Ebꞌ ayoch yopisio yedꞌ vin̈aj Salomón
4
Ix och vin̈aj Salomón reyal dꞌa smasanil ebꞌ yetisraelal. 2-6 A ebꞌ vin̈ ayoch yedꞌ vin̈ dꞌa yopisio, aton ebꞌ vin̈ tic: A vin̈aj Azarías yuninal vin̈aj Sadoc ayoch sacerdoteal. A vin̈aj Elihoref yedꞌ vin̈aj Ahías, ebꞌ vin̈ yuninal vin̈aj Sisa, a ebꞌ vin̈ stzꞌibꞌan yabꞌixal tas scꞌulej vin̈ rey chiꞌ. A vin̈aj Josafat yuninal vin̈aj Ahilud, a vin̈ tzꞌibꞌum yaj dꞌa vin̈ rey chiꞌ. A vin̈aj Benaía yuninal vin̈aj Joiada, a vin̈ ayoch yajaliloc ebꞌ soldado. A vin̈aj Sadoc yedꞌ vin̈aj Abiatar, a ebꞌ vin̈ sacerdote yaji. A vin̈aj Azarías yuninal vin̈aj Natán, yajal yaj vin̈ dꞌa scal ebꞌ vin̈ gobernador. A vin̈aj Zabud yuninal pax vin̈aj Natán chiꞌ, sacerdote yaj vin̈, acꞌum pax razón yaj vin̈ dꞌa vin̈ rey chiꞌ. A vin̈aj Ahisar tzꞌilan tas ay dꞌa spalacio vin̈ rey chiꞌ. Axo vin̈aj Adoniram yuninal vin̈aj Abda, a vin̈ tzꞌilan ebꞌ munlajvum yovalil smunlaji.7 A vin̈aj Salomón chiꞌ, ay lajchavan̈ ebꞌ vin̈ gobernador dꞌa masanil yol smacbꞌen Israel tzꞌacꞌan servil vin̈. A yopisio ebꞌ vin̈ chiꞌ, junjun ebꞌ vin̈ dꞌa junjun ujal dꞌa yol abꞌil, syicꞌcot ebꞌ vin̈ tastac syabꞌlej vin̈ rey chiꞌ yedꞌ ebꞌ ayecꞌ yedꞌ vin̈ dꞌa spalacio. 8 A lajchavan̈ ebꞌ vin̈ gobernador chiꞌ, aton ebꞌ vin̈ tic:
Vin̈aj Ben-hur, a vin̈ tzꞌicꞌancot tastac tzꞌabꞌlaj chiꞌ dꞌa tzalquixtac dꞌa yol yic Efraín.
9 Vin̈aj Ben-decar, a vin̈ tzꞌicꞌancot tastac tzꞌabꞌlaj chiꞌ dꞌa juntzan̈ chon̈abꞌ tic: Macaz, Saalbim, Bet-semes, Elón yedꞌ Bet-hanán.
10 A vin̈aj Ben-hesed, a vin̈ tzꞌicꞌancot tastac tzꞌabꞌlaj chiꞌ dꞌa Arubot, dꞌa Soco yedꞌ dꞌa masanil yol yic Hefer.
11 A vin̈aj Ben-abinadab, a vin̈ tzꞌicꞌancot tastac tzꞌabꞌlaj chiꞌ dꞌa masanil yol smacbꞌen Dor, a ix yetbꞌeyum vin̈, aton ix Tafat yisil vin̈aj Salomón chiꞌ.
12 A vin̈aj Baana yuninal vin̈aj Ahilud, a vin̈ tzꞌicꞌancot tastac tzꞌabꞌlaj chiꞌ dꞌa Taanac, Meguido yedꞌ dꞌa masanil yol yic Bet-seán. A jun chon̈abꞌ chiꞌ junn̈ej yaj yedꞌ Saretán, dꞌa yalan̈emta Jezreel, sbꞌatn̈ej dꞌa Bet-seán masanto scꞌoch dꞌa Abel-mehola yedꞌ dꞌa scꞌaxepalbꞌat Jocmeam.
