Aton ebꞌ vin̈ yin̈tilal vin̈aj Coré: A vin̈aj Meselemías yuninal vin̈aj Coré yin̈tilal vin̈aj Asaf. 2 Axo ebꞌ vin̈ yuninal vin̈aj Meselemías chiꞌ dꞌa stzolal: Aton vin̈aj Zacarías, vin̈aj Jediael, vin̈aj Zebadías, vin̈aj Jatniel, 3 vin̈aj Elam, vin̈aj Johanán yedꞌ vin̈aj Elioenai.

4-5 Ix yacꞌ svachꞌcꞌolal Dios dꞌa yibꞌan̈ vin̈aj Obed-edom, yuj chiꞌ tzijtum yuninal vin̈. Aton stzolal sbꞌi ebꞌ vin̈ tic: Vin̈aj Semaías, vin̈aj Jozabad, vin̈aj Joa, vin̈aj Sacar, vin̈aj Natanael, vin̈aj Amiel, vin̈aj Isacar yedꞌ vin̈aj Peultai.

6 Axo vin̈aj Semaías chiꞌ, ay ebꞌ vin̈ yuninal vin̈ te nivac ix aj yelcꞌochi, yuj chiꞌ yajal ix aj ebꞌ dꞌa scal ebꞌ scꞌabꞌyoc. 7 A ebꞌ vin̈ yuninal vin̈aj Semaías chiꞌ, aton ebꞌ tic: Vin̈aj Otni, vin̈aj Rafael, vin̈aj Obed, vin̈aj Elzabad, vin̈aj Eliú yedꞌ vin̈aj Samaquías. 8 Masanil ebꞌ vin̈ tic, yin̈tilal ebꞌ vin̈ vin̈aj Obed-edom. Masanil ebꞌ vin̈ uninabꞌil yedꞌ ebꞌ vin̈ scꞌabꞌyoc ebꞌ, te tecꞌan ebꞌ vin̈, ay yip ebꞌ vin̈ smunlaji, 62 sbꞌisul ebꞌ vin̈ dꞌa smasanil.

9 A ebꞌ vin̈ yuninal vin̈aj Meselemías yedꞌ ebꞌ scꞌabꞌyoc vin̈, 18 ebꞌ, te jelan ebꞌ.

10 A ebꞌ vin̈ yuninal vin̈aj Hosa, yin̈tilal vin̈aj Merari: Aton vin̈aj Simri. Vachꞌchom man̈oc vin̈ bꞌabꞌel uninabꞌil yaji, a vin̈ smam vin̈ ix acꞌanoch yajalil. 11 Axo ebꞌ yucꞌtac vin̈: Aton vin̈aj Hilcías schabꞌil, yoxil vin̈aj Tebalías, schan̈il vin̈aj Zacarías. A ebꞌ vin̈ yuninal vin̈aj Hosa yedꞌ ebꞌ scꞌabꞌyoc, 13 ebꞌ dꞌa smasanil.

12 Ix pojchajecꞌ ebꞌ stan̈van stemplo Jehová yedꞌ ebꞌ yajalil ebꞌ, icha ix aj juntzan̈xo ebꞌ yetlevitail ebꞌ. 13 Sorteoal ix aj schꞌoxji tas puertail stan̈vej junjun macan̈ ebꞌ, ayoch ebꞌ quelemtac yedꞌ ebꞌ ichamtac vinac.

14 A vin̈aj Selemías yedꞌ ebꞌ ayoch yedꞌoc ix tan̈van puerta chiꞌ dꞌa stojolal bꞌaj sjavi cꞌu. Axo vin̈aj Zacarías yuninal vin̈aj Selemías chiꞌ, jelan yacꞌan razón vin̈. A vin̈ ix tan̈van puerta chiꞌ dꞌa stojolal norte yedꞌ ebꞌ ayoch yedꞌoc. 15 Axo vin̈aj Obed-edom yedꞌ ebꞌ ayoch yedꞌoc ix tan̈van puerta dꞌa stojolal sur. Axo ebꞌ vin̈ yuninal vin̈ ix tan̈van bꞌaj sicꞌchaj tas ay dꞌa templo. 16 Axo vin̈aj Supim yedꞌ vin̈aj Hosa yedꞌ ebꞌ ayoch yedꞌ ebꞌ vin̈, a ebꞌ vin̈ ix tan̈van puerta chiꞌ dꞌa stojolal bꞌaj tzꞌem cꞌu yedꞌ jun puerta yic Salequet bꞌaj sqꞌue bꞌe.

A ebꞌ vin̈ cuchbꞌum chiꞌ, dꞌa stzolal tzꞌaj stan̈van puerta chiꞌ ebꞌ vin̈. 17 Junjun cꞌu, ay vacvan̈ ebꞌ vin̈ stan̈van puerta dꞌa stojolal bꞌaj sjavi cꞌu, chan̈van̈ ebꞌ vin̈ dꞌa stojolal norte, chan̈van̈ pax ebꞌ vin̈ dꞌa stojolal sur, axo pax bꞌaj sicꞌchaj tas tzꞌacꞌji silabꞌil dꞌa Jehová chiꞌ, chatacvan̈ ebꞌ vin̈ stan̈van junjun puerta. 18 Axo dꞌa yamaqꞌuil templo dꞌa stojolal bꞌaj tzꞌem cꞌu, chan̈van̈ ebꞌ vin̈ stan̈van dꞌa stiꞌ scalleal, chavan̈ pax ebꞌ vin̈ stan̈van dꞌa yamaqꞌuil chiꞌ. 19 Ichaton chiꞌ ix aj spojchajecꞌ opisio chiꞌ dꞌa scal ebꞌ vin̈ yin̈tilal vin̈aj Coré yedꞌ yic vin̈aj Merari.

