón, a vin̈ ol bꞌoanqꞌue jun in cajnubꞌ yedꞌ yamaqꞌuil, yujto a in ix in sicꞌcanel vin̈ yic tzꞌochcan vin̈ vuninaloc, a inxo ol in ochcan smamoc vin̈. 7 An̈ejtonaꞌ ol vacꞌcan yopisio vin̈ dꞌa juneln̈ej, tato ol stecꞌbꞌej val sbꞌa vin̈ scꞌanabꞌajan masanil in checnabꞌil yedꞌ masanil in cꞌaybꞌubꞌal, icha scꞌulej vin̈ ticnaic, xchi Jehová dꞌayin.
8 A ticnaic jun, val dꞌa eyichan̈ e masanil ex vetchon̈abꞌ, schon̈abꞌ Jehová yedꞌ dꞌa yichan̈ co Diosal tzꞌabꞌan tas scalaꞌ, scham val valan dꞌayex to tze bꞌeybꞌalej val masanil schecnabꞌil Jehová co Diosal. Tze cꞌanabꞌajani, yic vachꞌ ol ex cajnajn̈ej dꞌa jun chon̈abꞌ man̈xo jantacoc svachꞌil tic. A exxo ol eyacꞌcan smacbꞌenoc ebꞌ eyuninal dꞌa juneln̈ej. 9 A achxo tic ach vuninal aj Salomón, ojtaquej val co Diosal, tza cꞌanabꞌajan val yedꞌ smasanil a cꞌool. Yujto a Jehová yojtac masanil tas sco naꞌ yedꞌ tas sco nibꞌej. Tato ol al a bꞌa dꞌay, ol tacꞌvoc dꞌayach, palta tato ol icꞌcanel a bꞌa dꞌay jun, ol ach spatiquejcanel dꞌa juneln̈ej. 10 A ticnaic a Jehová ix ach sicꞌaneli yic ol a bꞌoqꞌue jun templo bꞌaj ol cajnajoc, yuj chiꞌ tecꞌan val tzutej a bꞌa, ochocabꞌ munlajel, xchi vin̈aj rey David chiꞌ.
11 Ix lajvi chiꞌ, ix yacꞌan yumal vin̈aj rey David chiꞌ dꞌa vin̈aj Salomón chiꞌ, aton yechel tas ol aj sbꞌo yamaqꞌuil yedꞌ juntzan̈ cuarto bꞌaj ol sicꞌchaj tas tzꞌacꞌji yicoc Jehová yedꞌ juntzan̈ cuarto ol can dꞌa chaan̈ yedꞌ juntzan̈ cuarto ol can dꞌa yol templo chiꞌ yedꞌ jun lugar bꞌaj tzꞌacꞌji tup mul. 12 Ix yacꞌanpax yumal masanil tas nabꞌilxo yuj vin̈, aton tas ol aj sbꞌo yamaqꞌuil templo chiꞌ yedꞌ juntzan̈ cuarto ol och dꞌa spatictac bꞌaj ol sicꞌchaj masanil syamcꞌabꞌil yedꞌ juntzan̈ tas tzꞌacꞌji silabꞌil dꞌa Dios. 13 Ix yacꞌanpax yumal vin̈ tas ol aj yoch ebꞌ sacerdote yedꞌ ebꞌ levita dꞌa stzolal yic ol munlaj ebꞌ dꞌa templo chiꞌ yedꞌ slistail jantac yamcꞌabꞌ yic ejmelal ol och dꞌa Jehová.
14 Ix yacꞌan slistail vin̈ jantac qꞌuen oro yedꞌ jantac qꞌuen plata ol och dꞌa junjun macan̈ juntzan̈ syamcꞌabꞌil templo chiꞌ: 15 Ix yalanpax vin̈ yuj jantac yalil ol aj junjun sbꞌachnubꞌal candil yedꞌ junjun scandilal chiꞌ, tato oro, mato plata. 16 Icha pax chiꞌ ix aj yalan vin̈ yuj juntzan̈ mexa ol och oro dꞌay bꞌaj ol em tzolan ixim pan to yic Jehová yaji yedꞌ juntzan̈ mexa ol och plata dꞌay. 17 Ix yalanpax vin̈ yuj jantac qꞌuen oro ol och dꞌa qꞌuen nivac tenedor yic chibꞌej, dꞌa qꞌuen nivac ucꞌabꞌ yedꞌ dꞌa qꞌuen nivac xalu yedꞌ jantac qꞌuen oro, ma qꞌuen plata ol och dꞌa qꞌuen copa yedꞌ dꞌa juntzan̈xo qꞌueen icha jantac yalil junjun macan̈. 18 Ix yalpax vin̈ yuj jantac qꞌuen oro te vachꞌ ol och dꞌa jun altar yic incienso. Ix yalpax vin̈ jantac qꞌuen oro ol cꞌanchaj dꞌa jun carruaje, aton juntzan̈ yechel querubín jen̈anbꞌat scꞌaxil dꞌa yibꞌan̈ teꞌ scaxail strato Jehová Dios.
19 Masanil juntzan̈ chiꞌ, tzꞌibꞌabꞌilcani, yujto a val Jehová ix acꞌan nachajel yuj vin̈aj rey David chiꞌ tas ol aj sbꞌo jun munlajel chiꞌ, icha ix aj yechel.
20 Yuj chiꞌ, ix yalanpax vin̈aj rey David chiꞌ dꞌa vin̈aj Salomón chiꞌ icha tic: Tecꞌan val tzutej a bꞌa, ochocabꞌ munlajel. Man̈ acꞌ chabꞌaxqꞌue a cꞌool, man̈ ach xivoc, yujto a Jehová co Diosal man̈ ol ach yactejcani. Ol ochn̈ej edꞌoc yic ol yiqꞌuelcꞌoch sbꞌa jun munlajel dꞌa jun templo tic. 21 Aton ebꞌ sacerdote tic yedꞌ ebꞌ levita, icha syal jay macan̈ ebꞌ, te bꞌecan scꞌol ebꞌ smunlaj dꞌa templo chiꞌ. Te bꞌecanpax scꞌool masanil ebꞌ vin̈ vinac smunlaji, ebꞌ jelan spensar smunlaj dꞌa yaln̈ej tas munlajelal yedꞌ ebꞌ yajal yaji. Masanil pax ebꞌ anima, ol scꞌanabꞌajej ebꞌ tas ol alaꞌ, xchi vin̈ dꞌa vin̈aj Salomón chiꞌ.