13 A vin̈aj Ben-geber, a vin̈ tzꞌicꞌancot tastac tzꞌabꞌlaj chiꞌ dꞌa Ramot dꞌa yol yic Galaad yedꞌ dꞌa masanil chon̈abꞌ dꞌa yol yic Galaad chiꞌ, aton juntzan̈ schon̈abꞌ ebꞌ yin̈tilalcan Jair yuninal Manasés yedꞌ pax dꞌa yol smacbꞌen Argob dꞌa yol yic Basán. Ataꞌ ay 60 nivac chon̈abꞌ ayoch smuroal, ayoch qꞌuen bronce tzꞌecꞌ cꞌatan syamnubꞌaloc spuertail.
14 A vin̈aj Ahinadab yuninal vin̈aj Iddo, a vin̈ tzꞌicꞌancot tastac tzꞌabꞌlaj chiꞌ dꞌa Mahanaim.
15 A vin̈aj Ahimaas, a vin̈ tzꞌicꞌancot tastac tzꞌabꞌlaj chiꞌ dꞌa yol yic Neftalí. Aton jun vin̈ chiꞌ ix yicꞌlaj sbꞌa yedꞌ ix Basemat yisil vin̈aj Salomón.
16 A vin̈aj Baana yuninal vin̈aj Husai, a vin̈ tzꞌicꞌancot tastac tzꞌabꞌlaj chiꞌ dꞌa yol yic Aser yedꞌ dꞌa Alot.
17 A vin̈aj Josafat yuninal vin̈aj Parúa, a vin̈ tzꞌicꞌancot tastac tzꞌabꞌlaj chiꞌ dꞌa yol yic Isacar.
18 A vin̈aj Simei yuninal vin̈aj Ela, a vin̈ tzꞌicꞌancot tastac tzꞌabꞌlaj chiꞌ dꞌa yol yic Benjamín.
19 A vin̈aj Geber yuninal vin̈aj Uri, a vin̈ tzꞌicꞌancot tastac tzꞌabꞌlaj chiꞌ dꞌa yol yic Galaad, aton bꞌaj ecꞌnac schon̈abꞌ vin̈aj Sehón sreyal ebꞌ amorreo yedꞌ vin̈aj Og sreyal Basán.
An̈ej vin̈aj Geber chiꞌ yajal yaj dꞌa jun macan̈ lum luum chiꞌ.
A sjelanil vin̈aj Salomón yedꞌ sbꞌeyumal
20 A ebꞌ aj Judá yedꞌ ebꞌ aj Israel maxtzac bꞌischaji jantac sbꞌisul ebꞌ, lajan ebꞌ icha yarenail stiꞌ aꞌ mar. Man̈ jantacoc tas svaji yedꞌ tas tzꞌucꞌji, tzalajcꞌolaln̈ej yajecꞌ ebꞌ. 21 A vin̈aj Salomón rey dꞌa yibꞌan̈ masanil juntzan̈ chon̈abꞌ chiꞌ. Scotn̈ej dꞌa aꞌ Éufrates masanto sja dꞌa schon̈abꞌ ebꞌ filisteo yedꞌ dꞌa smojonal yic Egipto. A masanil juntzan̈ chon̈abꞌ chiꞌ, junjun abꞌil syacꞌan qꞌuen tumin ebꞌ yic stupan ebꞌ bꞌaj aycan dꞌa yalan̈ schecnabꞌil vin̈aj Salomón chiꞌ yacbꞌan pitzan vin̈. 22 A masanil tastac syabꞌlej vin̈aj Salomón chiꞌ dꞌa junjun cꞌu yedꞌ ebꞌ cajan yedꞌ vin̈, aton tic: 70 quintal ixim harina te chocꞌ yaji, 140 quintal pax ixim veech yaji, 23 lajun̈van̈ nocꞌ mam vacax te bꞌaqꞌuech, 20 pax nocꞌ libre yaj dꞌa yol potrero yedꞌ 100 nocꞌ calnel. Chꞌoc pax yaj nocꞌ cꞌultaquil chej, nocꞌ chꞌucul yedꞌ nocꞌ much te bꞌaqꞌuech. 24 Ix yacꞌ val yajalil vin̈aj Salomón chiꞌ dꞌa yibꞌan̈ lum luum schacot dꞌa stitac aꞌ Éufrates, scotn̈ej dꞌa Tifsa masanto tzꞌemcꞌoch dꞌa Gaza. Yajal yaj vin̈ dꞌa yibꞌan̈ masanil ebꞌ vin̈ sreyal juntzan̈ nación chiꞌ. Ay juncꞌolal dꞌa scal vin̈ yedꞌ juntzan̈ chon̈abꞌ ay dꞌa spatictac chiꞌ.
