Strato vin̈aj Salomón yedꞌ vin̈ sreyal Tiro
5
Ayic ix yabꞌan vin̈aj Hiram sreyal Tiro to a vin̈aj Salomón ix och reyal sqꞌuexuloc vin̈ smam, ix yacꞌancot ebꞌ schecabꞌ vin̈ yic tzul lolon ebꞌ yedꞌ vin̈, yujto te vachꞌtaxon yacꞌan vin̈ yedꞌ vin̈aj David. 2 Yuj chiꞌ ix yalanxibꞌat vin̈aj Salomón dꞌa vin̈aj Hiram chiꞌ icha tic: 3 A ach tic ojtac to maj yal-laj sbꞌoancanqꞌue junoc stemplo Jehová co Diosal vin̈ in mam yujto nivan tiempoal ix yacꞌ oval vin̈, masanto a Jehová ix acꞌanoch ebꞌ ayoch ajcꞌolal chiꞌ dꞌa yol scꞌabꞌ vin̈. 4 A ticnaic jun, toxo ix yacꞌ juncꞌolal Jehová dꞌayon̈ israel on̈ tic, man̈xalaj ebꞌ ajcꞌol dꞌayon̈, man̈xalaj chucal bꞌaj tzon̈ xivi. 5 Yuj chiꞌ, toxo ix in naꞌ to ol in bꞌoqꞌue junoc stemplo Jehová co Diosal, icha ajnac yalan dꞌa vin̈ in mam chiꞌ, ayic yalannac icha tic: A junoc uninal ol ochcan dꞌa yol sdespacho a qꞌuexuloc, aꞌ ol bꞌoanqꞌue junoc in templo, xchi Jehová dꞌa vin̈ in mam chiꞌ. 6 Yuj chiꞌ, tzin cꞌan dꞌayach to ol a chec icꞌjoquel steꞌal, aton teꞌ cꞌuteꞌ dꞌa Líbano. Ol vacꞌbꞌat ebꞌ vin̈ in checabꞌ yic scolvaj ebꞌ vin̈ yedꞌ ebꞌ vin̈ a checabꞌ chiꞌ. Ol in tup scꞌu ebꞌ vin̈ icha jantac tza cꞌanaꞌ, yujto ojtac to malaj junoc on̈ syal quicꞌanel teꞌ icha ex aj Sidón ex chiꞌ, xchibꞌat vin̈.7 Ix te tzalaj vin̈aj Hiram chiꞌ ayic ix yabꞌan vin̈ tas ix yalbꞌat vin̈aj Salomón chiꞌ. Ix yalan vin̈: Aljocabꞌ vachꞌ lolonel dꞌa Jehová, yujto ix yacꞌ jun yuninal vin̈aj David te n̈ican ix ochcan sqꞌuexuloc scuchbꞌan jun nivan chon̈abꞌ chiꞌ, xchi vin̈.
8 Elan̈chamel ix yalxicot vin̈ dꞌa vin̈aj Salomón chiꞌ: Toxo ix vabꞌ tas ix alcoti, tic tzin chec icꞌjoquel teꞌ cꞌuteꞌ yedꞌ teꞌ taj icha ix al chiꞌ, ol vacꞌbꞌat teꞌ dꞌayach. 9 Ol yiqꞌuemta teꞌ ebꞌ vin̈ in checabꞌ dꞌa Líbano, ol emcꞌoch teꞌ dꞌa stiꞌ aꞌ mar. Yaman ol aj teꞌ yic ol laj bꞌat teꞌ dꞌa yibꞌan̈ aꞌ, icha chiꞌ ol aj scꞌoch teꞌ bꞌaj ix alaꞌ. Ataꞌ ol e cha teꞌ, ol eyicꞌanbꞌat teꞌ bꞌian. A achxo jun, ol acꞌcot tas ol in va yedꞌ ebꞌ anima dꞌa in palacio tic stojoloc teꞌ, xchicot vin̈.
10 Ichaton chiꞌ ix aj yacꞌan teꞌ cꞌuteꞌ vin̈aj Hiram yedꞌ teꞌ taj ix och yopisio yuj vin̈aj Salomón chiꞌ. 11 Axo vin̈aj Salomón chiꞌ ix acꞌan jantac tas tzꞌoch yuj vin̈aj Hiram chiꞌ dꞌa junjun abꞌil: 75 mil quintal ixim trigo yedꞌ 115 mil galón aceite yic sat teꞌ olivo. 12 Icha chiꞌ ix aj yacꞌji sjelanil spensar vin̈aj Salomón chiꞌ yuj Jehová, icha ix aj yalani. Ix sbꞌoan strato vin̈ yedꞌ vin̈aj Hiram chiꞌ yic ay juncꞌolal dꞌa scal ebꞌ vin̈ schavan̈il.
13-14 Ix schec vin̈aj Salomón chiꞌ to a dꞌa masanil yol yic Israel smolchaj ebꞌ vin̈ vinac to yovalil sbꞌat dꞌa munlajel dꞌa Líbano. A sbꞌisul ebꞌ vin̈ chiꞌ, 30 mil ebꞌ vin̈ dꞌa smasanil. 10 mil ebꞌ vin̈ schecjibꞌat dꞌa junjun uj. Jun ujal xidꞌecꞌ ebꞌ vin̈ munlajel dꞌa Líbano chiꞌ, chabꞌ ujal ayecꞌ ebꞌ vin̈ dꞌa spat. A vin̈aj Adoniram ayoch yajaliloc ebꞌ vin̈ 30 mil chiꞌ. 15 Ay pax 70 mil ebꞌ vin̈ cuchum icatz. Ay pax 80 mil ebꞌ vin̈ tzeyum qꞌuen dꞌa tzalquixtac dꞌa yol yic Israel chiꞌ. 16 Chꞌoc pax yaj oxeꞌ mil 300 ebꞌ vin̈ ayoch dꞌa caporalil yilan munlajel chiꞌ. 17 Ix yalan vin̈aj Salomón chiꞌ to stzeyji qꞌuen nivac qꞌueen, vachꞌ tzꞌaj qꞌuen stzeyji yic vachꞌ a qꞌueen tzꞌemcan yichoc stemplo Jehová chiꞌ. 18 A ebꞌ vin̈ smunlajvum vin̈aj Salomón yedꞌ ebꞌ vin̈ yic vin̈aj Hiram chiꞌ yedꞌ pax ebꞌ vin̈ cajan dꞌa Gebal, ix sjoch te teꞌ ebꞌ vin̈, ix stzeyanpax qꞌuen qꞌueen ebꞌ vin̈ yic tzꞌoch dꞌa templo chiꞌ.