2-3 A dꞌa bꞌabꞌel uj a vin̈aj Jasobeam yuninal vin̈aj Zabdiel yin̈tilal vin̈aj Fares tzꞌochi.

4 Axo dꞌa schabꞌil uj, a vin̈aj Dodai aj Aho tzꞌochi. Axo vin̈aj Miclot schabꞌil yajal yaji.

5 Axo dꞌa yoxil uj, a vin̈aj Benaía yuninal vin̈aj sat sacerdote Joiada tzꞌochi. 6 A vin̈aj Benaía chiꞌ, yajal yaj vin̈ dꞌa 30 ebꞌ soldado te bꞌinajnac, axo vin̈ yuninal vin̈ scuchan Amisabad, schabꞌil yajal yaj vin̈ dꞌa jun macan̈ ebꞌ soldado tzꞌoch dꞌa jun uj chiꞌ.

7 Axo dꞌa schan̈il uj, a vin̈aj Asael yucꞌtac vin̈aj Joab aycanoch sbꞌi dꞌay, palta axo vin̈aj Zebadías yuninal vin̈ ayoch yajalil sqꞌuexuloc.

8 Axo dꞌa yoil uj, a vin̈aj Samhut yin̈tilal Izhar tzꞌochi.

9 Axo dꞌa svaquil uj, a vin̈aj Ira yuninal vin̈aj Iques aj Tecoa tzꞌochi.

10 Axo dꞌa yuquil uj, a vin̈aj Heles aj Pelón, yin̈tilal Efraín tzꞌochi.

11 Axo dꞌa svajxaquil uj, a vin̈aj Sibecai aj Husa, yin̈tilal vin̈aj Zera tzꞌochi.

12 Axo dꞌa sbꞌalun̈il uj, a vin̈aj Abiezer aj Anatot, yin̈tilal Benjamín tzꞌochi.

13 Axo dꞌa slajun̈il uj, a vin̈aj Maharai aj Netofa, yin̈tilal vin̈aj Zera tzꞌochi.

14 Axo dꞌa yuxluchil uj, a vin̈aj Benaía aj Piratón, yin̈tilal Efraín tzꞌochi.

15 Axo dꞌa slajchavil uj, a vin̈aj Heldai aj Netofa, yin̈tilal vin̈aj Otoniel tzꞌochi.

16-22 Axo pax ebꞌ vin̈ yajal yaj dꞌa junjun macan̈ ebꞌ yin̈tilal Israel, aton ebꞌ vin̈ tic:

A dꞌa ebꞌ yin̈tilal Rubén, a vin̈aj Eliezer yuninal vin̈aj Zicri yajal yaji. Axo dꞌa ebꞌ yin̈tilal Simeón, a vin̈aj Sefatías yuninal vin̈aj Maaca yajal yaji. Axo dꞌa ebꞌ yin̈tilal Leví, a vin̈aj Hasabías yuninal vin̈aj Kemuel yajal yaji. Axo dꞌa ebꞌ vin̈ yin̈tilal vin̈aj Aarón, a vin̈aj Sadoc yajal yaji. Axo dꞌa ebꞌ yin̈tilal Judá, a vin̈aj Eliú yucꞌtac vin̈aj rey David yajal yaji. Axo dꞌa ebꞌ yin̈tilal Isacar, a vin̈aj Omri yuninal vin̈aj Micael yajal yaji. Axo dꞌa ebꞌ yin̈tilal Zabulón, a vin̈aj Ismaías yuninal vin̈aj Abdías yajal yaji. Axo dꞌa ebꞌ yin̈tilal Neftalí, a vin̈aj Jerimot yuninal vin̈aj Azriel yajal yaji. Axo dꞌa ebꞌ yin̈tilal Efraín, a vin̈aj Oseas yuninal vin̈aj Azazías yajal yaji. A dꞌa nan̈al ebꞌ yin̈tilal Manasés, a vin̈aj Joel yuninal vin̈aj Pedaías yajal yaji. Axo dꞌa nan̈alxo ebꞌ yin̈tilal Manasés ay dꞌa Galaad, a vin̈aj Iddo yuninal vin̈aj Zacarías yajal yaji. Axo dꞌa ebꞌ yin̈tilal Benjamín, a vin̈aj Jaasiel yuninal vin̈aj Abner yajal yaji. Axo dꞌa ebꞌ yin̈tilal Dan, a vin̈aj Azareel yuninal vin̈aj Jeroham yajal yaji. Aton juntzan̈ ebꞌ vin̈ tic yajal yaj dꞌa junjun macan̈ ebꞌ yin̈tilal Israel.