25 Ayic pitzanto vin̈aj Salomón chiꞌ, masanil anima dꞌa yol yic Judá yedꞌ Israel scotn̈ej dꞌa Dan masanto dꞌa Beerseba, juncꞌolal yaj ebꞌ. Junjun ebꞌ ay teꞌ yavbꞌenteꞌ dꞌa spatictac spat. 26 A vin̈aj Salomón chiꞌ, ay pax juntzan̈ pat bꞌaj ayoch 40 mil nocꞌ chej stocꞌan carruaje yic oval yuj vin̈. Ay pax 12 mil ebꞌ soldado sqꞌue dꞌa yibꞌan̈ nocꞌ chej chiꞌ. 27 Masanil ebꞌ vin̈ tzꞌicꞌancot tastac syabꞌlej vin̈aj rey Salomón yedꞌ masanil ebꞌ vin̈ sva yedꞌ vin̈, scham val yilan ebꞌ vin̈ tato tzꞌacan syabꞌ dꞌa jun uj chiꞌ. 28 A ebꞌ vin̈ ayoch dꞌa yibꞌan̈ yicꞌancot juntzan̈ chiꞌ, syicꞌpaxcot ixim cebada yedꞌ an̈ yan̈ nocꞌ chej chiꞌ ebꞌ vin̈ yedꞌ yic juntzan̈xo nocꞌ chej tocꞌum icatz yaln̈ej bꞌaj ay.
29 Man̈xo jantacoc sjelanil vin̈aj Salomón chiꞌ ix acꞌji yuj Dios. Man̈xo alchajbꞌenoc jantac sjelanil vin̈ chiꞌ. 30 A sjelanil vin̈ chiꞌ, te ecꞌto dꞌa yichan̈ yic ebꞌ aj Egipto yedꞌ dꞌa yichan̈ yic ebꞌ ay bꞌaj sjavi cꞌu. 31 Te jelan vin̈ dꞌa yibꞌan̈ juntzan̈ ebꞌ vin̈ vinac bꞌinajnac yuj sjelanil, aton vin̈aj Etán yin̈tilal vin̈aj Zera, vin̈aj Hemán, vin̈aj Calcol yedꞌ vin̈aj Darda, aton ebꞌ vin̈ yuninal vin̈aj Mahol. A sbꞌinajnaquil sjelanil vin̈ chiꞌ, ix cꞌoch specal dꞌa masanil juntzan̈ chon̈abꞌ dꞌa spatic yichan̈ Israel. 32 A vin̈aj Salomón chiꞌ, oxeꞌ mil cꞌaybꞌubꞌal yic jelanil ix yalcan vin̈, ix sbꞌoanpax mil cinco bꞌit vin̈. 33 Ix lolon vin̈ dꞌa yibꞌan̈ te teꞌ yedꞌ dꞌa yibꞌan̈ tas tzꞌavchaji. Ix schael yich vin̈ slolon dꞌa teꞌ cꞌuteꞌ ay dꞌa Líbano masanto dꞌa yibꞌan̈ teꞌ hisopo sqꞌuibꞌqꞌue dꞌa spatictac teꞌ pat. Ix lolonpax vin̈ dꞌa yibꞌan̈ juntzan̈ nocꞌ chan̈eꞌ yoc, nocꞌ much, nocꞌ tzꞌecꞌ dꞌa sat luum yedꞌ dꞌa yibꞌan̈ nocꞌ chay ay dꞌa yoltac a aꞌ. 34 A ebꞌ vin̈ sreyal masanil juntzan̈ nación ix abꞌan jantac sjelanil vin̈, ix scheccot ebꞌ anima ebꞌ vin̈ yic tzul yabꞌan sjelanil vin̈ ebꞌ.