20 Ay pax juntzan̈xo ebꞌ yetlevitail ebꞌ tzꞌilan bꞌaj sicꞌchaj tas yic Jehová yaji yedꞌ bꞌaj smolchaj ofrenda tzꞌacꞌji dꞌay. 21 A vin̈aj Jehiel yuninal vin̈aj Laadán, dꞌa yin̈tilal vin̈aj Gersón, a vin̈ yajal yaj dꞌa scal ebꞌ scꞌabꞌyoc. 22 Axo pax ebꞌ vin̈ yuninal vin̈aj Jehiel chiꞌ, aton vin̈aj Zetam yedꞌ vin̈aj Joel, a ebꞌ vin̈ ayoch dꞌa yibꞌan̈ stan̈van bꞌaj sicꞌchaj tas ay dꞌa scajnubꞌ Jehová.

23 Ix acꞌchajpaxoch ebꞌ vin̈ yin̈tilal vin̈aj Amram dꞌa yopisio, aton ebꞌ vin̈ yin̈tilal vin̈aj Izhar, vin̈aj Hebrón yedꞌ vin̈aj Uziel. 24 A vin̈aj Sebuel, yin̈tilal vin̈aj Gersón yuninal vin̈aj Moisés, a vin̈ tzꞌilan val juntzan̈ tas ay dꞌa scajnubꞌ Jehová.

25 A vin̈aj Sebuel chiꞌ, scꞌabꞌyoc sbꞌa vin̈ yedꞌ vin̈aj Selomit, yujto a smam yicham vin̈aj Selomit chiꞌ, aton vin̈aj Eliezer yucꞌtac vin̈aj Gersón smam yicham vin̈aj Sebuel chiꞌ. A ebꞌ smam yicham vin̈aj Selomit chiꞌ dꞌa stzolal: Aton vin̈aj Zicri, vin̈aj Joram, vin̈aj Jesaías, vin̈aj Rehabías yedꞌ vin̈aj Eliezer.

26 A vin̈aj Selomit yedꞌ ebꞌ scꞌabꞌyoc stan̈van tastac acꞌbꞌil yicoc Jehová yuj vin̈aj rey David yedꞌ ebꞌ yajal yaj dꞌa scal junjun macan̈ yin̈tilal yedꞌ ebꞌ nivac yajalil ebꞌ soldado. 27 A juntzan̈ tas ix yacꞌ ebꞌ chiꞌ, aton tastac ix yicꞌ ebꞌ bꞌajtac ix laj och oval, ix yacꞌ ebꞌ yic scꞌanchaj dꞌa stemplo Jehová. 28 Ataꞌ aypaxcan masanil tas yacꞌnaccan vin̈aj Samuel schecabꞌ Dios, vin̈aj Saúl yuninal vin̈aj Cis, vin̈aj Abner yuninal vin̈aj Ner yedꞌ vin̈aj Joab yuneꞌ ix Sarvia. Masanil juntzan̈ acꞌbꞌil yicoc Jehová chiꞌ, a vin̈aj Selomit yedꞌ ebꞌ scꞌabꞌyoc ix tan̈vani.

29 A dꞌa ebꞌ vin̈ yin̈tilal vin̈aj Izhar cotnac vin̈aj Quenanías yedꞌ ebꞌ vin̈ yuninal yedꞌ ebꞌ scꞌabꞌyoc. A ebꞌ chiꞌ, man̈xooc dꞌa stemplo Jehová ix och ebꞌ dꞌa yopisio, palta to ix och ebꞌ dꞌa nivac yajalil yedꞌ juezal dꞌa chon̈abꞌ Israel.

30 A vin̈aj Hasabías yedꞌ ebꞌ scꞌabꞌyoc, aton ebꞌ vin̈ yin̈tilal vin̈aj Hebrón, ay mil 700 sbꞌisul ebꞌ, te jelan ebꞌ. Ix acꞌjioch yopisio ebꞌ yilan tastac yic Jehová yaji yedꞌ masanil tastac yic vin̈ rey dꞌa scꞌaxepalecꞌ aꞌ Jordán dꞌa stojolal bꞌaj tzꞌem cꞌu.

31-32 Axo pax dꞌa scꞌaxepal aꞌ Jordán chiꞌ, bꞌaj cajan ebꞌ yin̈tilal Rubén, ebꞌ yin̈tilal Gad yedꞌ nan̈alxo ebꞌ yin̈tilal Manasés, a vin̈aj Jerías yedꞌ 2 mil 700 ebꞌ scꞌabꞌyoc, ix acꞌjipaxoch ebꞌ dꞌa yopisio chiꞌ. Yin̈tilal pax ebꞌ vin̈aj Hebrón. Ayic 40 abꞌilxo yoch vin̈aj David reyal, ataꞌ ix saychajeqꞌui bꞌajtac cajan ebꞌ vin̈ yin̈tilal vin̈aj Hebrón. Ix ilchaji to ay ebꞌ cajan dꞌa Jazer dꞌa yol yic Galaad, te jelan pax ebꞌ, yuj chiꞌ ix acꞌjioch ebꞌ dꞌa jun opisio chiꞌ.