23 Ayic ix yalan vin̈aj rey David to sbꞌischaj masanil ebꞌ israel, ix yalan vin̈ to max bꞌischajlaj ebꞌ manto tzꞌacvi dꞌa 20 abꞌil sqꞌuinal, yujto yacꞌnac stiꞌ Jehová to ol yicꞌ val chaan̈ sbꞌisul ebꞌ yin̈tilal Israel icha sbꞌisul qꞌuen cꞌanal. 24 Ix schael yich vin̈aj Joab yicꞌanchaan̈ sbꞌisul ebꞌ yetisraelal chiꞌ, palta maj lajvoclaj yicꞌanchaan̈ vin̈, yujto yuj jun chiꞌ ix cot jun nivan yaelal dꞌa yibꞌan̈ chon̈abꞌ Israel. Yuj chiꞌ a sbꞌisul ebꞌ chiꞌ man̈ tzꞌibꞌabꞌiloc dꞌa yabꞌixal vin̈aj rey David.

25 A vin̈aj Azmavet yuninal vin̈aj Adiel tzꞌilan tastac ay dꞌa vin̈ rey. Axo vin̈aj Jonatán yuninal vin̈aj Uzías tzꞌilani jantac tas molan dꞌa junjun chon̈abꞌ, dꞌa junjun aldea yedꞌ dꞌa junjun cuartel ay dꞌa sattac mojon.

26 Axo vin̈aj Ezri yuninal vin̈aj Quelub tzꞌilan ebꞌ smunlaj dꞌa sluum vin̈ rey chiꞌ. 27 Axo vin̈aj Simei aj Ramat tzꞌilan ebꞌ smunlaj dꞌa teꞌ yuva vin̈ rey chiꞌ. Axo vin̈aj Zabdi aj Safat tzꞌilan ebꞌ smolbꞌan vino dꞌa yedꞌtal. 28 Axo vin̈aj Baal-hanán aj Gedera tzꞌilan ebꞌ smunlaj dꞌa teꞌ olivo yedꞌ dꞌa teꞌ caltacteꞌal higo ay dꞌa pan̈quiltac. Axo vin̈aj Joás tzꞌilan ebꞌ smolan aceite yic sat teꞌ olivo. 29 Axo vin̈aj Sitrai aj Sarón tzꞌilan ebꞌ ayoch yil nocꞌ vacax ay dꞌa Sarón chiꞌ. Axo pax vin̈aj Safat yuninal vin̈aj Adlai tzꞌilan ebꞌ ayoch yil nocꞌ vacax ay dꞌa pan̈quiltac. 30 Axo vin̈aj Obil ismaelita tzꞌilan ebꞌ ayoch yil nocꞌ camello. Axo vin̈aj Jehedías aj Meronot tzꞌilan ebꞌ ayoch yil nocꞌ bꞌuru. 31 Axo vin̈aj Jaziz agareno tzꞌilan ebꞌ ayoch yil nocꞌ calnel yedꞌ nocꞌ chiva. Aton masanil ebꞌ vin̈ tic tzꞌilan masanil tastac ay dꞌa vin̈aj rey David chiꞌ.

32 A vin̈aj Jonatán yicham vin̈aj rey David chiꞌ, tzꞌibꞌum vin̈, te jelan pax vin̈, acꞌum razón yaj vin̈ dꞌa vin̈ rey chiꞌ. Axo vin̈aj Jehiel yuninal vin̈aj Hacmoni tzꞌilan ebꞌ vin̈ yuninal vin̈ rey chiꞌ. 33 Yedꞌ pax vin̈aj Ahitofel acꞌum razón yajpax vin̈ dꞌa vin̈ rey chiꞌ yedꞌ vin̈aj Husai arquita, te vachꞌ yacꞌan vin̈ rey chiꞌ yedꞌ vin̈. 34 Ayic toxo ix cham vin̈aj Ahitofel chiꞌ, a vin̈aj Joiada yuninal vin̈aj Benaía yedꞌ vin̈aj Abiatar ix ochcan sqꞌuexuloc vin̈. Axo vin̈aj Joab sat yajal yaj dꞌa ebꞌ soldado vin̈ rey chiꞌ.